Tungujortunik isillit anisuui qujarutiinnarpaat
Danskiuguit tungujortunillu iseqarlutit taava anisuunik toqqorsiviup Cryos-ip atorsinnaanngilaatit
Imaassinnaavoq akutaasutit, tungujortunik iseqarlutit assullu kusanartutit, anisuunilli toqqorsiviup Cryosip soqutiginngilaa. Tassami atorsinnaanngiaatit, taama aviisi Urban allaaserisaqarpoq.
- Oqaluttuarisaanitsinni aatsaavissuaq angutit 600-t anisuuminnik tunniusserusukkaluarlutik utaqqisuniitsinneqarput. Tassami tungujortunik isillit amigaatiginngilavut. Amigaatigisavummi tassaapput kajortunik isillit inuiaallu danskiunngitsut, taama Cryos Internationalimi pisortaq Ole Schou aviisimut oqaluttuarpoq.
Pisisartutta ilarparujussui Afrika avannnarlermeersuupput Europallu kujataaneersuullutik, taakkulu akunnerminni akuttamik tungujortumillu isilimmik ilaqalernissartik soqutiginngilaat. - Cryos International-ili Europap avannaatungaaniippoq, tamassumalu angutitaasa anisuuinik annerpaamik aallersinnaalluta. Anisuumimmi pisariaqartitsineq nunarsuaq tamarmeersuummat kajortunik isiliutinnguavut ingerlaannaq nungorarneqartarput, taama pisortaq oqaluttuarpoq Danmarkillu avataani danskiunngitsunik anisuunik tunniusserusuttussarsiulernialikkersaalerlutik.
Danskillumi anisuui nunani allani pilerineqaqaat, taama bbc.co.uk. allaaserisaqarpoq. Ukioq 2010-mi arnat nunanit allaneersut 4665-it anisuunik ikkussiffigineqarsimasut Sundhedsstyrelsip kisitsisaatigai, massa arnat 2694-it 2008-mi danskit aniisuuinik ikkussivigineqarsimasut aamma takussaasoq, taama BBC allaaserisaqarsimasoq Urbanimi atuarneqarsinnaavoq.
Danskit anisuuisa pilerineqarnerat peqquteqarpoq, tassami Danmarkimi angutit Europami kisiartapajaajullutik kinaassusertik isertorlugu anisuuminnik tunniussisinnaatitaapput, tunniusserusuttullu naliginnarmik amerlanerunerinik kinguneqarluni.
Anisuumilliuna ikkussivigineqarnissamik akigititaq aamma pilerinermut peqqutaaqataasoq, arnammi nunanit allaneersut meeqqatik ilaniaraangamikkik akilersinnaasarmassuk. Arnaqatiminoortartut arnallu kisermaat pisisartuni amerlanersaajupput, taama BBC naggasiivoq.