- Tulugaq sumi tamaaniippoq, aamma nalunartuulluni. Nuummi takussaalluartuuvoq, festivalip pisortaa Susanne Andreasen ilisarnaat nutaaq tulakkap timmisup assinga pillugu oqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Assilialiortartoq Arny Koor Mogensen, Bolt Lamarimi atisaliortarnerminik ilaatigut ilisimaneqartup, illoqarfiit pingaarnersaanni 2015-imiilli ukiut allortarlugit kulturikkut pikialaartitsisarnermut assilialiortuuvoq.
Aappaagu 2025-mi festivali “siornatigut” Nuuk Nordisk Kulturfestivalitut nalunnginneqartoq ukiuni qulinngortorsiorluni nalliuttorsiutigineqassaaq. Tassungalu atatillugu festivali Suialaa Arts Festivalimik taaguuteqalissasoq qanittukkut saqqummiunneqarpoq.
Suialaa kalaallit oqaasiinit pinnguarneruvoq (suialaannguaq), tassaavorlu Frederik Kunngi Kristensenip taalliaanit “Ippassaq Ullumeqarani Aqagu”-mit isumassarsiaasoq.
Aaqqissuisut naapertorlugit suialaannguup anorilluunniit suulluunniit allanngortissinnaavai, soorluttaaq kulturikkut festivalertitsisoqaraangat eqqumiitsuliortut isiginnaartullu nikisiallanneqartartut.
- Nutaaliortoqartarpoq illoqarfik sungiusimanngisatsinnik arlaatigut pisoqarfiusarluni. Soorlu Pisiffimmi qitittoqaraangat imaluunniit Narsarsuarmi inissiani isiginnaartitsisoqarmat, Susanne Andreasen nassuiaavoq.
Festivali suli Nuummi ingerlanneqassasoq aamma oqarpoq; Taamaammat tulukkap sului siaarsimasut mittarfiup aqqutaanik tunuani kakiornilik.
Kalaallit Nunaanni sumiiffinni allani pisup ingerlanneqarnissaa pilersaarutaanngilaq.
Nuummiuunnaanngitsunut aaqqissuussaasoq festivalimi aqutsisup erseqqissarpaa:
- Eqqumiitsuliortut nunamit tamarmeersut sapinngisamik peqataatinniartarpavut aningaasatigut killeqarnerput aallaavigalugu.
Festivalip aqqa, ilisarnaataa ukiunullu sisamanut periusissiaq piffissami sivisuumi kulturikkut suliaqartut festivalimut attuumassuteqartut akornanni isumaliutersuutit oqallinnerillu kingunerisaraat.
Suliassaq nutaaq
Apeqqutinik immersugassami akissutit, namminneq kajumissutsiminnit aamma akiliillutik peqataasut nunat avannarliit kisiisa sammiunnaarnissaannut aalajangiinermik kinguneqarpoq.
- Nuuk Nordiskimik taaguut atorluarneqarsimavoq. Oqallisigisarnikuuarput aalajangersimallutigulu qanoq oqariartuuteqassanerluta, Susanne Andreasen oqarpoq, taassumalu erseqqissarpaa taarserneqarnerup siunertarigaa Kalaallit Nunaata ”aaqqissuussap tigoqqinnissaa”.
- Nunani avannarlerni festivalertitsisarnermi piffissaq qaangiuppoq. Ingammik Kalaallit Nunaanni festivalertitsisoqartarnerani. Issittoq uummatitsinnut kulturitsinnullu qanittoq takutikkusupparput. ”Suialaarlu“ kikkut tamarmik taasinnaanngorsinnaavaat. Oqaatigiuminarpoq, Kunngip taalliaanit isumassarsiaq nutaaq pillugu nassuiaavoq.
– Ateq ilisarnaallu nutaaq aqqutigalu Kalaallit Nunaat aaqqissuussamik akisussaasuunera ersersinneqarpoq, Suialaa Arts Festivalimik aqutsisoq Susanne Andreasen oqarpoq.
Foto: Leiff Josefsen
Susanne Andreasen oqarpoq festivalip taaguutaata allanngortinneqarnerata „nunarsuaq tamakkerlugu soqutigineqarnerulernera“ kinguneraa.
Pikialaartitsinerup atiata nutaap "Arts Festival"-ertaqarnerata nunat tamalaat akornannut aamma saaffiginnittoq Susanne Anderassen ilanngullugu oqarpoq. Oqaatsit pikialaartitsinernut allanut ukiut tamaasa kulturikkut aaqqissuussanut ilisarnaat, soorlu Arctic Sounds (nipilersorneq Sisimiuni), Nuuk International Film Festival (filmiliorneq Nuummi) imaluunniit Akisuanerit Festival (nipilersorneq Nuummi).
PAASISSUTISSAT
- Nuummi
Nunat Avannarliit Kulturisioqatigiissinneqartarnerat 2015-imi aallartippoq,
piginnittuullutik Kommuneqarfik Sermersooq aamma NAPA - Kalaallit Nunaanni
Nunani Avannarlerni Piorsarsimassutsikkut Attaveqaat. Tassanngaanniit ukioq
allortarlugu pikialaartitsineq aaqqissuunneqartarpoq.
- 2024-mi
maajiminngaanniit festivalip taaguutigilissavaa Suialaa Arts Festival
- Festivalip tullia ingerlanneqassaaq 23. -
26. oktobari 2025, tassalu ukiut qulinngorlugit nalliuttorsiutigineqarlunilu
festivali arfinilissaanik ingerlanneqassaaq.
- Festivali Kalaallit Nunaanni kulturikkut aaqqissuussani annersaavoq,
ukiorlu allorlugu eqqumiitsuliortunik 200 missaanniittunik, namminneq
piumassutsiminnik suliaqartartunik 100-inik aamma Nuummi peqataasunik 2500-nik
katersuutsitsisarpoq.
- Festivalimi eqqumiitsuliornernik tamanik sammisassaqartitsisoqartarpoq,
tassa isiginnaartitsinerit, qitinnerit, eqqumiitsuliat takuneqarsinnaasut,
illuliortaatsit il.il.
- Ilisarnaat nutaaq takussutissatullu ilisarnaatissaa Bolt
Lamar-imeersumit Arny Mogensenimit suliarineqarpoq
- Kunngip taalliaa Suialaa taallanik katersukkani uani
atuarneqarsinnaavoq: Ippassaq Ullumeqarani Aqagu
- Uani malinnaagit: www.suialaa.gl (taarserlugu
nuuknordisk.gl)
Kunngip ataqqineqarnerata ersersinniarneqarneranut, festivalimi qitiutinneqartut tassaasut isiginnaartitsinerit, qitinneq, nipilersornermik atuakkiornermillu sammisaqartitsineq, tamaasa aqqusaarlugit pinngorartitsisuunera tunngavigineqarpoq.
Kulturikkut festivalertitsinermi filmiliat amerlavallaannginnerat Susanne Andreasenip ilanngullugu oqaatigaa.
- Filmilialiat annikitsuararsuupput, tamatumalu saniatigut ukiut tamaasa Nuuk International Film Festival ingerlanneqartarpoq. Imaanngilaq filmit pingaartinngikkivut, festivalilli ingerlanerani pisunut allanut tamanut akornutaasinnaapput, festivalimi pisortaq oqarpoq.
Akerleriinngitsut
Kommuneqarfik Sermersuup NAPA-llu, Nunani Avannarlerni Ministerit Siunnersuisoqatigiivisa ataanniittup Nunani Avannarlerni Piorsarsimassutsikkut Attaveqaatip, pikialaartitsineq aaqqissuuttarpaat.
Nunat Avannarliit Siunnersuisoqatigiivinut Kalaallit Nunaata peqataanera Namminersorlutik Oqartussat tungaanniit maannakkut pitsaanerpaanngikkaluartoq, pikialaartitsinerup taaguutaata allanngortinneqarnera periusissiallu allanngortinneqarnera NAPA-p takorluugaanut akerliunngitsoq Susanne Andreasen oqarpoq.
- Issittumi periarfissat nunani avannarlerni takuneqarsinnaanissaat tusaaneqarsinnaanissaallu anguniarlugu taakku (NAPA-p, aaqq.) takorluugaraa. Taamaattumik takorluugarereerpaat. Issittoq Avannarlerluunniit aamma aallaaviginngilarput. Kalaallit Nunaalli tamatumunnga attuumassuteqarluinnarpoq taamaattumillu suleqatigiissinnaasariaqarput, oqarpoq.
Periusissaq "angusaqarusussuseqartoq, ilaatigut eqqumiitsulianik Kalaallit Nunaanni issittumilu sorlaqarluartunik pingaarnersiuinermik suliniuteqarnermik siunertaqartoq, tamatumalu saniatigut nunarsuarmi tamarmi isiginnaartunut ammajuarluni attuumassuteqartuusoq“ Suialaa Arts Festival maajip aallartinnerani saqqummiunneqarneranut atatillugu NAPA-mi pisortaagallartoq Pauliina Oinonen oqarpoq.
- Pikialaartitsinerup malinnaaviginissaa qilanaaraara, Oinonen tusagassiuutinut nalunaarummi allappoq.
Pikialaartitsineq Kommuneqarfik Sermersuumit NAPA-millu katillugit 1,6 million koruuninik aningaasaliiffigineqarpoq. Akileraartartunut tamanna amerlarpasikkaluarpoq, Susanne Andreasenili naapertorlugu aaqqissuussamut annertunngitsumut taamaallaat naammappoq. Marloriaammik amerlanerusut pisariaqartinneqartarput, taamaattumillu aningaasanik katersuiniartoqartarpoq. Tamannalu aaqqissuisut festivalinut tallimanut siulliit eqqarsaatigalugit pikkoriffigaat.
Akiami?
Tassunga atatillugu isissutissat akii aamma apeqqutaapput.
Pisissagaanni - amerlasuut akisuallaarsorisaat - isissutissaq ataasiinnaq tajatut atugassaq aaqqissuussamut tamarmut isersinnaalersitsisoq imaluunniit ataasiaannaq isissutissaq?
Imaluunniit toqqagassat alla pingajuat?
Pitsaanerpaamik suli aaqqiissutissarsineqanngitsoq Susanne Andreasen oqarpoq.
- Tamanut isersinnaanngorluni pisinikkut takunissaanik pilersaarutiginngisat immaqa misigisaqarfigisinnaavat, oqarpoq.
Aammali akeqanngitsuuppat inuit takkutinngitsooriaannaapput. Nuummi periarfissarpassuaqarpoq, inuit ulappupput, taamaattumik inuit ilaannikkut takkunnissartik "puiortarpaat“.
Nuannersorli tassaavoq meeqqat inuusuttullu 18-it tikillugit ukiullit festivalimut akeqanngitsumik isersinnaammata.
Piffissap takutikkumaarpaa uagut sinneruttut 2025-mi Suialaa Arts Festival ulluni sisamani oktobarip 23-aniit 26-anut ingerlanneqalerpat qanoq aningaasartuuteqartigissanersugut.
