fra Qaqortoq
Video: Efterskolertoq Itunesimi nuannarisaasoq
Nikolaj Lønstrup Qaqortumeersoq Itunesimi EPmik nuusiaminik saqqummersitsinermini nuannarineqarluarpoq
16-nik ukiulik Nikolaj Lønstrup Qaqortumeersoq nipilersukkani pillugit nuannarineqarlualerpoq. Vejenimi Askov Efterskolemi atuarpoq tassanilu nipilersuusiaminik misileraanissamut periarfissaqarluarpoq.
Nikolaj Lønstrupip EP-mik nuusiani novemberip aappaani saqqummersippaa sapaatip akunneratalu ataatsip ingerlanerani Itunesimi nuannarineqartut allattorsimaffianni normu 17 angullugu, Dagens.dk allappoq.
Askov Efterskole nipilersornermut atortunik pitsaasunik pissarsisimavoq atuartut ilisimasaqarluartunit siunnersorneqarlutik atorsinnaasaannik.
- Erinarsuutit uannut tunngasuupput. Misigisannut tunngasorujussuupput ilaallu sivisuumik pinngoriartorsimaapput. Qangali erinarsuusiortarpunga maannalu allanit tusaaneqarsinnaalerput, Nikolaj Lønstrup Dagens.dk-mut oqarpoq.
Askov Efterskole nipilersornermut atortorissaaruteqarpoq atuartut ilitsersuisoqarluarlutik atorsinnaasaannik.
- Inuusuttut tamarmik efterskole misilittariaqarpaat. Uanga nuannersorpassuarnik misigisaqarpunga aammalu soqutigisanik aallusserusunneq paasilluarneqartarluni. Nunatsinni nipilersornissaq pissanganarpoq kisianni allanik aamma misilitaqarusuppunga inuttut nipilersortartutullu, Nikolaj Lønstrup oqarpoq.
Erinarsuut 'Illit pillutit' allaaserisap qulaani tusaallugulu takusinnaavat