Ullukinnerup sulinngiffiunissaanut periarfissat Naalakkersuisut misissorpaat
Ullukinnerup sulinngiffiunissaanut periarfissat Naalakkersuisut qulaajarpaat, paragraf 37 naapertorlugu Kristian Jeremiassenip apeqqutaanut naalakkersuisoq ilisimatitsivoq.
Ullukinneq sulinngiffiussaaq. Kristian Jeremiassenip IA-mit Inatsisartunut ilaasortap, allat arlaqartut assigalugit sivisuumik kissaatigaa.
Kingullermik paragraf 37 naapertorlugu Naalakkersuisunut apeqqummi, Jerimiassenip kissaataanut piviusunngortitsisinnaasumik Naalakkersuisut siunnersuuteqarnissamut eqqarsaateqarnersut tassani apeqqutigaa: tassa ullukinneq nalliuttunngortinneqassanersoq.
Kisianni tamanna pisariaqanngilaq, Peter Olsen, ilinniartitaanermut, kultureqarnermut, timersornermut ilageeqarnermullu naalakkersuisoq taama isumaqarpoq.
Tassami Naalakkersuisut ullukinnerup sulinngiffiunissaanut periarfissat qulaajarlugit maanna suliaqarmata, taanna ilisimatitsivoq.
Kingunerinik qulaajaaneq
Tussiarfissuaq Danmarkimi atorunnaarsinneqartussanngortoq, nunatsinni ulluinnanngortillugu Ullukinnermik taarserneqassasoq, Kristian Jeremiassen isumaqarpoq.
Kisianni taanna aaqqiissut attuumassuteqanngilaq. Tassami danskit naalakkersuisuisa tussiarfissuup atorunnaarsinneqarnissaanik siunnersuutaat Kalaallit Nunaanni imaluunniit Savalimmiuni atuutinngilaq.
Ullukinneq nalliuttunngortinneqassappat, naalakkersuisup oqarnera naapertorlugu, aningaasaqarnikkut allaffissornikkullu kinguneri – minnerunngitsumillu inatsisit qulaajarneqarnissaannik pisariaqartitsivoq.