Tarrak Roskilde Festivalimi: Misigisaq tupinnaqaaq
Josef Tarrak-Petrussen Roskilde Festivalimi appisimaarmat qallunaat allaat kalaallisut erinarsoqataapput. Josef Tarrak-Petrussen Suspekt peqatigalugu ataasinngornermi 26. juni tusarnaartitsivoq. Neriuppunga kalaallit amerlanerusut maani appillutik misigiumaaraat, oqarpoq.
Rappertartoq nunatsinneersoq, Josef Tarrak-Petrussen Roskilde Festivalimi tusarnaartitsisimalluni maanna aamma oqarsinnaalerpoq.
Rappertartup qallunaat Suspekt peqatigalugit Roskilde Festivalimi ataasinngornermi 26. juni tusarnaartitsigami, tusarnaartut tusintillit nunasiaataaneq namminiilivinnissarlu pillugit appisimaarfigai.
Roskilde Festivalip nittartagaani Tarrak nunatsinni kinaassuseq namminiilivinnissarlu pillugit oqallinnermi ersarissumik nipeqartutut ilisaritippaat.
- Tupinnaqaaq appisimaarluni. Assut tupigusuppunga qujamasussuaarlungalu. Ingammik kalaallisut oqalullunga appisimaarpunga, qallunaat allaat kalaallisut oqaatsit atorlugit erinarsoqataallutik. Nilliaqataallutik, Tarrak, Josef Tarrak-Petrussen Roskilde Festivalimi tusarnaartitsereerluni oqarpoq.
Josef Tarrak-Petrussen, "Tupilak" 2016-imi saqqummertikkamiuk nuannarineqarluarpoq. Immiussaq kingulleq ”Uummatima” Suspekt peqatigalugit immiussaavoq.
Nunatsinniit tusarnaartitsiartorsimasut arlallit
Josef Tarrak-Petrussen nunatsinniit kisimiinngilaq Roskilde Festivalimi tusarnaartitsisimanngilaq. Nanook, Small Time Giants aamma Nive Nielsen tusarnaartitsisimapput.
- Misigeqaanga tigulluarneqarlunga. Aamma misigisaq suli tamuavara, aamma tupigusussuaarpunga, neriuppungalu siunissami kalaallit suli amerlanerusut appisimaariartalissasut, neriuppunga Roskilde misigiumaaraat, Josef Tarrak-Petrussen oqarpoq nangillunilu siunissami periarfissaqartinneqassaguni tusarnaartitseqqissinnaalluni.
Josef Tarrak-Petrussen Suspekt peqatigalugu Roskilde Festivalimi tusarnaartitsineranit video Suspektikkut Facebookiani takusinnaavat.
Tarrak Roskilde Festivalimi tusarnaartitsimmat peqataasimanngikkuit, Danmarkimi tusarnaarnissaanut suli periarfissaqarputit. Kalaallit Nunaat Tivolimi ingerlanneqalerpat, Tarrak, Qarsoq aamma Small Time Giants ilaatigut tusarnaartitsissapput.