Taseralimmi inissat tamarmik ulikkaarput
Sisimiuni Kulturikkut Illorsuartaami Taseralimmi aaqqissuussinernut tamanut inissat sapaatiummat ulikkaarsimapput.
Taamak kulturip illorsuata pisortaa Juaaka Lyberth ilisimatitsivoq.
Kulturikkut illorsuaq kaffillerlunilu cabary-qartitsivoq - meeqqannut inuusuttunullu kabaret-imik quiasaarnertalimmillu tusarnaartitsineq, opera erinarsoqatigiillu tusarnaartitsisut kiisalu Miki Jakobseni saqqummersitsilluni.
Ammaanersiorluni aaqqissuussinerit marlunngorpat nanginneqassapput, meeqqanut meeqqerivimmiittartunut tusarnaartitsisoqassalluni, utoqqarnut filmertitsisoqassalluni, aammalu eqqumiitsuliornermik soqutigisaqartunut Miki Jakobsenip saqqummersitsinini pillugu oqaluttuassaaq.
Pingasunngorpat Don Malikop rap-ernermik tusarnaartitsinissaa ulikkaarpoq. Taamaammat Taseralimmi immikkut ittumik tusarnaartitseqqinnissaq pilersaarusiorneqarpoq, Juaaka Lyberth ilisimatitsivoq.