Titartakkat nangeqattaartut nersorneqarujussuartut
Nuka Godtfredsenip nangeqattaartutut titartagai »Tutineq siulleq« Sermitsiamik atuartartut malinnaaffigisinnaanikuusaat Danmarkimi allaaserinnittartunit nersorneqartorujussuupput. - Tipaa kisimi amigaataavoq, Kristeligt Dagblad allappoq.
Berlingske Tidendep Nuka Godtfredsen ullorissanik tallimanik tunivaa Kristeligt Dagbladillu nangeqattaartutut titartakkat »Tutineq siulleq«, eskimuut ukiut 4.500-it siornanut nunatsinni nunasseqqaarnerannut tunngasoq nersorujussuarpaa.
Titartakkat tamarmik aallaqqaataaniilli kusanarluinnartumik ilusilersugaapput qalipaatillu imilertakkat atorlugit qalipaasersugaallutik. Immikkuualuttunnguilu tamarmik misissoqqissaagaallutillu nalilersoqqissagapput, oqaluttuarisaanermut naapertuulluinnartunngorsagaallutik.
– Uanga eqqortuliorumasartuuvunga, suut tamaasa 100 procentimik eqqortuutikkusuttarlugit. Titartakkat oqaluttuarisaanermut naapertuuttuutikkumallugit pigisat atisallu ammit katersugaasivimmi sulisunik oqaloqatiginnissutigeqqissaartarpakka. Eqqumiitsuliortutut suut tamaasa assammik suliariumasarpakka. Qarasaasiaq atorlugu titartakkat qatsuppakka. Tamakku avaanngunarput. Uagut titartagaatigut qanorsuarluunniit atuaqqeqattarneqarsinnaapput tamatigut nutaanik nassaarfigisarlugit, Nuka Godtfredsen Kristeligt Dagbladimut oqarpoq.
Nuannarinninnertillu isertunngilaat.
– Oqaluttuarineqartut pingaarnersaat, Nanu, ilaqutaalu Kalaallit Nunaanni angalanerminni assigiinngitsorpassuarnik misigisaqarput. Taaq, nannut, anorersuit, puisit, angalasarnersuit, toqu, ajunaarnerit, qaamaneq inuillu allat. Kalaallip eqqumiitsuliortup amigaatigisatuai tassa tipit kalaalerpalaartut. Issip ammillu tikki. Tamakkuli titartarneqarsinnaanngillat, Kristeligt Dagblad allappoq.