Uumasut nakorsaasa internet atorlugu nakorsiussisinnaaneq misissorpaat
Nunatsinni uumasut nakorsassaaleqineq attanneqaannarsinnaanngilaq. Aalisarnermut piniarnermullu naalakkersuisoqarfiup nunatsinni uumasut assigiimmik nakorsiarsinnaanermut periarfissaannik misissuipput.
Nunatsinni uumasut nakorsaannik amigaateqarneq attanneqarsinnaanngilaq. Kalaallit Nunaanni uumasunut nakorsaqarnermut inuussutissalerinermilu oqartussaqarfik aamma aalisarnermut piniarnermullu naalakkersuisoqarfik taama isumaqarput.
Nunatsinni uumasut nakorsiarsinnaanermut assigiimmik periarfissaqartinniarlugit maanna misissuisoqarpoq.
Namminersorlutik Oqartussat tusagassiorfinnut taama nalunaaruteqarput.
- Uatsinnit innuttaasunillu isigalugit pissutsit attanneqarsinnaanngillat . Telemedicin tunngavigalugu aaqqiissutissamik suliaqarpugut, Uumasunut nakorsaaneq Egill Steingrimsson oqarpoq.
- Uumasuutillit siunissami ungasinnerusumi video atorlugu uumasunut nakorsamik attaveqartalernissaat nappaatinillu suussusersisarnissaat anguniagaraarput. Taamaattoqassappalli arlalinnik suleqatigiittoqartariaqarpoq, soorlu nakorsaatinik siammarterineq eqqarsaatigalugu peqqinnissaqarfimmi, taanna oqarpoq.
Ineriartortinnissaa sivisussaaq
Sermitsiaq.AG-p 2021 naalernerani oqaluttuaraa Ilulissani uumasut nakorsaqanngitsoq. Tamanna sumiiffimmi eqqaanilu qimmiutilinnut ajornartorsiortitsivoq, qimmimmi qimuttut napparsimalerunik nakorsaatissaminnik tunineqariaannaanngillat.
Uumasunut nakorsaaneq ilisimatitsivoq telemedicinip atuutsilernissaanut sulineq sivisusinnaasoq.
- Misissulerparput aamma siunissami aaqqiisoqarsinnaassasoq neriuutigaarput. Kisianni tassa suliassaqarfik taanna qitiutissavarput, Egill Steingrimsson oqarpoq.
Taanna ilisimatitsivoq piffissaq kingulleq Nuummi illoqarfinnilu allani, soorlu Ilulissani aamma Qaqortumi uumasut nakorsaat uumasunik passussisartut amigaataasimasut.
Namminersorlutik Oqartussani uumasut nakorsaattut atorfillit maanna tallimaapput, atorfiit arfiniliusarput. Atorfiit tamarmik Kalaallit Nunaanni uumasunut nakorsaqarfimiipput inuussutissalerinermilu oqartussaqarfianniipput.