Twice Colonized Canadami Oscarinnappoq
Kalaallit piviusulersaarusiaat Twice Colonized Canadami Screen Awardsimi piviusulersaarusiaq pitsaanerpaatut toqqarneqarpoq, tamannalu filmiliortut inuttaatalu Aaju Peterip nuannaarutigaat. Piviusulersaarusiaq marlunnik nersornaaserneqarpoq.
Filmimik ilitsersuisoq Lin Alluna Aaju Peterimut qujavoq inuunerminik oqaluttuarneranillu filmiliami oqaluttuarinnittuarneranut.
Foto: George Pimentel Photography
Canadami Torontomi sapaatip-akunnerani kingullermi ulluni arlalinni nersornaasiineq Canadami Filminstitutimit aaqqissuunneqartoq Oscarimik nersornaasiinernut assinguvoq.
Piviusulersaarut "Twice Colonized", inuit pisinnaatitaaffiinik illersuisoq Aaju Peter pillugu Canadalu suleqatigalugit suliarineqartoq, marlunnik nersornaaserneqarnissamut innersuunneqarpoq — tassa piviusulersaarummi filmiliarineqartumi pitsaanerpaatut aamma piviusulersaarummi filmiliarineqartumi nipilersukkami pitsaanerpaatut.
Twice Colonized nersornaaserluarneqartoq
"Twice Colonized" ajugaalluarpoq, aamma filmiliortut pikkorissut piviusulersaarummik killitsinnartumik paasisaqarnartumillu sanasimasut nersorneqarput, Anorak Film tusagassiuutinut nalunaarummi allappoq.
Unnuk assuarfiusoq Canadami nuna tamakkerlugu TV-kkut aallakaatinneqarmat "Twice Colonized" nersornaat tigusussanngorlugu qummukaqquneqarpoq.
- Ilitsersuisoq Lin Alluna siullermik qujalluni oqalugiarami Aaju Peter inuunerminik oqaluttuassartaminik avitseqatiginnissimaneranut qujaniarluni oqaaseqarpoq. Allallu periarfississimalluni Aaju Peter ilinniarfiginissaanut.
Aaju Peter attortisimasoq
Aaju Peter attortisimaqaluni piviusulersaarummik pilersitsisimasut qutsavigai:
- Taamatut oqaluttuassartaasoq oqaluttuarigaanni aamma tusaarneqartarput. Inuppassuupput tusarnaarusupput, unalu piviusulersaarusiaq aqqutigalugu inuppassuit attornissaanut periarfissaqarsimavugut - Inuiinnaanngitsut, aamma nunarsuarmiut. Tamanna qujamasuutigeqaara.
Piviusulersaarusiaq Twice Colonized Inuit Pisinnaatitaafii Pillugit Siunnersuisoqatigiit suleqatigalugit nunatta sineriaanut angallanneqassasoq, Anorak Film paasissutissiivoq.
