video
Vikingit umiarsuaat Skjoldungen Nanortalimmit aallarpoq
Skjoldungenip qallunaatsiatoqqat Qallunatsiaqarfik Kujallermit Nuup eqqaani Qallunaatsiaqarfik Avannarlermut angalasarfitoqaat atuassavaa.
Silageqaaq seqinnarilluni kitaanillu anoraanngualaaginnarluni qallunaatsiaat kajumissutsiminnik peqataasut, umiarsuup naalagaanit Ole Sandimit siuttuuffigineqartut, ippassaq Nanortalimmit Nuummut ingerlaassallutik aallarmata.
Skoldungenip inuttassai ullualunnguit matuma siornatigut Nanortalimmut tikipput, umiarsuarlu illoqarfimmi tassan umiarsualivimmi containeriniippoq utaqqilluni. Aallannginneranni arfininngormat Skjoldungen Nanortalimmiunut tamanut ammavoq.
Angalanermi qallunaatsiatoqqat angalasarfiat 560 sømilinik isorartussusilik angalaffigissavaat, tassa Nanortalimmit, Qallunaatsiaqarfiup Kujalliup eqqannguaniit, kangerluit aqqusaartorlugit nunap iluatigooriarlutik imaannarmut avalariarlutik Nuup eqqaani Qallunaatsiaqarfik Avannarlermut ingerlaassallutik.
Taamaasiornikkut nutaamik qulaajarniarneqarpoq qallunaatsiaqarfinni marlunni qallunaatsiaat qanoq imminnut attaveqarfigisarsimanersut.
Skjoldungen sananeqarsimavoq vikingit umiarsuaat Roskilde Fjordimeersoq, Skuldelev 6, tassa aalisariut Norgep kitaaneersoq 1030 missaaneersoq, assilillugu. Sulinummik ingerlatsisuuvoq Roskildemi Vingeskibsmuseet.
Pilersaaerut malillugu Skjoldungen Nuummut tikissaaq aggustip qiteqqunnerani.