Tasiilami filmiliaq Danmarkimi nersornaaserneqartoq
Filmi naatsoq “Anngeerdardardor” Odense Film Festivalimi nersornaaserneqarpoq.
‘Anngeerdardardor’-p Odensemi nersornaaserneqarnera 25.000 koruuninik aningaasartaqarpoq.
Assi: Hanne M. Sørensen
Odense Film Festivalimi sapaatip-akunnera kingullermi ingerlanneqarnerani filmit naatsut sanasuilu nersornaaserniarneqarput. Kalaallit Nunaanni immiussaq ‘Anngeerdardardor’ oqaluttualiatut pitsaanerpaartut qallunaat nersornaasiuttagaanni ajugaavoq.
Filmi ‘Anngeerdardardor’-imi Tasiilami pivoq. Nukappiaraq Kaali qimmiminik ujaasinermini allaanerunerminillu takunnilernera oqaluttuarineqarpoq.
Filmi Christoffer Rizvanovic Steenbakkenimit ilitsersorneqarpoq Kamillo Ignatiussenilu pingaarnertut inuttaalluni Kaali.
- Ukiumi Kalaallit Nunaata qallunaanit allatut isigineqalerfiani filmip Tasiilami inuusuttut inuunerannik oqaluttuap pikkunartup naliliisartunit alutorineqarnera tulluarpoq, filmit pillugi atuagassiami Ekko-mi allaaserineqarpoq.
Filmi Berlinalenimi februaarimi takuteqqaarneqarmat Sermitsiap Christoffer Rizvanovic Steenbakken oqaloqatigaa.
- Neriuppunga filmi aqqutigalugu Tasiilami inuusuttut qanoq piginnaasaqartiginerat inunnit paasineqarnissaanik iluaqutaassasoq, tamannalu takutissinnaagukku tulluusimaarutigissavara, taamani apersorneqarnermini oqarpoq.
