Tunumiut Kitaamiullu Brestimi naapittut
Meeqqat Uummannameersut erinarsoqatigiillu Tasiilameersut Brestimi naapeqatigiinnerat Frankrigimi tusagassiuutinit soqutigineqarluarpoq
Frankrigimi nunap immikkoortuini aviisit annerpaartaasa ilaata nittartagaani Ouest-France-imi Uummanneq Meeqqat Angerlarsimaffiat Brestimi imarsiortut festivalernerannut peqataatitaqartoq oqaluttuarpoq. Jean Michel Huctin aviisimut oqaluttuarpoq, erinarsoqatigiit Tasiilameersut meeqqanik Uummannameersunik erinarsoqateqarnerat kiisalu Tunumiut Kitaamiullu Frankrigimi Brestimi naapeqatigiittarnerat qaqutigoortuusoq.
Meeqqat Frankrigimi Bretagnemi piorsarsimassutsimik paasisassarsiuutigalutik inuit piorsarsimassusaannik takutitsisinnaanertik tulluusimaarutigaat.
Brestimi festivalertoqarnerani meeqqat angerlarsimaffianneersut Arctic Villagemik taasami peqataapput.
Nunatsinni aalisartut piniartullu silap pissusaata allanngoriartornerata kinguneranik unammilligassarilersimasaat tamatumalu inuit piorsarsimassusaannut aarlerinartorsiortitsisunngorsimanera Jean Michel Huctinip Frankrigimi aviisimi oqaluttuaraa. Aviisimi tassani Ole Jørgen Hammeken oqarpoq, inuit piorsarsimassusaata aarlerinartorsiortitaasup meeqqanut kinguaariinnullu tulliuttunut piujuaannartinnissaata qulakkeerneqarnissaa pisariaqartoq.
Aamma atuaruk Meeqqat 12't Frankrigimi festivaleqataasut
Brestimi festivali juulip 13-ianiit 20-anut ingerlanneqartoq iluatsilluarpoq takuniaasut 600.000-it missaanniimmata angallatillu assigiinngitsut 3.000-it missaannillutik. Ingerlaaqatigiinnersuaq Jean-Michel Huctin SermitsiaqAG-mut oqaluttuarpoq.
Meeqqat nunatsinneersut takutitsinerni assigiinngitsuni inunnit tuusintinit arlalinnit isiginnaarneqartuni erinarsorlutillu qitipput. Qaannanik umiamillu kiisalu tissiartaatinik angallatinillu motoorilinnik angalapput. Franskinik meeqqanik inuusuttuaqqanillu ilisarisimasaqalernertik meeqqat nunatsinneersut aamma nuannaarutigaat.