X-factor Lina Nuummi

Timersortarfissuarmi Inussivimmi tallimanngornermi unnukkut koncerternissaarsuaqarnissaanut piareersarput, tassani popinik nipilersortartut Infernal Danmarkimeersut koncertissagamik. Nipilersortartut sisamanngornermi ullaakkut Nuummi mittarfimmut mipput, silagissuup ataani. Kisianni nipilersortartut ilimasuuteqarpallaarnaveersaarput.

– Atortut suut Kalaallit Nunaannut nassassanerlutigit Kalaallit Nunaannilu sunik atortoqarnersut assut nalornissutigisimavarput. Ilimasuuteqarpallaarnaveersaarsimavugut eqqarsarluta: Qanorluunniit atortoqassagaluarutta inuit sapinngisannguatsinnik aliikkusersorniassavagut. Taamaattumik qilanaarpugut, nuannisarnissarpullu upperalugu, Lina Ranf sermitsiaq.glimut oqarpoq.

– Silagissuullu ataani tikikkatta tupinnaannarpoq, taamaalilluta aamma Kalaallit Nunaata alutornarnerpaaffiani takugatsigu, Lina Ranf oqarpoq.

Nipilersortartut ilaatigut Skanderborg Festivalimi aasaq nipilersorput, tassanilu qitimmik scenemilu takutitsinerit ingasavipput.

– Nuummi Qaqortumilu isiginnaartussat naatsorsuutigisinnaavaat pisoqaatitta ilaannik nutaaliarpassuatsinnillu atuisarumaartugut. Aamma atikkersuutinik pissusilersuutitigullu sapinngisarput tamaat iliuuseqarniassaagut. Nuannerunaqaaq, Lina Ranf oqarpoq.

MTVmut innersuunneqartut

Infernalikkunni sallersaapput Lina Ranf – DRip nipilersornermik unammisitsinerani X-factorimi dommerinut ilaatut ilisimaneqartoq – aamma Paw Lagermann. CD-liaat kingulleq »Electric Cabaret« saqqummerneraniit sapaatip akunneri siulliit marluk ingerlaneranni 15.000-inngorlugu tunineqarsimavoq. Maannakkut oktobarip 3-ani Qaqortumilu oktobarip 4-ni nipilersorsuaarniarput.

– Atortutta affaannaalluunniit nassarsinnaagaangatsigit appisimaarsuarsinnaasarpugut. Taamaattumik qajassuunnagu appisimaarsinnaassaagut, Paw Lagermann sermitsiaq.gl-imut oqarpoq.

Infernal aatsaavissuaq tusarnaartitsissapput. Lina Ranf arfineq marlunnik ukioqarluni Canadamut ingerlaartillutik Kangerlussuaq aqqusaarsimavaat, tassanilu timmisartumut ikeqqitsinnatik ippernarpassuit misigisaqarfigisimavai. Taamaattumik angalaneq una Kalallit Nunaannut tikeraarniviit Linamut Pawimullu siullersaavoq.

– Kalaallit Nunaanni tusarnaartartut ilisimasaqarfigerpianngilagut. Ålborgimi nipilersornermut ilinniarfimmi ilinniarsimavunga, kalaallit marluk nipilersornermut pikkoriulluinnartut ilagisimavakka. Taamaattumik nipilersortartunik pikkorissunik peqartusi nalunngilarput. Kisianni oqarnitsituut ilimasuuteqarpallaarnaveersaarpugut. Danmarkimi nipilersortartoqatitsinnit nalunngisatuarsuarput tassaavoq, tamaani tusarnaartitsilluni nuannersuusoq. Taamaattumik qilanaarpugut, Lina Ranf oqarpoq.

Infernal MTV Music Awards-imi unammissummi Danish Act-imi novembarimi pisussami akissarsisussatut innersuunneqarsimapput.

– Ajugaanissarput upperinngivippara, Lina Ranf illarpoq.

– Uangattaaq upperivallaanngilara, Paw Lagermann tapersiivoq.

Maanna Kalaallit Nunaanni sila ajunngissappat pinngortitap misiginissaanut qilanaarput.

– Aalisakkanik Danmarkimi pisarisartakkanit anginernik pisaqartoqarsinnaasoq tusarsimavara. Silap periarfississaneraatigut takussavarput, Lina Ranf oqarpoq.

– Managererput ukiualuit matuma siornagut maaniissimavoq, sermersuarmit sermiminermik peersisimariarluni whiskymut iluarusuutigisimavaa. Taamaalerusunnaraluarpoq, Paw Lagermann oqarpoq, Lina Ranf saniani illariarujussuartoq.

Infernal Nuummi tallimanngornermi tusarnaartitseriarlutik Qaqortumut ingerlaqqissapput. Nipilersortartut Danmarkimut pingasunngornermi utissapput.

Infernalit aggutsip 11-iani cd-liaminnik kingullermik »Electric Cabaret«-mik – ukiunut disco-leriffinnut nersorinninniutaasumik - saqqummersitsisut kalaallit nunaanni scenemi aatsaavissuaq tusarnaartitsissapput. Nipilersortartut taakku tusarnaartitsitillutik sukataartarnertik ilisimaneqaatigaat, scenemi qitimmik isiginnaartitsisarneq tusarnaartitsinerup ilaatut pingaarutilittut ilaasarluni.