Tasiilaq pillugu podcastiliaq immikkuullarissumik takutitsisoq

Christoffer Stenbakken aamma Carl Sørensen meeraallutilli ikinngutigiilerput Tasiilamilu 1990-kkunni peroriartorlutik. Danmarkimulli nuunnermik kingorna takusinnaavaat inunngorfitsik nutaarsiassani eqqartorneqartarnera eqqaamasaminnit allaanerusoq.

Taakku marluullutik podcast 'Tilbage til Tasiilaq' suliaraat misiginiarlugu Tasiilamiinneq qanoq innersoq.

Nutaarsiassiissutigineqartartut ilisarinngikkaat

- Podcastip saqqummerneraniit Kalaallit Nunaannit kalaalliniillu Danmarkimiit najugaqartunit arlalinnit allaffigitittarpugut. Suliarisimasarput inuit tigulluarpasittorujussuuaat, Christoffer Stenbakken Sermitsiaq.AG-mut oqarpoq.

Podcastip tigulluarneqarnera Carl Sørensen nuannaraa.

- Inuit ilisarisimanikuusanit saaffigineqartarluni immikkuullarilluinnarpoq. Tasiilamiinnerput nuannerpoq, ilaatigulli aamma ilungersunartarluni, ullaakkut 8.00-miit unnukkut 23.00 tungaanut suliaqartaratta. Tasiilami nuannersut salliutippagut, Carl Sørensen oqarpoq.

Taakkununnga pingaaruteqarsimavoq illoqarfiup saqqummiunneqartarneranit allaanerulluinnartumik suliaqarnissaq. Nutaarsiassanimi saqqummiunneqartartut ilisarisinnaasimanngilaat.

- Uagutsinnulli aamma pingaaruteqarsimavoq toqqortigaqannginnissarput. Illoqarfik taannaatillugu takutikkusussimavarput. Illoqarfimmut uteqqinnera misigissutsinnut sunnertinnangaatsiarpoq, tikilluaqquneqarluinnarnerpullu malunnaqaaq. Allaannginnami angerlaannarluni, Christoffer Stenbakken, Tasiilamit inuusuttuaraallunili aallarsimasoq oqaluttuarpoq.

Tussunngunartoq eqqaamasaqarnartorlu

Carl Sørensen Tasiilap nutaarsiassatigut saqqummiunneqartarnera mamiagisimavaa, isumaqarlunilu naammaginanngitsumik saqqummiussisoqartartoq.

- Ajorluinnarpooq oqartassagaanni Tasiilaq ajornerpaasoq. Kisitsisit tunngavigalugit oqaluttuarineqartut paasisinnaalluarpakka, uggoraarali taakkuinnaat isiginiarneqarneri. Inoqarpoq sulilluartunik nunaminnillu nuannarinnittunik, taakku nersornissaannut aamma inissaqartariaqarpoq, Carl Sørensen oqarpoq.

Christoffer Stenbakkenip Tasiilaq pillugu podcastiliulerami maluginiarpaa illoqarfik allanngugaarsimanngitsoq.

- Tussunngunarluinnarporli eqqaamasaqarnarlunilu, attortinnaqaaq. Nuannaarpunga nuannersunik pisimasunik eqqaasinneqarsinnaasimagama. Innuttaasut uannut sunniuteqarnerpaapput, eqqaamavaannga kinaanersunga, uangalu aamma eqqaamavakka kikkuunersut. Angerlarsimasutut misigivunga, allaannginnami illoqarfimmiikkama meeranngoqqillunga, oqarpoq.

Tusarnaartartunut isumassarsititsissut

Carl Sørensenip ikinngutimi Tasiilamiinnermini tussunngulluinnarnera malugisimavaa.

- Tasiilami innuttaasut Christoffer aqqaneq-marlunnilli ukioqartoq kingullermik takuaat, takoqqikkamikkuli ilassiorpaat. Tamanna uannut tuppallernarluinnarpoq.

Carl Sørensenip uppernarsivaa illoqarfik nuannerluinnartuusoq.

- Angerlarsimaffigaara, neriuppungalu tusarnaartartut Tasiilap qanoq ittuuneranik aamma paasisaqarluassasut. Nutaarsiassaniinnaq tusakkat kisiisa aallaaviginagit, aammali innuttaasut inussiarnerluinnarneri oqaluttuassallu soqutiginarluinnarneri pillugit. Neriuppunga tusarnaartut tikeraarusulissasut, oqaluttuarpoq.

Nutaamik suliaqalersut

Christoffer Stenbakkenimut pigaaruteqarpoq erseqqissassallugu Tasiilami innuttaasut nalinginnaalluinnartumik inuuneqartut, nutaarsiassanilu ilaatigooriarlutik saqqummiunneqartartut ulluinnarsiutaanngitsut.

- Ukiuni kingullerni maluginiarnarpoq Danmarkip Kalaallit Nunaat maluginiarneruleraa. Tamattami assigiimmik tunniussaqarsinnaallutalu immitsinnut ilinniartissinnaavugut. Siunissami naligiimmik ingerlanissarput pingaaruteqarpoq. Suulluunniit saqqummiunneqartariaqarput, pitsaaqutit ajortortaalu, ingerlariaqqinniassagatta, Christoffer Stenbakken erseqqissaavoq.

Suliassaminnik tullermik aallartitsereersimapput, Tasiilami inuusuttuaqqat peqatigalugit aallakaatitassiussallutik.

- Uteqqikkusuppugut, Tasiilami inuusuttuaqqat aallakaatitassiap imarisassaanik aalajangiisikkiartorlugit. Uagut immiussissummik paarsiinnassaagut, periarfissinniarlugit nipaat isumaallu tusaaneqaqqullugit. Suliniummulli suli aningaasassarsiorpugut, qaqugulu uterumaarnissarput suli ullulinngilarput, Christoffer Stenbakken ilisimatitsivoq.

Illoqarfik pillugu isiginninneq allanngortoq

Carl Sørensen isumaqarpoq Tasiilami innuttaasut ilakkuminarnerpaasut.

- Immikkuullarissuupput tikilluaqqusisuullutillu. Illarumatuujupput takorniortuullutillu. Taakku saniatigut pinngortitarsuaq periarfissanik ulikkaartoq avatangiiseraat. Podcastip suliarinera nuannerluinnarpoq, pingaartumik producererput Mads Bjørn Lundsgaard nersorneqartariaqarpoq. Suliamut ilungersuuteqarluinnarsimavoq. Ukiup affaa kingulleq sulingaatsiarpoq inaarsaalluni, angalaqataanerminilu ikiuulluarluni, Carl Sørensen oqarpoq.

Christoffer Stenbakkenip neriuutigaa podcast Tasiilap isigineqarneranut allannguissasoq.

- Neriuppunga tusarnaartut Tasiilamukarusulissasut, takusarlugu Tasiilaq qanoq ittuunersoq, Christoffer Stenbakken oqarpoq.

Podcasti 'Tilbage til Tasiilaq' dr.dk-mi tusarnaarneqarsinnaavoq.