Aatsaat taama qinigassaqartigaluni Folketingimut qinersineq aallartippoq

Qinersiartortorpassuit Nuummi Illorsuarmut Timersortarfimmut qinersivimmut nalunaaquttap akunnerani siullermi takkussimapput.

Nalunaaqutaq qulinut qinersisartut 5 procentingajaat, tassa 680-ingajaat, taasiartorsimapput.

Qinersivimmi aqutsisoq Bea Mølgaard Lennert Sermitsiamut paasissutissiivoq. Ajoraluartumik folketingimut 2022-mi qinersinermi sanilliunnissaannut kisitsisit piginngilai.

Qaqortumi aamma taamaattoqartoq qinersivimmi aqutsisoq Randi Vestergaard Evaldsen oqarpoq.

Qaqortumi nal. 10.00 qinersisinnaasut 4,8 procentii taasiartorsimapput. Qinersinermi kingullermi kisitsisit aamma piginngilaat.

Qinersivimmi aqutsisup kommunimilu pisortap Randi Vestergaard Evaldsenip qinersisartut akornanni qiimasoqartoq oqaatigaa:

- Nalunaaqutaq qulingiluanut ammarattali inoqaannavippoq, inuillu qiimallutik.

Qaqortumi aamma silageqaaq.

- Seqinnarippoq nillataarluni, qujanartumilli anoreqarani.

Qinersiartortut amerlassusaat nal. 12.00 kisinneqaqqissapput.

Folketingimut qinersiviit nal. 9.00 ammarput.

Nunatsinni qinersiviit 70-it missaanniipput, Nuummilu annerpaalluni.

Nuup Timersortarfiani qinersivik ammarmat innuttaasut 60-it missaanniittut taasiartorlutik isereersimapput. Akunnerulli affaani siullermi qinersiartortut amerlanerusut isaalereerput.

Qinersiviit nal. 20.00 matussapput, kisitsinerlu aallartinneqassalluni.

- Ullumikkut 24. marts nal. 9.00-inngorpoq, Folketingimullu qinersineq ammarpoq. Takuteqqammerpagut qinersiviit imaqanngitsut. Teknikkikkut ajutooqqammeraluarpugut: Nerrivik ataaseq allattorsimaffinnik peqanngikkaluarpoq, tamannali iluarsivarput. Nalunaarutigisinnaavara Folketingimut qinersineq ammarpoq, qinersilluarisi, Nuummi qinersinermi aqutsisoq Bea Mølgaard Lennert oqarpoq.

Ulloq qinersinermit unnukkullu kisitsinermi Sermitsiami malinnaasinnaavutit

IA-mit qinigassanngortittup Aqqalukkuluk Fontainip Eqalugalinnguit kaajallattariaata eqqaani ullaakkut biilertut ilassiorpai, Erfalasorput tigummiutigalugu. Folketingimut qinersinissamut ulloq aallartippoq.

- Qineqqusaartarnerit siulianit misilittakkakka atorluartutut misigaara, aamma ingerlalluarlunga. Maanna qinersinissaq pissanganarpoq, tassami qinigaasut marluk nutaajusussaapput. Innuttaasut aalajangissavaat nukiit nutaat qinerneqassanersut, imaluunniit allanngortoqassannginnersoq, Sermitsiamut oqarpoq.

Folketingimut qinersineq nunatsinni qinersinerit pingaaruteqarnerit ilaattut nalilerneqarpoq, nunarpummi avataanit tatisimaneqangaatsiarpoq nunarsuarmilu inissisimaffia aamma soqutigineqarneruleriartorluni.

- Innuttaasut qinersiartoqqullugit kaammattorpakka, tamat oqartussaanerani pisinnaatitaaffik atorluarneqartariaqarpoq. Ataatsimoornissaq tamallu oqartussaanerani pisinnaatitaaffiup atornissaa aatsaat taama pigaaruteqartigaaq, tassami nunarput inissisimanini pillugu USA-mit suli tatisimaneqarpoq, isummagullu pingaaruteqarput, Aqqalukkuluk Fontain oqarpoq.

Demokraatit tunuliaqutaralugit Folketingimut qinigassanngortittoq Bent R. Olesen ilaqutariit meerartallit atugaat pillugit suliniuteqarniarpoq. Meeqqat 16.000-it missaanniittut Kalaallit Nunaanniittut meeqqat Danmarkimiittut assigalugit aningaasaqarnikkut pisinnaatitaaffeqassasut tikkuarpaa.

- Meerartaartut ikiliartorput, aammalu ullumikkut nunatsinni meerartaarnissaq akisuallaalersimavoq.

Taamaattumik aningaasatigut nukittorsaaneq ilaqutariinnut toqqissisimanerulersitsissaaq aammalu

meeqqat pitsaasumik peroriartornissaannut atugassarititaasut pitsanngorsarlugit, Bent R. Olesen allappoq.

Inuiaqatigiit nutsernerat unammilligassaqartoq, ingammik utoqqaat ilaqutariillu meerartallit atugarissaarnerujumallutik Danmarkimut nuuttarnerat, qineqqusaartup tikkuarpaa.

Bent R. Olesenip qallunaat aningaasanut inatsisaat aqqutigalugu aningaasanik amerlanerusunik immikkoortitsinissaq sulissutiginiarpaa, ilaatigut peqqinnissaqarfimmut, ilinniartitaanermut, imarsiortunut pitsaanerusunik pisinnaatitaaffeqarnissamut nunanilu tamalaani isumaqatigiissutit atuutilertitsinissamut.

Bent R. Olesenip nutaaliornermut aningaasaateqarfimmik pilersitsinissaq aamma siunnersuutigaa. Nutaanik tunisassiornikkut, avammut niuernerup annertusarneratigut nunami niuernerup nukittorsarneqarnissaa anguniarneqarsinnaalluni.

Naggueqatigiit Inuit kattuffiat ICC folketingimut qinersinissaq sioqqullugu oqallinnermut ilannguppoq

Naalagaaffeqatigiinneq nunanut allanut politikkimik eqaannerusumik iliuuseqarluartumillu ingerlatsinissamut unammilligassaqartoq, ICC-p siulittaasuata Sara Olsvigip Sermitsiamut oqaatigaa.

Qallunaat kalaallillu akisussaaffiisa killeqarfii suli erseqqinngitsut, tamannalu pillugu folketingimi ilaasortaasut Inatsisartunut Naalakkersuisunullu tusarnaarsinnaasariaqarlutillu ataqatigiissaarisinnaasariaqartut, Sara Olsvig oqarpoq.

ICC-p Naalakkersuisut suleqatigalugit Issittumi Siunnersuisoqatigiinni sulinerat malinnaaffigeqqammeraat, suliassanillu agguataareriaatsimi aaqqissuussaanermi equngasoqartoq paasinarsisimasoq, Sara Olsvig ilisimatitsivoq:

- Kunngeqarfimmiittut nunat pingaust tamarmik immikkut suliassatik suliarisarpaat, soorlulusooq taakkua akornanni imminnut ataqatigiikkunnaartoqarsimasutut illuni. Suliassat tamakkiisumik ataatsimut isiginagit ataatsimoorussillunilu salliunneqartussat aningaasaliiffiginagit, ajoraluartumik akornanni timitaliisoqanngitsoortarneranut assersuutissaqarpoq, Sara Olsvig oqarpoq.

Sara Olsvig Danmarkip atuuffini paatsooraa isumaqarpoq:

- Ima oqarfigineqarneq assigaa: "Nammineq aalajangiisinnaassuseqarusuppusi, nammineq aningaasalersuissaasi", oqarpoq nangillunilu:

- Suliassat naammassineqartinngippata nunat tamalaat akornanni suliani taamaattuni tamanut akornutaassaaq. Ingammillu Danmarki naalagaaffittut ajorsarpoq, Danmarkimi nunat inoqqaavisa nunarsuarmioqatigiit akornanni illersuisuattut inissisimaffianut ersarilluinnartumut naapertuutinngimmat.

Kalaallit Nunaata inuit innarluutillit pillugit suliaqarfik kisimiilluni kivissinnaanngilaa.

Nunatsinni Inuit Innarluutillit Kattuffiat (NIIK) taama nalunaaruteqarpoq.

Naak suliaqarfik Kalaallit Nunaata nammineq akisussaaffigigaluaraa kattuffik folketingimut qineqqusaarnermi inunnik innarluutilinnik sullissinermik ukkatarinninnissamik politikerinut oqariartuuteqarpoq:

- Suleqatigiinnissamik, ilisimasanik sulisussanillu immikkut sungiusagaasimasunik – ilaatigut Danmarkiminngaanneersunik – pisariaqartitsineq nassuerutigalugulu ammasumik oqallisigissagaanni sapiillisaartoqartariaqarpoq.

- Ukiuni qulikkaani politikkikkut kukkusumik ingerlatsisoqarnerata kinguneri ullumikkut inunnit innarluutilinnit ilaqutaasunillu Kalaallit Nunaanniittunit Danmarkimiittunillu tuusintilinnit nammatarineqarput, kattuffik siulittaasoq Viggo Johansen siuttoralugu tusagassiutitigut nalunaarummi taama allappoq.

Inunnik innarluutilinnik sullissineq Kalaallit Nunaata kisimiilluni kivissinnaanngikkaa politikerit nassuerutigisariaqaraat, taamatuttaarlu suliaqarfimmi pineqartumi Danmarkimik suleqateqarnerunissaq sulissutigineqartariaqartoq kattuffimmit isumaqartoqarpoq.

Siumut Folketingimi kalaallit ilinniartut – ilinnialinnginneminni, ilinniarnerup nalaani ilinniakkamillu naammassisimareernerisa kingorna - atugaat pitsaanerulersinniarlugit sukataarluni sulissuteqassaaq.

Siumup bachelorinngorniarluni Danmarkimi pisortanit akilerneqarluni kalaallinut ilinnialerusuttunut 6.0 qaangerlugu karakterilinnut aaqqissuussineq attatiinnarneqassasoq folketingimi sulissutigigissavaa. (Ilinniarnertuunngorniarfik assersuutigalugu)

Siumup bachelorimik naammassinnissimasut kanditatitullu ingerlaqqikkusuttut ajornaquteqanngitsumik Danmarkimi isersinnaatinneqassammata ilutigitillugu Ilisimatusarfik danskit universitetiisulli tamakkiisumik akuerineqassasoq sulissutigissavaa.

Illoqarfiini anginerusuni iinniartunut inissaaleqineq unammillernarpoq, taamaammallu ilinniagaqartunut – aamma ilinniartunut ilaquttalinnut - akikinnerusumik inissialiortoqarnissaa partiip sulissutiginiarpaa. Tamatuma saniatigut Siumut Naalakkersuisut Danmarkimilu naalakkersuisut suleqatigalugit ilinnialernermi ineqarnermut akiliutit immikkut tapiiffigineqartalernissaannik siunnersuuteqarpoq.

Ilinniagaqarnermut tapiissutit inuuniarnermi aningaasartuutigineqartunut naleqquttuunersut partiip misissorniarpaa, ilinniartullu ilinniarnerminni inigisartik annaanngikkaluarlugu nunatsinnut angerlarsinnaanissaat nunatsinnilu sulisinnaasut sulissutigissavaa.

Taakkua qaavatigut Siumut amerlarnerit ilinniarnerminnut atatillugu sulisinnaanissaat aqqutissiuukkumallugu kalaallit ilinniartut inuussutissarsiortullu akornanni suleqatigiinnerup nukittorsarneqarnissaanik kalaallisullu tunuliaqutaqarnerup immikkut piginnaasatut nukittoqutitullu akuerineqarnissaanik suliniuteqassaaq.

Ane Lone Bagger (S) tusagassiuutinut nalunaarummi taama allappoq.

Danmarkimi nerisassanut tapiissummik pisartagaqarneq Kalaallit Nunaanni innuttaasut pissakinnerusut atorsinnaasariaqaraat, Najaaraq Møller (S) isumaqarpoq

Innuttaasut aalajangersimasumik isertitallit nerisassanut tapiissummik tunineqartarnissaat Danmarkimi qinersinissaq sioqqutitsiarlugu isumaqatigiissutigineqarpoq.

Najaaraq Møller aaqqissuussaq tamanna Kalaallit Nunaanni aamma atuutsinneqartariaqartoq isumaqarpoq:

- Kalaallit Nunaat nammineq aningaasaqarniarnini aqqutigalugu ajornartorsiutini nammineq aaqqinniarneqartariaqartut ilaat oqarsinnaassapput. Aamma ilumoorpoq – inuiaqatigiittut nammineq akisussaaffeqarpugut. Kisianni naalagaaffeqatigiinneq pillugu oqaluuserinnikkaangatta aamma ataatsimoorluta akisussaaffik pillugu oqaloqatigiissinnaasariaqarpugut.

- Danmarkip ukiumut milliardilikkaanik nunanut assigiinngitsunut nunarsuarmiittunut ikiuutitut tapiissutigisarpai. Taamaattumik aamma eqqartorneqarsinnaasariaqarpoq qanoq Kalaallit Nunaanni innuttaasut Danmarkimi aaqqissuussinernit taamaattunit pisariaqartitsisoqartillugu periarfissinneqarsinnaanersut.

Najaaqqap akisussaaffiup Kalaallit Nunaannit allamut nuunneqarnissaa pinngilaa, naalagaaffeqatigiinnermi innuttaasut nerisassanut tunngatillugu ajornerusumik inissisimaffeqannginnissaat pivaa.

- Naalagaaffeqatigiinnermi isumaqassappat inuit ulluinnarni inuuneranni malugineqarsinnaasariaqarpoq, Najaaraq Møller (S) naggasiivoq.

Qineqqusaartut allattorsimaffiat tamakkiisoq saqqummiunneqarpoq. Katillugit 27-t qinigassanngortipput, tassaappullu:

Atassut - qinigassat sisamat

• Bentiaraq Ottosen
• Ellen Schärfe
• Malu Ostermann
• Orla Joelsen

Inuit Ataqatigiit - qinigassat arfinillit

• Aqqalukkuluk Fontain
• Kalistat Lund
• Kuupiki. E. V. Kleist
• Naaja H. Nathanielsen
• Nivi Rosing
• Pipaluk Lynge

Siumut - qinigassat arfinillit

• Aka Maria Koch Hansen
• Ane Lone Bagger
• Doris Jakobsen Jensen
• Erika Nielsen Baadh
• lneqi Skourup Kielsen
• Najaaraq Møller

Demokraatit - qinigassat arfinillit

• Anna Wangenheim
• Bent Olesen
• Hans Jørgen Mørch
• lnuujuk Petersen
• Napaartoq Isak Petrussen
• Patrick Abrahamsen

Naleraq - qinigassat tallimat

• Juno Berthelsen
• Karina Zeeb
• Najannguaq Hegelund
• Oliver Bech
• Qarsoq Høegh-Dam

Det Radikale Venstremi siulittaasup Martin Lidegaardip pisariaqassappat naalagaaffeqatigiinneq atorunnaarsillugu Danmarkip, Kalaallit Nunaata Savalimmiullu nunatut namminersortutut suleqatigiinnerannik taarserneqarsinnaasoq Altinget Arktisimut oqaatigaa.

- Allatut eqqarsartariaqartugut isumaqarpunga, Lidegaard Altinget Arktisimut oqarpoq.

Tusagassiorfiup ukiorpassuarni diplomatiusimasup Michael Zilmer-Johnsip 2023-mi sammisaq saqqummiussaa Lidegaardip qanoq isumaqarfigineraa pillugu apersorpaa.

Zilmer-Johns Danmarkip, Savalimmiut Kalaallit Nunaatalu allatut ataatsimoorfeqarsinnaaneq eqqarsaatigisariaqaraat, tassa nunat taakku pingasut oqaluttuarisaanermi kingornussaannaanngitsumik namminneq kajumissutsiminnik aamma nammineq aalajangernermikkut inuiaqatigiittut namminersortutut ataatsimooqqilernissaannik isumaqarluni taamani oqarpoq:

- Naalagaaffeqatigiinneq kalaallit savalimmiormiullu namminiilivinnissamik nunanilu tamalaani oqartussaassuseqarnerulernissamik kissaataannut naleqqulluinnartumik inissaqartitsisinnaanngimmat ajornartorsiuteqarpugut, Michael Zilmer-Johns 2023-mi tusagassiortumut Martin Breumimut oqarpoq.

Martin Lidegaard naalagaaffeqatigiinnerup nutaamik taarserneqarnissaa pillugu, Danmarkimi maanna siuttuusunut imaluunniit siuttunngortussanut, oqallinnissamut piareersimavoq. Altinget Arktis allappoq.

Qarsoq Høegh-Dam Folketingimut qinersinissamut sassartoq Naleqqap tallimanngormat ullaap tungaani naatsumik nalunaarutigaa:

- Qarsoq Høegh-Dam 2026-imi Folketingimut qineqqusaarnermi Naleraq tunuliaqutaralugu qineqqusaarnissaa pisortatigoortumik maanna nalunaarutigineqarsinnaalerpoq, partii allappoq.

Qarsoq Høegh-Dam Folketingimut 2026-mi qinersinissamut partiip qinigassanngortitaasa tallimassaraat kingulliullunilu.

Qarsoq Høegh-Damip qinigassanngortinnerata kingunerisaanik ilaqutaasup ilaasortaajunnaartoq taarsernissaanut periarfissaqarlerpoq, Aki-Matilda Høegh-Damimmi qanitaraa. Taannalu qinigassanngorteqqinniarnani aalajangernikuuvoq.

Qarsoq Høegh-Dam Inatsisartunut 2021-mi qinersinermi qineqqusaarpoq. Qinigaalluarluni Siumumi taaguunneqarnerpaat sisamaattut inissilluni (796-init taaneqarluni).

Ikiaroornartuuteqarsimasutulli eqqartuunneqarnikuunera saqqummermat Inatsisartuniit tunuarniarluni aalajangernikuulluni.

Tamatuma kingorna Qarsoq Høegh-Dam politikimik suliaqartarpoq, ilaatigut Siumut Nuummi siulittaasuunikuulluni. Siumumiilli 2024-mi anivoq.

Naalakkersuisuni ilaasortat pineqartut marluk, Anna Wangenheim (D) aamma Naaja H. Nathanielsen (IA), folketingimut qineqqusaarnertik pillugu naalakkersuisoqataasunit Siumumit isornartorsiorneqarput.

Naaja H. Nathanielsen Facebookimi ikkussami ima akissuteqarpoq:

- Anna uangalu Naalakkersuisuni pinngitsoorneqarsinnaanngitsut Siumut isumaqarunarmat soorunami tulluusimaarpunga. Ajunngitsumik ingerlasugut uangattaaq isumaqarpunga, politikeri allappoq.

Qinigassanngortinneq tamat naalakkersueqataasinnaanerisigut pisinnaatitaaffiusoq taanna ilanngulluni allappoq:

Tamatuma saniatigut tamat naalakkersueqataasinnaanerat naapertorlugu qinigassanngortissinnaallutalu ullut 14-it tulliuttut qineqqusaarnissatsinni malittarisassanik unioqqutitsinavianngilagut.

Taasuma Naalakkersuisuni atorfini attatiitigalugu qineqqusaarsinnaalluni isumaqarpoq. Taannattaaq naalakkersuisoqatigiit siammasissut nunatsinnut nukittoqqutaasut Siumullu naalakkersuisoqataaginnassasoq aamma isumaqarpoq:

- Vivian (nunanut allanut tunngasunut naalakkersuisoq, aaqq.) ingerlalluartoq, suleqatigiinnerlu ingerlalluartoq isumaqarpunga.

Inuit Ataqatigiinni siulittaasuusimasoq Naalakkersuisunilu siulittaasuusimasoq Kuupik V. Kleist Folketingimut qinigassanngorpoq. Taanna 2015-imi politikkimik suliaqarunnaaraluarpoq.

- Usa-p nunatsinnik tatisimanninnera annertuvoq. Uanga isumaqarpunga, nunarput tuniniagaanngittoq, tunineqarsinnaanngitsoq, inunnilli aqunneqassasoq, qinigassanngortinnermini tunngavilersuilluni oqarpoq.

Kuupik V. Kleist namminersornerulernissamut inatsisip ineriartortinnerani suleqataangaatsiarsimavoq aammalu namminersornerulernissamut inatsisip 2009-mi atuutilernerani Naalakkersuisuutitaqartuni siuttuusimalluni.

Taassuma eqqaasitsissutigaa præsidentip isumaa amerikamiut tamarmik isumarinngikkaat.

- Inuiaqatigiittut pisariaqartitarput massakkut tassaavoq illersoqatigiinnissaq, ataatsimoornissaq aammalu suleqateqarnissaq. Folketingimi partiit tamaaviisa suleqatiginissaat piareersimaffigaara, isornartut, aammalu inuiaqatigiinnut kalaallinut angusassat pitsaanerpaat anguneqarsinnaanerat, aatsaat folketingimi suleqateqarnikkut anguneqarsinnaavoq, oqarpoq.

Folketingimut qinigassanngortittup Ane Lone Baggerip (S) nunat allat Kalaallit Nunaannut assingusut isumassarsiorfigisiniarpai. Peqqinnissaqarfinnut pitsanngorsaataasinnaasoq taanna isumaqarpoq:

- Siumut Folketingimi sulissutiginiarpaa nunani innuttaqassusaat ikitsuni aammalu siammarsimasuni inoqarfiusuni nunanit tamalaanit periutsit misissuiffigineqarnissaat, taakkulu Kalaallit Nunaanni peqqissutsimik misissuisarnernik katsorsaanermillu periarfissanik pitsaanerulersitsisinnaanersut. Anguniarneqarpoq nappaatit siusissukkut paasineqarnissaat – pingaartumik inuunerlunnermit patsiseqartartut aammalu kræfti – innuttaasut ukiuinut immikkoortiterlugit peqqissutsimik misissuisarnerit atuutilersinnerisigut.

Innuttaasut sumi najugaqarnerat apeqqutaanani peqqinnissaqarfimmiit sullinneqarsinnaasariaqartut Siumup tusagassiuutitigut naqissuserpaa.

- Kalaallit Nunaanni innuttaasut siammarsimallutik najugaqarput, tamannalu peqqinnissaqarfimmut atortulersorluakkamut immikkut ilisimasalinnillu sullissiffiusumut periarfissaqarnermut immikkut unammillernartorsiortitsivoq. Taamaattumik Siumut suliniutini nukittorsarniarpai, innuttaasut kunngeqarfiup iluani tamarmik pitsaanerusunik naligiinnerusunilu peqqissutsikkut sullissivigineqarnissaat qulakkeerniarlugu.

Ane Lone Bagger aamma Siumut ilungersunartumik napparsimasunut pitsaanerusumik tapersersuinissaq sulissutiginiarpaat. Tamanna Københavnimi Kalaallit Napparsimasut Illuannik amerlanerusunik kalaaliminertortitsinerunikkullu ilaatigut anguneqassasoq partiip nalunaarutigaa.

Siumut sinnerlugu Inatsisartunut ilaasortap naalakkersuisut marluk Folketingimut qinigassanngortinnerisa kingorna Naalakkersuisut suliassaminnut tunniusimanerat apeqquserpaa.

Peqqissutsimut inunnullu innarluuteqartunut naalakkersuisoq Anna Wangenheim (D) aamma ilaatigut inatsisinik atuutsitsinermut aamma aatsitassanut naalakkersuisoq Naaja H. Nathanielsen (IA) Folketingimut qinigassanngortipput.

- Naatsorsuutiginngisannik pakatsissutigisannik pisoqarnera nalilersuisariaqarnissannik killippoq, Lars Poulsen Facebookimi quppernermini ilaatigut allappoq.

- Isumalluarnera siunnerfeqaqatigiinnerpullu nakeriallaatigeqaakka, Naalakkersuisutta ilai massa folketingimut qinigaagunik tunuarnialereersut, ukioq ataaseq Naalakkersuisutut atuuffeqareerlutik - tamat oqartussaanerata aqqani pisinnaatitaaffiummat, Lars Poulsen allappoq.

Lars Poulsenip tunuliaqutsiinermut apeqqut pillugu parteeqatini tusarniassallugit aamma allaatigaa.

Naalakkersuisoqatigiit ukiumi ataatsimi siullermi marlunnik ikinnerulersimapput, tassa Maasi Pedersen meeqqat, inuusuttut ilaqutariinnullu naalakkersuisutut aamma Bentiaraq Ottosen sulisoqarnermut aamma avatangiisinut naalakkersuisutut tunuarmata.

Siumut naalakkersuisoqatigiinnut ilaavoq, naalakkersuisuutitaqarlunilu.

Naaja H. Nathanielsen Folketingimut qinigassanngortilluni ataasinngornermi unnukkut nalunaaruteqarpoq.

- Sassarumallunga maanna aalajangerpunga. Qinigaassagaluaruma Naalakkersuisuni qanoq tunuarnissara aamma suliat ingerlareersut tamaangaannannginnissaat pillugu, siulittaasora Múte B. Egede pilersaarusioqatigisimavara. Qinigaassanngikkaluaruma aamma qularutigineqassanngilaq pisarnittut tunniusimallunga Naalakkersuisutut suliakka nangikkumaarparikka, Naaja H. Nathanielsen allappoq.

Ilanngullugu ilisimatitsissutigaa Folketingimut qinigaassagaluaruni Inatsisartunit sulinngiffeqarumassalluni, marluinnik atuuffeqarnissaq anguniannginnamiuk.

IA-mit qinigassanngortittut allat sisamat saqqummiunneqareerput. Tassa Pipaluk Lynge, Nivi Rosing, Kalistat Lund aamma Aqqalukkuluk Fontain.

Atassut tallimanngornermi 13. marts nal. 15.00 tusagassiortunik aggersaavoq.

Tusagassiortunik katersortitsinermi Folketingimut qinigassanngortittut ilisaritinneqassapput anguniakkallu saqqummiunneqarlutik.

Atassut sinnerlugu sassartut tassaapput Bentiaraq Ottosen, Orla Joelsen aamma Malu Ostermann.

Qinersinermut 24. marts pisussamut partii allanik qinigassanngortitaqaqqissanersoq ilisimaneqanngilaq.

Anna Wangenheim Folketingimut qinigassanngortinnerminut tunngatillugu isornartorsiorneqarnini maanna akissuteqarfigaa. Tamat attaveqatigiittarfiini Facebookimi akissuteqarluni allappoq peqqissutsimut inunnik innarluuteqartunullu naalakkersuisoqarfimmi suliani ingerlatiinnarlugit:

- Suliakka ingerlappakka - allanngortoqanngilaq; assinganik tunniusimallunga pisussaaffikka suliaraakka; Naalakkersuisoqatigiit anguniagaannut naapertuuttumik, Anna Wangenheim allappoq.

Folketingimut qinigassanngortinnera pillugu Atassummi siulittaasumit Aqqalu C. Jerimiassenimit isornartorsiorneqarpoq, tassami Naalakkersuisoqatigiinni akisussaaffimmik annertuumik tigummisaqarluni suliaqartussaatigaluni qinigassanngortimmat:

- Saniatigut atorfeqanngilanga, qineqqusaarneq atorfiunngilaq aningaasarsiorfiunanilu; taanna tamanut pisinnaatitaaffiuvoq, taamaattumillu tamat oqartussaaneranik pisinnaatitaaffitsigullu illersorneqartoq, soorluttaaq qinikkat maanna qinikkatut atuuffeqaraluarlutik sassartut, Anna Wangenheim akissuteqarluni allappoq.

Taanna ilisimatitsereerpoq Folketingimut qinigaassagaluaruni Naalakkersuisutut atuuffimminit tunuassalluni.

Juno Berthelsen, Naleraq sinnerlugu Inatsisartunut ilaasortaq, Folketingimut sassarpoq. Naleraq Facebookimi quppernermini paasissutissiivoq. Taamaalilluni Naleqqap Folketingimut qinigassanngortitaata sisamaat saqqummiunneqarpoq.

- Maannakkorpiaq Danmarki Nunatsinnik piginnikkusunnerat annertusiartuaarpoq partiillu ilaasa Naalagaaffinngornissarput namminiussuseqarnerpullu peerniaraat iliuuseqanngitsoorfigisinnaannginnakku, Juno Berthelsen qineqqusaarnissaminut sassarnermini taama tunngavilersuivoq.

Inuiaqatigiilerinermi ilinniagaqarpoq nunanullu allanut tunngasunut naalakkersuisoqarfimmi immikkoortortami pisortatut ukiorpassuarni misilittagaqarluni.