TNI- Fleximi ilinniartut ilinniakkatik juullimut niuffatsitsinermi atorluarpaat
Niuernermik Ilinniarfimmi ilinniartut ukiumoortumik juullimut tuniniaanissaq sioqqullugu juullimut pinnersaasiorlutik, juullimut naneruutiliorlutik, kaagiliorlutik, kaffinik tiinillu piareersaallutik juullerpalaartumillu assilisittarfiliorlutik ulapputigaat
Bodil Markussen Maja Reimerilu juullimut niuffannissaq sioqqullugu assilisittarfimmi juullerpalaartitsinissartik ulapputigaat, tassani assilisittut assitik ingerlaannartumik naqitsissinnaavaat. Assiliisoq: Leiff Josefsen
Leiff Josefsen
Bodil Markussen aamma Maja Reimer assilisittarfimmi assigiinngitsunik
pingasunik assilisittarfiusumiipput, tassanimi Niuernermik
Ilinniarfimmi ilinniartut juullimut niuffatsitsineranni novembarip
29-anni pisumut atatillugu assilisinniartut juullerpaluttumik
assilisissinnaammata.
Piareersarluarsimavugut, piffissarujussuarlu atorlugu juullerpaluttumik ilaqutariittut assilisittarfimmik isumassarsiatsinnik ineriartortitsilluta, Maja Reimer oqaluttuarpoq
- Ilaqutariittut
assilisittarfik inuit assilisiffigissallugu soqutiginerugaat
malunnarluarpoq,
kusanartumimmi suliaagami
orpiliaqarluni ataani tunissutissalimmik aamma ammaannartumik
kissarsuuteqarami, Bodil Markussen oqarpoq.
Inuit assitik ingerlaannaq
naqitertissinnaavaat ataaserlu 75 koruunilerlugu pisiarisinnaallugu.
Assilisittarfiit inimi
allamiipput inip ataatsimoortarfiup angisuup saniani taannalu
nerrivilersorlugu juullimi niuffaffittut atorneqarluni. Tassani
ilinniartut eqqumiitsuliatik, kaagiliatik, pinnersaatit, nuersakkat
atornikunillu juullimut pinnersaasiatik tuniniarpaat.
Regina Hansen nerriviup takisuup juullimut pinnersaatinik, naneruutinik, kaaginik kukkarnaanillu juullimut niuffannermi tuniniakkamik saani nikorfavoq. Assiliisoq: Leiff Josefsen
Ulapputigisatsinnut aamma ilaagamik kaagiliornerit kukkarnaaliornerillu, juullimut pinnersaatissanik nanerutitalinnik suliaqarnerit, paarnaqutinik naasunillu asimi katersukkatsinnik pinnersaaserlugit, Regina Hansen nerriviup takisuup suliaminnik tuniniaaffigisamik saniani nikorfasoq oqarpoq
Ilinniartut
iluatsilluartumik naammassinnittut
TNI Flex tassaavoq
ilinniartut niuernerup, pisiniarfimmiutut allaffissornerulluunniit
iluani ilinniaqqinnissaminnut qinnuteqarnissaminnut ukiumi ataatsimi
piukkunnarsarfigisartagaat.
Niuernermik Ilinniarfimmi
ilinniartitsisup Aviaq Godtfredsenip nassuiaalluni oqaatigaa,
ilinniartut ilinniakkatik juullimut niuffannermut atatillugu
piviusunngortikkaat.
TNI- Flex-imi ilinniartut juullimut niuffannermut atatillugu inuussutissarsiornikkut aningaasarsiornermi matematikimilu ilikkakkamik atornissaat misilippaat, ilinniartitsisoq Aviaq Godtfredsen oqarpoq. Assiliisoq: Leiff Josefsen
Ilinniartut juullimut niuffannermut atatillugu inuussutissarsiornikkut aningaasarsiornermi matematikimilu ilikkakkamik atornissaat misilippaat, Aviaq Godtfredsen oqarpoq
-Juullimut niuffanneq sioqqullugu tuniniakkatik akilersorpaat, juullimullu niuffannerup kingorna tuniniaanerminni qanoq sinneqartooruteqartigisimanerlutik naatsorsussallugu, Aviaq Godtfredsen oqarpoq, nangillunilu nassuiaalluni oqaatigalugu nioqqutinik ineriartortitsinermut atatillugu, Niuernermik Ilinniarfiup kontuaniit aningaasanik atuisoqarsinnaasoq, juullimullu niuffannerup kingorna utertinneqassasut, sinneqartoorutillu TNI-Flex-imi klassinut agguaanneqassasut.
- Juullimut niuffanneq ilinniartunut misigisaavoq nuannersoq. Ilinniartut marluk naammassisimasatik ippassaq attortissutigaat, takusinnaagamikku ilinniarnerminni qanoq siumukartigisimanerlutik. Ilinniartummi ilaat inuunerminni unammilligassaqarsimapput, kisiannili maannamut maanga killinnissartik iluatsissimallugu, Aviaq Godtfredsen oqarpoq.
Juullimi niuffannermit
sinneqartooruteqarpoq, tassanilu TNI-Flex-imi klassit marluk 2.161
koruunit avittussanngorlugit.
- TNI-Flex-imi ilinniartut sinneqartoorutit sumut atorneqarnissaat namminneq aalajangertussaavaat. Ilinniartut tujuuluinik nasalinnik tunuisigut atiminnik allassimasunik pisiniarlutik aalajangersimapput, aasaru soraarummeereerunik atugassaminnik, Aviaq Godtfredsen nassuiaavoq.
