Tørfisk Nuummut
Ileqqorsuutinik nipilersortartut Thyborønimeersut apriilip 1-iani cd-mik nutaamik saqqummersitsissapput. Saqqummersitsineq Kalaallit Nunaanni pissaaq.
Inuit ileqqorsuutaannik nipilersortartut Tørfisk-ikkut 15-issaanik cd-liartik upernaamut saqqummersinniarpaat, taannalu arlalitsigut allatuujussaaq. Ilaatigut nuannarinnittaasa cd-p atissaa toqqassavaat, aamma cd-p ilisaritinneqarnerata saqqummersinneqarnissaalu Kalaallit Nunaanni pisussanngortinneqarpoq, Lemvig Folkeblad allappoq.
- Nuummi Hotel Godthåbimi marloriarluta tusarnaartitsissaagut, tassanilu pisut iluatsillugit cd-p nutaaq ilisaritinniarparput, Bent Bro Tørfisk-ikkunni nipilersoqatigiit sisamaasut ilaat oqarpoq.
CD-mi nutaani normu ataaseq naammassereerpoq, taamalu qilanaartuutissatut nunani tamani radioqarfinnut nassiussuunneqareerluni. Erinarsuut tassaavoq »Alle murene skal rives ned,« - Berlinip qarmarsuata 1989-imi uppitinneqarneranit aallaaveqartoq.
Cd-p nutaap taaguutissaa suli aalajangerneqanngilaq.
- Nittartakkatsinni juullimut unammisitsivugut, tassuunakkut cd-p qanoq taaguuteqarnissaa inuit siunnersuutigisinnaavaat, maannakkullu siunnersuutinik takkuttoqareersimavoq, Bent Bro oqaluttuarpoq.
CD-p taaguutissaatut ilaatigut siunersuutigineqarsimapput »Den torsk, der ikke lukker munden op, bliver ikke fanget,«-imik »Hjemsted: Thyborøn« imaluunniit »NR. 15«