Tunniutikkit
Groenlandicamiit taama kajumissaaripput. Atuakkat naqitallu allat suulluunniit atuagaateqrafimmut tunniunneqartussaatitaapput.
– Kikkut tamarmik pisussaaffeqarput saqqummersitanik tamanik immikkoortunik pingasunik tunniussissallutik. Tamatumunnga pissutaavoq kulturikkut kingornussatta attatiinnarnissaat, ilisimanngilarpullu kingulissatsinnut suut soqutiginarnersut, Groenlandicap pisortaa Charlotte D. Andersen oqarpoq.
Taamaattumik suut tamarmik katersaatinut nassiunneqartassapput. Atuagaannaanngitsut, aammattaarli nutaarsiassatut allakkiat, ussassaarutit, peqatigiiffiup aviisii, plakatit qineqqusaarutit, takornarianut quppersakkat ilaallu ilanngullugit.
– Inuit angerlarsimaffimminni peqarunik attatiinnarnissaanik soqutiginaateqarnersoq nalornisaminnik, taava attaveqarfigissavaatigut. Taava naliliisinnaassaagut, inuit imatut eqqarsaratik: Soqutigineqarunanngilaq, Charlotte Andersen oqarpoq nangillunilu:
– Amerlaqisutigut saqqummersitsinerup kingorna aatsaat ukiut 10, 20 imaluunniit 100-t qaangiunneranni soqutiginaateqarnersoq takuneqarsinnaasarpoq. Oqaluttuarisaanermik allaaserinnittartunut ilinniagaqartunullu, aammattaarli Kalaallit Nunaanni inuinnarnut.
Atuakkat aqqi atuakkiortuilu ujarneqarsinnaapput uani www.groenlandica.gl, tassanissaaq tunniussisussaanermut paasissutissiissutit allassimallutik.