Toqu oqaluuserisassavarput

- Toqunissaq ersigissallugu iluaqutaanngilaq.

Toqu inuunermi tunngaviusumik atugassarititaasoq oqaatigalugu, biskoppi Paneeraq Siegstad Munk naqissusiivoq. Tamanna pinngitsoortissinnaanngilarput.

- Inuutilluta inuuneq nuannersumik atussavarput. Inuit uagutsinnut ajunngitsuliortut pingaartillugit. Nuannaartitsisullu oqaasinngortinnissaa eqqaamallugu. Taamaalilluni inuunermik nuannersumik atuisimasumik oqaasinngortitsinissaq oqinnerusarpoq. Nuannersut misigisimasat oqaluuserineqarsinnaasut. Isumaga malillugu tuppallersarneqarneq uppernerlu inuunermi nakussatsissutaasarput, taanna oqarpoq.

Biskopperput 47-nik ukiulik nammineerluni kingullermik toqu qanimut misigisaqarfigaa, arnaa 2019-imi ernuttami apersortinnissaanut angalanermini uummamminik unittoormat. Paneeraq Siegstad Munkip taamaattumik ernermi apersortinnginnerani anaanani ilisariaqarsimavaa.

- Tupaqqanera eqqaamavara. Peerunnerani misigissuseq eqqumiitsoq. Palasinngorniarnermilu ilinniakkakka toqu pillugu oqaluuserinninnissannut eqqarsaqqittariaqarsimavunga. Oqaatsit ilinniarnerma nalaani ilinniagartoorpalaar- tunngorsimammata, taanna oqaluttuarpoq.

Paneeraq Siegstad Munk ukiorpassuit ingerlanerini anaananilu inuuneq pillugu oqaluuttarsimanerat aliasunneranut iluaqutaasimavoq. Anaanaa aamma palasiusimavoq, anaananilu oqaloqatigiittarsimanertik peqatigiittarsimanertillu eqqaamagamigit nukissaqartitsipput, taamaalillunilu palasitut atisaqarluni qeqaannarsinnaanngorluni.

- Misigissutsit taakku puiorusunngilakka, taakkuami takussutissaapput maaniissimaneranut. Attuinei puigorusunngilakka, taakku uannut asanninneranut takussutissaapput, tamannalu uanga meeqqannut ingerlateqqissinnaavara, Paneeraq Siegstad Munk oqarpoq, nangillunilu:

- Ullut tamaasa eqqaajuartarpara.

Anaanaata »(apustili, aaqq.) Paulusi nuannarilluinnarsimagaa« oqaluttuarpoq, taamaattumillu arnaata ilisaaneranut atatillugu allagaanit atorsinnaasumik nassaarniartussaasimavoq.

- Toqu aamma toqusunit makinneq pillugit isumatusaartumik nassaarniartussanngorpunga. Upperisarsiornikkut oqaaserineqartut tuppallersaatigaakka, taakkuami uannut isumaqarput, taanna oqarpoq, eqqarsarlunilu ilisinermi oqalugiaatini 2019-imiilli allanngorsimanersut.

- Oqaluffimmi biibilimilu qanoq tuppallersarneqartigisinnaanerlunga paasilerpara, taanna oqarpoq.

Palasit suliassaasa ilaat pingaarutilik tassaavoq toqusoqartillugu ilaquttanik qimagaasunillu oqaloqateqarnissaq. Toqu eqqartorneqartarpoq, ingammik ilisineq pilersaarusiorneqaraangat. Ilaannut immaqa qanigisamik annaasaqarnermi oqaluuserinissaanut qaninnerpaasarpoq.

Ikioqatigiittoqartarnera

Biskopip isaanit toqusoqartillugu sumiiffinni minnerusuni illoqarfimmut annerusumut soorlu Nuummut sanilliullugu suliaqartarnerit assigiinngillat. Taanna Attumi peroriartorpoq, isorliunerusunilu allaanngilaq toqu inuunermut ilaasoq annerusumik paasisimaneqarnerusartoq. Immaqa pinngortitamut qanittumiinneq pissutigalugu, ilaatigullu aalisarnermut piniarnermullu atatillugu ajunaartoqartarmat.

- Isorliunerusuni aliasunneq ataatsimoorunneqarnerusarpoq. Toqusup timaata asannerani ikioqatigiittoqartarpoq, kikkullu tamarmik annissinermut ilisinermullu peqataasarput. Kikkut tamarmik ikioqatigiittarput, taanna oqarpoq.

Naak Nuummi taamatut iliortoqartaraluartoq, illoqarfimmiut tamarmik takkuttanngillat, kisianni ilaqutaasut ikinngutillu ilisinermut peqataanerusarput.

- Isumaqarpunga tamanna ilaqutaasut toqu pillugu isiginnittarnerannut sunniuteqartarpoq. Misigissutsit assigiipput, kisianni ataatsimoortarnerit assigiinngillat, biskoppi oqarpoq.

Assersuutigalugu suliffeqarfinni aliasuttoqarsinnaaneranut sinaakkusiisoqarnissaanik ujartuivoq. Ulluni arfineq-pingasuni sulinngiffeqarnermut taarsiullugu sivisunerusumik sulinngiffeqarnissamut paasinnittoqarlunilu akuersaartoqarnerunissaanik.

Tamatuma peqatigisaanik allanik ujartugassaqanngikkaanni illoqarfimmi angisuumi aliasunneq ilungersunarsinnaavoq.

- Ujartuisuunngikkaanni aamma ammasuunngikkaanni kiserliornarnerusinnaavoq. Uanga nunaqarfimmeerpunga, toqusoqarsimatillugu kikkut tamarmik ilisimasarpaat; isertoqartarpoq aamma assersuutigalugu naneruummik pajuttoqartarpoq. Oqaaserpassuit atorneqarneq ajorput, kisianni nerisassiorneq imaluunniit suliassat allat suliarineqartarput, taanna oqaluttuarpoq.

Aliasoqatigiit eqimattat isumaqataaffigigai

Ukiumi kingullermi kajumissutsimik suliaqartut ikiorsiullugit aliasoqatigiinnik pilersitsisoqarnikuuvoq.

Suliniut taanna biskopip nersualaarpaa: -

Aliasoqatigiit pitsaalluinnarput, tassani inuit namminneq annaasaqarsimasut Det Nationale Sorgcenterimit aallartinnissamut ikiorneqarsimapput. Tamakku amerlanerusariaqarput, Paneeraq Siegstad Munk oqarpoq.

Ilagiit naalagaaffimmit akuerisat ikiuussinnaasut neriuutigalugu ilanngullugu oqaatigaa. Palasinulli allaffissornermik suliassat inituallaarnerat unammillernartuuvoq. Minnerunngitsumik oqaluffimmi atuagarsuit allattaavinnik ingerlatsineq, tassani inunngortut toqusullu tamarmik allattorneqartarnerat, palasit annertuumik suliarisarpaat. Taamaammat oqaluffimmi atuagarsuit allattuiffigineqartarnerannut sulisunik atorfinitsitsisoqarsinnaanissaa biskopip kissaatigaa, palasit ilinniarsimasaminnik aliasuttunik oqaloqatiginnissinnaaniassammata.

- Ilagiit akuunerulersinneqassappata palasit allaffimmi sulinerat annikinnerulersittariaqarparput, biskop oqarpoq.

Biskopitut aallartikkamili palasit oqaluffimmiinnerullutik allaffimmiinnginnerunissaa maluginiaqqusimallugu, taanna ilisimatitsivoq. Qinnuiginninnilu Inatsisartunit ilagiinnut aningaasanut inatsimmit aningaasaliinernik aalajangersaasunit tusaaneqassasoq neriuuteqarpoq.

Tamatuma peqatigisaanik palasit aatsaat taama amerlatigipput – 23-it – sinerissami palasiupput, taanna ilisimatitsivoq. Palasit amerlammata ukioq manna siullermeerluni aasamut apersortitsinissaa ilimananngilaq.

Biskopip palasit najukkami inuiaqatigiinni pitsaasumik suliaqartutut nassuiarpai.

- Palasimik amigaateqartoqaraangat sukkasuumik malugisarparput, taamaalilluni pisoqartarpoq; pakatsisoqartarpoq, tamakkulu ajoqinut iliuuseqarfigissallugit ajornakusoorsinnaasarput, taanna nassuiaavoq.

Naak sumiiffinni aalajangersimasuni palasinik amigaateqartoqaraluartoq, provsteqarfiit tamarmik provstimik palaseqarfinnut angalasinnaasumik peqartarput.

Aliasoqatigiit saniatigut biskopip oqarasuaat saaffiginnittarfik Tusaannga erseqqissarpaa.

- Tusaannga qujamasuutigaara. Oqimaatsut oqaloqatigiissutiginissaannut periarfissaqartitsivoq. Toqqissisimasunik sinaakkuteqarluni oqaloqateqarsinnaagaanni, taava misigissutsit ammaffigineqarnerusarput. Tamatumalu kingorna immaqa aliasoqatigiinnut ilannguttoqarsinnaavoq, eqqarsaatit oqimaatsut kisimiilluni atorneqassanngimmata, taanna oqarpoq.

Paquminartoq

Inuppassuit toqu eqqarsaatigissallugu aamma oqaluuserissallugu nuannarineq ajorpaat.

Toqu sammissallugu paqumigineqartorujussuusoq oqaatigine- qarsinnaavoq. Aammalu paqumigiunnaarneqarnissaanut sapinngisatsinnik iliuuseqartariaqarpugut, Paneeraq Siegstad Munk oqarpoq.

- Inuit tamanna alianartittarpaat. Oqartarput: Oqimaanngila? Kisianni inuuneq oqitsuinnaanngilaq. Oqimaatsullu oqaluuserissallugit iluaqutaasarpoq, aamma misigisassat akiornissaanut iluaqutaasarluni, taanna oqarpoq.

- Isumaliortarpugut oqaluuserinagu oqinnerussasoq. Kisianni oqimaatsut oqaasinngortillugit aamma nuannersut oqaasertalerneqarsinnaapput. Nakkaqqasimaguit sumininnguit tunissutinngortut misigisinnaavat, assersuutigalugu seqernup nuinera.

Toqup kinguaariinni nukarliunerusuni paquminarpallaannginnerunera malugalugu paasillugulu biskopip qiimmaallaatigaa.

- Allaanngilaq inuusuttut tamanna oqaasertalissallugu ernumagivallaanngikkaat – inuusuttut sapiipput, Paneeraq Siegstad Munk erseqqissaavoq.

Naalakkersuisut imminut toquttarnerup akiornissaanut periusissiaat eqqaavaa, tassani inuusuttut sunik amigaateqarnerlutik oqaasinnguipput.

- Inuusuttut taama kiserliortiginerat atuarlugu annernarpoq. Soqutigissavavut, ilagiillu tungaannit aamma palasimik ajoqimillu ammarluni oqaloqateqarsinnaanerat takutissavarput, biskop oqarpoq.

Inuunerli inuusuttuunermi kisimi ajornartorsiorfiusanngilaq. Aammali utoqqarnut assersuutigalugu aapparisap sivisuumik aappariinnerup kingorna qimaguppat artornarsinnaavoq.

Utoqqaat naapittaraat

Utoqqaat pisariaqartitsinerat iliuuseqarfiginiarlugu palasit amerlanerusut utoqqaat peqatigiiffiini ataatsimiinnernut orniguttalersimapput, Paneeraq Siegstad Munk ilisimatitsivoq.

Assersuutigalugu ullaakkut naalagiartitsinernut, tamatuma kingorna utoqqaat palasimik kisimiillutik oqaloqatiginninnissamut periarfissinneqartarput, inimi sanianiittumi toqusoqarneranut atatillugu eqqarsaatiminnik oqaasinnguisinnaapput.

- Ukiorpassuarni inooqatigisimasamik annaasaqarnermi eqqarsaatit niaqqumi ingerlaartarput. Taamaammat asasamik inooqateqarsimaneq puigornagu nutaamik inissitsiterisoqartussaavoq, taanna oqarpoq.

Oqaluffik inunnik angerlarsimaffimminnit anisinnaanngitsunik naapitsinissamut qaqutigut periarfissaqartartoq, biskopip nassuerutigaa.

- Neriuppunga Tusaannga atortaraat, taamaalillutik kisimiittutut misigissannginnamik. Sumiiffiit ilaanni palasi ornigussinnaanersoq aperineqartarpoq. Kisianni illoqarfimmi angisuumi Nuummisut ittumi ajornakusuulaarpoq.

Amerlanerpaat qujanartumi qaqugu toqunissarput ilisimasanngilarput. Kisianni ilaannut nappaammik katsorsarneqarsinnaanngitsumik eqqugaasunut ersarissorujussuanngortarpoq. Tassanilu toqunissamut siooraneq ersersinnaasarpoq, Paneeraq Siegstad Munk oqaluttuarpoq.

- Imaassinnaavoq meeraalluta upperisarput toqugutta Guutip qilammi najortuarumaaraatigut. Kisianni ukiuni tallimani kræf- timik napparsimasimagaanni qaammatillu pingasut kingulliit anniarfimmiissimagaanni toqup qanoq ittuuneranik takorluugaq allanngortarpoq, taanna oqarpoq.

Inuit arlaannik pissuteqarlutik oqalussinnaanngitsut nerliiviliaqatiginissaat iluaqutaagajuppoq.

- Takusinnaavarput nerliiviliaqatigiittarneq eqqissisitsisartoq. Ajortinik isumakkeerfiginnittarpoq, aammali qanigisanik neraqateqarneq, immaqa qialluni, oqaaseqarani, tussiutillu nuannarinerpaasat tussiarlugit aamma tuppallersaataasarpoq, biskop oqarpoq