KL

DK

Kuno Fencker: Aqutserusunneq arlalinngorlugu paasineqarsinnaavoq

Hanna Hviid
usha vance gæster grønland

Naalakkersuisuugallartut amerikamiut aallartitaat, Nuummut Sisimiunullu sapaatip-akunnerani matumani tikeraartussaraluit tikilluaqqusariaqaraluaraat, Naleraq sinnerlugu Inatsisartunut qinigaaqqammersup Kuno Fenckerip kissaatigigaluarpaa.

- Isumaqarpunga nunat akunnerminni suleqatigiittarnerat tunngavigalugu tikeraartussanut suminngaanneersunulluunniit tikilluaqqusiuartariaqartugut suleqateqartariaqartugullu. Ingammik iligisatsinni annerpaamit, sakkutooqarnikkut pissaaneqarnerpaamit, kiisalu aningaasaqarnikkut nunarsuarmi pissaaneqarnerpaamit aggerfeqarpata, Kuno Fencker Sermitsiamut taama oqarpoq.

Nunarput aqutarilerusullugu Donald Trumpip arlaleriarluni oqaatiginikuuaa. Taama oqarnera immikkut ilisimasallit arlaliusut tiguaanialikkersaarnertut nalilerpaat. Ernumasariaqanngitsugulli Kuno Fenckerip oqaatigaa.

- Aqutserusunneq arlalinngorlugu paasineqarsinnaavoq. Nunap aqunneqarnissaanik, isumannaallisarneqarnissaanik nakkutigineqarnissaanillu isumaqarpat, aamma USA-p nunatut sillimanissaanut attuumassuteqarpat, oqaatsit atorneqartut eqqoriaannarnagit nunatsinni siuttut oqaloqatiginnittariaqaraluartut isumaqarpunga.

- Oqaatigineqartut ilaat soorunami ernumanarsinnaapput, kisianni isumaqarpunga assiliaq anginerusoq isiginiartariaqaripput, Kuno Fencker taama oqarpoq.

Tiguaaniarnertut nalilerusunngilat?

- Naamik, taama nalilinngilara. Kalaallit Nunaammi Danmarkimiit 1953-imiilli tiguagaareernikuuvoq.

- Oqaatigineqartut ilaat soorunami ernumanarsinnaapput, kisianni isumaqarpunga assiliaq anginerusoq isiginiartariaqaripput, Kuno Fencker taama oqarpoq.

Imarisassat attuumassuteqartut

  • Demokraatit Ilulissani ajugaapput

    Kassaaluk Kristensen aamma Hanna Hviid

    Demokraatit qinersisunit 44,9 procentinit taaneqarlutik Ilulissani ajugaapput. Qinersinermit kingullermit 27,5 procentpointinit taaneqarnerupput.

    Siumut qinersisartunit taaneqarnerit tulliattut inissipput, 27,8 procentinit taaneqarlutik.

    Ilulissani qinersisartut 58 procentii taasiartorsimapput.

    Demokraatinit Heidi Møller taaneqarnerpaasimavoq, 570-init taaneqarluni.

  • Martha Abelsen Kommuneqarfik Sermersuumi ajugaavoq

    Kassaaluk Kristensen aamma Hanna Hviid

    Siumumi borgmesterissatut sassartinneqartoq Martha Abelsen Kommuneqarfik Sermersuumi qinerneqarnerpaavoq, 710-nik qinerneqarsimalluni.

    Borgmesteriugallartoq Avaaraq Olsen 678-inik taaneqarsimavoq.

    IA aamma Siumut kommunalbestyrelsemi tamarmik arfineq-marlunnik issiatitaqalissapput. Tamanna isumaqarpoq kommunalbestyrelsemi suleqatigiinnissamut marluullutik isumaqatiginninniarnernik aallartitaqarsinnaapput.

    Demokraatinit Poul Petersen 535-init taaneqarpoq, Siumumiillu Egon Petersen 379-init taaneqarluni.

    - Oqaloqatiginninnissamut qaaqquneqareerpugut. Oqaloqatigiinnerillu aqagu aallartissapput, Martha Abelsen KNR-imut oqarpoq.

  • IA-p siulittaasua: Suliassaqarpugut

    Kassaaluk Kristensen aamma Jensine Berthelsen

    Inuit Ataqatigiit sumiiffiit ilaanni qinersisartunit taanikinnerupput. Inatsisartunut qinersinermi IA kinguariarujussuarsimasoq, aamma kommunalbestyrelsenut qinersinerni sumiiffiit ilaanni kinguariarfeqarpoq.

    Tamanna pissutigalugu IA anguniakkanik suliassaqartoq, taamatullu qinersisartunut peqataatitsinerunermik aallussisariaqartoq, IA-p siulittaasua naliliivoq:

    - Maannamut soorunami kisitsisit takutinnaasatsinni sumiiffiit ilaanni kinguariartutut inissisimavugut. Suliassaqarpugut IA-mi. Qinersinerit tulliinut ingerlateqqitassatsinni. Inatsisartuni aamma taama inissisimavugut. Taamaattorli anersaaq taanna pigalugu ilungersoqqissuugut, aamma takusinnaagatsigu kingullermik kinguariarfiusutut inissisimaffigisatsinni aamma inissisimagatta, sumiiffiit aamma ataasiakkaat isigissagaanni.

    Akisussaaffimmilli tigumminnissimaneq aamma partiimut akisusinnaasoq, siulittaasup oqaatigaa:

    - Soorunami ilungersorsimanerit assigiinngitsullu nalilersuutigineqarsinnaasut arlariissoraakka. Aamma qinersisartunut qanilaarneq killilik aamma peqataatitsineq killilik, ima paasillugu suliat killiffiinik ilisimatitsisarnermut tunngasinnaasut. Kisianni takusinnaavarput aamma nunat tamalaat akornanni, partiit akisussaaffimmik tigummiartut kinguarialaartartut. Aamma tamanna nunatsinni pisutut takuneqarsinnaalluni. Tassa partiit akisussaaffimmik tigummiarsimasut kinguariarsimasut. Taamaattorli tamanna uniffiginagu suliagut nangissavagut, Múte B. Egede oqarpoq.

  • IA Nuummi ajugaavoq, Siumulli sinnerlugu qineqqusaartoq amerlanernik qinerneqarpoq

    Hanna Hviid

    Inuit Ataqatigiit Nuummi 2502-nik qinerneqarpoq, tassa qinersisinnaasut 40,6 procentinit taaguunneqarluni.

    11,1 procentpointinik kinguariarput.

    Siumut tullertut inissilluni 1476-init qinerneqarpoq. Martha Abelsen Siumumeersoq qinerneqarnerpaalluni 675-inik taaneqarsimavoq.

    Borgmesteriungallartoq Avaaraq Olsen (IA) 665-init qinerneqarpoq.

  • Kommuneqarfik Sermersuumi IA siuttuuvoq

    Hanna Hviid

    Kommuneqarfik Sermersuumi qinersinernit kisitsisit 98 procentii kisinneqareersullu paasinarsivoq IA ajugaasoq. Qinersinernit 35 procentiusunit taaneqarsimapput.

    Tassa kommunalbestyrelsemi arfineq-marlunnik issiatitaqarsinnaassallutik.

    Siumut 31,3 procentinit taaneqarsimapput, aamma arfineq-marlunnik issiatitaqassallutik.

    Demokraatit sisamanik aamma Naleraq ataatsimik ilaasortaatitaqalertussatut inissisimapput.

  • Vivian Motzfeldt: Angusat neriuummik tunisipput

    Kassaaluk Kristensen aamma Jensine Berthelsen

    Siumumi Nuummi qinersisartut unnussiuaarneranni nuannattoqarpoq.

    Illoqarfiit ilaanni qinersinermit kisitsisit paasineqallattaatillugit ilaanni nuannattoqartarpoq, assaallu pattaanneqartarlutik.

    Kisitsisit takutippaat Kommuneqarfik Sermersuumi Paamiuni aamma Tasiilami Siumut taaneqarnerpaasimasoq. Tamanna Vivian Motzfeldtip nuannaarutigaa:

    - Innuttaasut tamat oqartussaaqataaneranni kommunini nalilersuinerit aamma allaanerupput. Nunat immikkoortuani annertoorujussuarmik inuit ataasiakkaat sumiiffinni sunniuteqarluarsimasut ingerlalluarput. Tamanna neriuummik annertuumik pilersitsivoq, Vivian Motzfeldt oqarpoq.

    - Neriuummik tunisivoq, aamma qineqqusaarnermi sassartitagut ersarissumik qineqqusaarsimapput. Aamma neriuppugut Martha Abelsen taaneqarluassasoq.

    Nuummi Siumut unnussiuaarfiat.

  • Malik Berthelsen Maniitsumi taaneqarpiannginnini pillugu tupaallanngilaq

    Tôrtia Reimer-Johansen

    Qeqqata Kommuniani borgmesteriugallartup Malik Berthelsenip (S) Maniitumi qinerneqarluarnissani naatsorsuutigisimanngilaa – qinersinerullu inernera tupaallaatiginagu.

    Illoqarfimmi arfinilinnik qinerneqarami Sisimiuni politikerit Maniitsumi tapersersorneqarnissaat ajornakusoornerusartoq nassuerutigaa.

    - Sisimiuneersuusugut Maniitsumi qinersisikinnerusaratta. Maniitsumi innuttaasut illoqarfiup Sisimiunit aqunneqarnera naammagittaalliutigikulasarpaat, taamaammat angusara tupaallaatiginngilara, Sermitsiamut oqarpoq.

    Maniitsumi qinigassanngortittoq siuttuusoq

    Malik Berthelsenip Maniitsumi qinerneqarpallaannginnini akuersaarnerani Maniitsumi qinigassanngortittut angusaat allaanerupput.

    Maniitsumeersoq Nathan Møller Naleraq sinnerlugu qineqqusaartoq 285-init taaneqarpoq.

  • Nathan Møller Maniitsumi taaneqarnerpaasoq

    Kassaaluk Kristensen

    Naleraq Maniitsumi taaneqarnerpaavoq, 41,3 procentinit taaneqarsimalluni. Qineqqusaartuni Nathan Møller (N) taaneqarnerpaasimavoq, 285-init taaneqarnerpaasimalluni.

    Maniitsumi qinersisinnaasut 53 procentii ukioq manna taasisimapput. Kommuninut qinersinermi 2021-mi taasisinnaasut 62,6 procentii taasisimallutik.

    Rachel Ingemann Demokraatineersoq 188-init taaneqarsimavoq.

  • Siumut Tasiilami ajugaarujussuarpoq

    Hanna Hviid

    Siumut Tasiilami qinersisinnaasut 71,2 procentiinit taaneqarpoq. 453-init qinerneqarluni. 32,9 procentpointinik siuariarpoq.

    Naleraq qinerneqarnerpaat tulliattut inissilluni 63-init taaneqarpoq, tassa qinersisinnaasut 9,9 procentiinit taaguunneqarluni.

  • IA Narsami taaneqarnerpaavoq Narsamili ajorsarluni

    Kassaaluk Kristensen aamma Hanna Hviid

    IA Narsami taaneqarnerpaalluni, 43 procentinit taaneqarsimavoq. Taamaattoq taaneqarnerpaagaluarluni, qinersinermit kingullermit sanilliullugu 29,5 procentpointinit maanna taanikinneruvoq.

    Nanortalimmi IA taaneqarnerpaat pingajuattut inissippoq, tassa 22,1 procentinit taaneqarami - 21,5 procentpointinit kingullermit taanikinnerulluni.

    Nanortalimmi Siumut taaneqarnerpaasimavoq, 40 procentinit taaneqarsimalluni.

  • Siumut Paamiuni qinerneqarnerpaavoq, kinguariarlunili

    Hanna Hviid

    Siumut Paamiuni 274-inik qinerneqarsimavoq, tassa qinersisinnaasut 54,8 procentii pissarsiaralugit. 2021-mulli sanilliullugu 7,8 procentpointinik ikinneruvoq,

    Demokraatit 25,8 procentpointinik siuariarpoq, 137-inik taaneqarsimalluni.

    IA 50-inik qinerneqarpoq, Atassut 26-nik, Naleraq arfinilinnit Qullerlu sisamanit qinerneqarsimavoq.

  • Rachel Ingemannip borgmesteritut qinigaanissani neriuutigaa: Pissanganartorujussuuvoq

    Tôrtia Reimer-Johansen

    Qeqqata Kommuniani taasinerit Taseralimmi kisinneqaleruttorneranni pissangalluni malinnaasoqarpoq. Malinnaasut ilaat tassaavoq Demokraatineersoq Rachel Ingemann, taanna qineqqusaarnermini annertuumik anguniagaqarpoq; Borgmesterinngorusuppoq.

    Qinersinerup kisinneqarnera malinnaaviginiarlugu partiip immikkoortortaqarfiani siulittaasoq Erne Olsen peqatigalugu Taseralimmiippoq. Qinersisiminik ilioraavik takugamiuk isikkua nuannaajallappoq.

    - Qinersiserpassuaqarlunga takuara. Aamma Demokraatit. Oqariartuutivut eqqortut innuttaasut paasisimammassuk tanngassimaarutigaara, oqarpoq.

    Borgmesteriugallartoq Malik Berthelsen aamma qinersiserpassuaqarpoq, sulili nalunarpoq qanoq amerlatiginerat.

    - Pissanganartorujussuuvoq. Malillu qinerneqangaatsiarsimasugut takusinnaavara. Qinerneqarnerunissama neriuutiginera toqqortersinnaanngilara. Sivisuallaamik borgmesteritut issiannginnissaq pitsaasuusoq isumaqarpunga, Rachel Ingemann oqarpoq.

    Rachel Ingemann.

  • Qeqertarsuarmi taasinerit kisinneqarsimalerput

    Hanna Hviid

    Qeqertarsuarmi Demokraatit taaneqarnerpaasimapput, taasisut 49 procentiinit taaneqarsimallutik. Tassa taasisut 188-it.

    Demokraatit 19,1 procentpointinit qinersinerup siulianit siuariarsimapput.

    Simigaq Heilmann Demokraatineersoq taaneqarnerpaasimavoq, 137-nit taaneqarsimalluni.

  • Ittoqqortoormiini IA ajugaavoq

    Kassaaluk Kristensen

    Ittoqqortoormiini taasisimasut kisinneqarsimalerput.

    Kisitsisillu takutippaat IA 64,6 procentinit taaneqarsimalluni taaneqarnerpaavoq. Taamaasilluni 56,4 procentpointinik kingullermik qinersinermit 2021-mit siuariarpoq.

    IA 102-nit taaneqarpoq.

    Siumut 34-nit aamma Naleraq 22-nit taaneqarput.

    Atassut, Demokraatit Qullerlu taaneqarsimanngillat.

  • Nuummi 45,13 procentit taasiartorsimapput

    Jensine Berthelsen

    Qinersiviit maanna matupput.

    Nuummi qinersisinnaasut 45,13 procentii taasiartorsimasut, qinersinermi aqutsisoq ilisimatitsivoq.

    Bea Mølgaard, qinersinermi aqutsisoq kingullersaalluni qinersivoq.

    Nuummi qinersinermi aqutsisoq, Bea Mølgaard, Nuummi kingullersaalluni qinersivoq.

  • Sisimiuni 56,1 procentit taasiartorsimapput

    Tôrtia Reimer-Johansen

    Sisimiuni, Qeqqata Kommunianut kommunalbestyrelsemut taasisuni, nal. 20.00 56,1 procentit taasisimapput - allakkatigut taasisut ilanngullugit.

    Qinersivik nal. 20.00 matuvoq.

    2021-mi 68,2 procentit taasisimapput.

    Taasisinnaasut 4045-pput.

  • 34,7 procentit Nuummi nal. 19.00 taasisimapput

    Kassaaluk Kristensen aamma Hanna Hviid

    Qinersineq naammassilerpoq.

    Kommunenut qinersinermi illoqarfiit pingaarnersaanni nal. 19.00 34,7 procentit taasisimasut qinersinermi aqutsisup Sermitsiamut ilisimatitsissutigaa.

  • 4.100-it missaat - tassa Sermersuumi taasisinnaasut 23,8 procentii - taasiartorsimapput

    Kassaaluk Kristensen aamma Oline Inuusuttoq Olsen

    Qinersisinnaasut ikittuinnaat taasiartortussatut maanna isikkoqarpoq. Kommuneqarfik Sermersuumi tamanna malunnarsereerpoq.

    Nal. 17.00 qinersinermi aqutsisoq Bea Mølgaard Sermitsiamut ilisimatitsivoq taasisinnaasut 23,8 procentii taasiartorsimasut.

    Tassa kommunimi taasisinnaasuni 14.000-ingajanni 4.100-t.

    - Malittarisassagut atuuttut malillugit taasisut procentitigut ikikkaluarpataluunniit taasinerit atuutissapput. Taasisut tunuliaqutsiisoralugit kommunalbestyrelse nutaaq atuutissaaq. Kommunimi tunuliaqutsiisussat amerlaneroqqullugit innuttaasut taasiartoqqunarput, Bea Mølgaard Sermitsiamut oqarpoq.

  • Thorning-Schmidt CNN-imut: USA-p Kalaallit Nunaanni angusinnaanngisai annikitsuararsuupput

    Ritzau

    USA-p Kalaallit Nunaanni isumannaallisaanermut aningaasaqarnermullu tunngatillugu angusinnaanngisaat annikitsuararsuupput. Anguniagaqassallutik kissaatigigunikku.

    Danmarkimi ministeriunerusimasoq Helle Thorning-Schmidt CNN-imit apersorneqarnermini oqarpoq.

    - Kalaallit Amerikamiut Kalaallit Nunaanni suleqatiginissaat iluarissagaat qularinngilara, aamma aningaasaqarnikkut ajornartorsiutit pillugit. Isumaqatigiinniarnerit aallartissigit, oqarpoq.

    USA-p præsidentiata Donald Trumpip Kalaallit Nunaata USA-mut ilaalernissaa soqutigigini arlaleriarluni oqaatigaa - ilaatigut "nunarsuarmi isumannaatsuuneq“ eqqarsaatigalugu.

    Trump NBC Newsimut arfininngormat oqarpoq:"Kalaallit Nunaat pissavarput."

    USA-p sakkutooqarnikkut iliuuseqarnerunissaanut Kalaallit Nunaannilu sakkutooqarfinnik amerlanerusunik pilersitsinissaanut aporfissaqanngitsoq Helle Thorning-Schmidt apersorneqarnermini aamma oqarpoq. Tamanna amerikarmiut kissaatigippassuk.

    Taamaaliorneq kalaallinit qallunaanillu tapersersorneqarumaartoq isumaqarpoq.

    - Tassa Amerikamiut Kalaallit Nunaannik akisussaaffeqalinngikkaluarluni Kalaallit Nunaanni iliuuserisinnaanngisaat annikitsuararsuupput, Helle Thorning-Schmidt oqarpoq.

    Helle Thorning-Schmidt apersorneqarnermini “Kalaallit Nunaat kalaallit pigigaat” aamma “Danmarkimi kunngeqarfiup ilagigaa” aamma oqarpoq.

  • USA-mi præsidentip, Donald Trumpip nunatta pigilernissaanut oqaaseqarnera Naalakkersuisut siulittaasuata qisuariarfigaa

    Tôrtia Reimer Johansen

    USA-p præsidentiata Donald Trumpip Kalaallit Nunaat pillugu aammaarluni oqaaseqaqqippoq. Uagut piginiarneqarsinnaanngilagut siunissarpullu nammineq ilusilersussagipput, Naalakkersuisut siulittaasuata Jens Frederik Nielsenip erseqqissarpaa.

    Imatut Facebookikkut allappoq:

    Nunarput avataaniit eqqaaneqaraangat ilisimasassaraarput. Kisianni aalassatsinniarneqassanngilagut.

    Præsident Trump oqarpoq USA “Kalaallit Nunaat pissagaa”. Ersarissumik oqaatigilara:

    USA taamaasiorsinnaanngilaq. Uagut piginiarneqarsinnaanngilagut. Uagut siunissarput nammineq ilusilersussavarput.

    Ernummateqarneq aallaavigalugu ilusilersuinavianngilagut. Eqqissisimasumik, ataqqinassuseqarluta ataatsimooqqissaarlutalu siuariartornissarput isumagissavarput.

    Pingaartitat taakkoqqissaat aallaavigalugit amerikami præsident ersareqqinnaartumik oqariartofigissavarput, uagut Nunarput pigaarput.

    Ippassaq tamanna ersarissumik inissisimaffigaarput. Ullumikkut suli ersarissumik inissisimaffigaarput. Aamma siunissami allanngornavianngilaq.

Powered by Labrador CMS