Ukioq manna Nunat Avannarliit Siunnersuisoqatigiiffianni uku nersornaaserneqarput
Kalaallit Nunaat arlalinnik innersuunneqaraluarluni, ukioq manna Nunat Avannarliit Siunnersuisoqatigiiffianni nersornaaserneqanngilaq.
Marlunngornermi Nunat Avannarliit Siunnersuisoqatigiiffianni nersornaasiisoqarnerani eqqumiitsuliortut kulturimillu suliaqartut Oslomi Operami nalliuttorsiutigineqarput.
Kalaallit eqqumiitsuliortut, aallarnisaasut, atuakkiortullu Nunat Avannarliit Siunnersuisoqatigiiffiannut nersornaammut innersuunneqartorpassuit ilagaat.
Nersornaatisisut tallimat ukuupput:
Nunat Avannarliit Filmliornermut nersornaasiuttagaa 2023 danskit filmiliaannut ”Viften”-imut, ilitsersuisumut Frederikke Aspöckimut aamma manuskriptimik allatuanut Anna Neye kiisalu immiussisuinut Pernille Munk Skydsgaard, Nina Leidersdorff aamma Meta Louise Foldager Sørensen tunniunneqarpoq.
Taakku filmiliamut eqqarsaatigilluakkami ajugaapput, Nunat Avannarliit Siunnersuisoqatigiiffiat ilaatigut allappoq.
Nunat Avannarliit nipilersornermut nersornaasiuttagaat 2023 nipilersortartumut, erinarsortartumut taalliortumullu Maija Kauhanenimut Finlandimeersumut tunniunneqarpoq. Kauhanen nipilersortartuuvoq tamatigoortoq, piffissallu sivikitsup iluani nunani tamalaani ilisimaneqalersimavoq, Nunat Avannarliit Siunnersuisoqatigiiffiat allappoq.
Avatangiisinut nersornaat 2023 Renewcellimut Sverigimeersumut tunniunneqarpoq. Taakku atisanut nutaanut tekstilinik atueqqittarneq nersornaatisissutigaat.
Nunat Avannarliit Siunnersuisoqatigiiffiata meeqqanut inuusuttunullu atuakkiortumut nersornaasiuttagaa 2023 Eldgosimut Rán Flygenringimi Islandimeersumut tunniunneqarpoq. Flygenringip atuakkiaminut assiliartaqarluartumut, pinngortitap aqunneqarsinnaanngitsup inuk qanoq sunnertarneraa sammivaa..
Nunat Avannarliit Siunnersuisoqatigiiffiata atuakkiortumut 2023 nersornaasiuttagaa Sverigemi atuakkiortumut, Joanna Rubin Drangerimut, tunniunneqarpoq.