Uaajeernerup kalaallit kulturiat paasissutissiaraa

Josepha Lauth Thomsen 36-nik ukiulik kalaallimik anaanaqarluni qallunaamillu ataataqarluni, Kalaallit Nunaat pillugu oqaluttuarnermut inuunini atorpaa.

Josepha Maniitsumi inunngorpoq. Nuummi meeraavoq tassanilu GU-mi soraarummeerpoq. RUC Roskilde Universitetimi psykologimi misigisassarsiornikkullu attaveqaqatigiinnermi kandidatiuvoq. Sulinikkut Kalaallit Nunaannut tunngasut assigiinngitsorpassuit Josephap misilittarsimavai. Ilulissani takornariartitsisartutut. Islandimi najugaqarluni Kalaallit Nunaannut angalanernik tuniniaasartutut. Siorna juunimiilli NGO-mut attuumassuteqanngitsumi NUKIGA-mi, kulturikkut inuunermik aallarnisaanermullu avatangiisinik siuarsaasumik, aammalu naalagaaffeqatigiinnermi oqaluttuanik nuannersunik siammarterisumik, Kalaallit Nunaannik immikkut sammivilimmik, nutaaliorsinnaanermut pisortaavoq.

Soqutigilluinnakkamik suliaqarsinaanini immikkut pisinnaatitaaffiusoq, soorunami Josephap nalunngilaa.

Uaajeerneq

2015-imi Odensemi Nordatlantisk Husimi isiginnaartitsisartoq Vivi Sørensen uaajeernermik ilinniartitsimmat Josephap peqataaffigisimavaa. Josephap nuannarilluinnarpaa, taamanikkullilu uaajeerneq samminerujartuinnarpaa.

- Suliara tulluusimaarutigeqaara. Kalaaliunera tulluusimaarutigeqaara. Naak kalaaliugaluarlunga qallunaajugaluarlungalu, ukiorpassuit qaangiummata kalaaliunerullunga paasivara, qularnanngitsumillu uaajeerneq tamatuminnga paasinninnissamut pissutaaqataangaatsiarpoq, Josepha pissanganartumik oqaloqatigiinnermi oqaluttuarpoq.

- Kalaaliuneq pillugu isiginnittaaseq isummallu allanngortissinnaassallugit neriuutigeqaara. Kakiortinnikka tulluusimaarutigeqisakka atortarpakka. Kalaaliuninnut kusanartumik ersiutaalluartarput.

Josepha tanissimatilluni isiginnaartunullu amerlasuunut amerlanngitsunulluunniit isiginnaartitsitilluni inuttut allaanerulluinnartarpoq, immaqalu ersinalaartarluni. Ingammik immaqa meeraalluni, aammali inersimasut tupassinnaasarput, inuttut nalinginnaasumik ilorrisimaarfipput Josephap qaangerluinnaraangagu. Josephami qanillivittarpoq. Qanilliiveqqissaarluni.

- Isiginnaartitsininni inuit taama qanitsigigaangakkit qanoq qisuariassanersut takullugu pissanganartuaannarpoq.

- Meeqqanut isiginnaartitsigaangama isiginnaartillugit tanittarpunga, ersivallaannginnerussammata.

Ilulissani aallartittoq

- 2014-imi Ilulissaniitillunga uaajeernermik qilaatersornermillu ilisimasalinnik ujaarlerpunga. Nassaassaqarpallaanngilaq, taamaattumik eqqarsarpunga nammineq iliuuseqartariaqarlunga, Josepha oqaluttuani nangippaa.

- Qilaatersorsinnaanngilanga. Sapernarpallaarpoq. Amerlasuut namminneq taalliortarput. Uaajeerneq uannut ajornannginneruvoq. Kalaallit qallunaallu aaqqissuussaannut akuttunngitsumik isiginnaartitsisarpunga, kalaallillu kulturiannik oqaluuserinninnissamut uaajeerneq aallarniutissatsialaasoq paasinikuuara.

Ukiut 50-it sinnerlugit matuma siorna Jyllandip kitaani Fjaltringimi Tuukkaq Teatret-imi uaajeertoqartalersimanngikkaluarpat immaqa peerulluinnarsimassagaluartoq Josepha isumaqarpoq, Tunumilu assitoqqani filmitoqqanilu kisimi takuneqarsinnaasimassagaluarluni.

- Uaajeernermi puigorneqarsimavoq, Josepha naggasiivoq.

Josepha Lauth Thomsenip arnaa Tunumi Kulusummeernera eqqarsaatigalugu, kalaallisut kinaassutsini takutinniarlugu uaajeernermik kakiortinnermillu atuisarnera immaqa pissusissamisuuginnarpoq.