Tupilannik eqqumiitsuliat

Saqqummersitsineq eqqumiitsuliortut arlalippassuit suliaannik takutitsiffiussooq. Eqqumiitsuliortut tamarmik immikkut tupilaap qanoq isikkoqarneranik sammisaqarput; Anne-Birthe Hovep (1951-2012) suliai ilusilersuinerit nutaajunerusut, Mike Kristiansenip suliarisimasai (in. 1971) graffitilioriaatsinit isumassarsiarisimasai, aammalu Martin Brandt Hansenip (in. 1990) marrarmik tupilaliai nutaaliaasut. Eqqumiitsuliortuullunilu animatoriusup Maria Kreutzmann-ip saqqummersitsiviup tupilannik katersugaatai aamma nutaaliaasumik takusassiarissuai.

Pileqqaarnerani tupilak tassaasimavoq anersaapiluk, akeqqamut ajortumeerisussanngorlugu aallartinneqartartoq. Europamiut Kalaallit Nunaannut tikittaleramik tupilak takorusuttarsimavaat, taamaattumillu kalaallit tupilak assilillugu qiperuisalerput. Qiperukkat tamakkua taamanili tammajuitsussatut nuannarineqalerput, ullumikkullu oqaaseq tupilak atorneqaraangat taakku pineqartarput.

Tupilaap isumaa ukiuni 100-ni kingullerni malunnartumik allanngorsimavoq. Saqqummersitsinermi takutikkusupparput kalaallit eqqumiitsuliortut nutaajunerusut tupilannik nutaarluinnarmik samminnittarnerat. Tamarmik apeqqummut uunga akissutisinissamut oqariartuuteqarput: Ukioq 2018-imi tupilak sunaava?

Meeqqanut GU-milu atuartunut ilinniartitsissutit saqqummersitsinermut ilaapput. Suliassat ilagaat saqqummersitsiviup tupilaatai inuttaralugit atuartut namminneq filmiliortinneqarnissaat.

Saqqummersitsineq qaammatini pingasungajanni sivisussuseqassaaq, piffissallu taassuma iluani saqqummersitsinermut tunngasunik aaqqissuussisoqartarumaarluni.

Saqqummersitsineq 2019-imi martsip 17-iata tungaanut saqqummersinneqassaaq.

Eqqumiitsuliortut: Anne-Birthe Hove (1951-2012), Coco Apunnguaq Lynge, Gukki Nuka Willsen Møller (in. 1965), Jakob Maqe Nielsen (in. 1982), Jessie Kleemann (in. 1959), Johan Markussen (1906-1994), Jonatan Brüsch, Kârale Andreassen (1890-1934), Maria Kreutzmann, Martin Brandt Hansen (in. 1990), Mike Kristiansen (in. 1971), Pia Arke (1958-2007), Rikke Diemer.