KL

DK

Jens-Frederik Nielsen: Tikeraarneq ikinngutigiilluarnermik takutitsivoq

Thomas Veirum
ursula von der leyen mette frederiksen jens-frederik nielsen eu

Nuutoqqami politikerit tusagassiortunut naatsumik oqaaseqarput.

Naalakkersuisut siulittaasuat Jens-Frederik Nielsen (D) oqarpoq silagissuugaa tikeraartoqarnini nuannaarutigalugu:

- Tikeraartup takutippaa ikinngutigiilluartuusugut suleqatigiilluartuusugullu, tamannalu annertusassavarput, Jens-Frederik Nielsen oqarpoq.

Ursula von der Leyen oqarpoq Kalaallit Nunaannut tikeraarsinnaanini nuannaarutigalugu.

- Ukiut marluk matuma siorna kingullermik tikeraarpunga. Taamani neriorsuivunga alloriutissanik tigussaasunik peqarlunga tulliani tikeraaqqikkumaarlunga. Neriorsuutiga eqquutsissinnaallugu maanna oqarsinnaavunga, Ursula von der Leyen oqarpoq.

Neriorsuutigisimasami qanoq eqqortinnissaa itisilinngilaa, tikeraarnerulli nalaani ataatsimeeqateqarnissani qilanaarinerarlugu.

Ministeriuneq Mette Frederiksen aamma oqaaseqalaarpoq.

Ilaatigut oqarpoq Kunngeqarfik "anorersuarsiungaatsiarsimasoq", taamaattumillu nuannaarutigalugu Kunngeqarfik pitsaasunik ikinnguteqarlunilu ileqarmat.

– Pingasuulluta suliniutigingaatsiarsimavarput EU-p Kunngeqarfiup immikkoortuinut tamanut, aamma Kalaallit Nunaannut, qaninnerulersinnissaa, maannalu pingaarutilimmik angusaqarpugut. Suli mikisualuit oqaluuserineqarlutillu inerisagassaapput, aqqutissarpulli pitsaalluinnarpoq, Mette Frederiksen oqarpoq.

Jens-Frederik Nielsen naggasiilluni nassuiaavoq politikerit maanna angalaalersut, ullunilu aggersuni nutaarsiassaqarumaartoq.

Nuutoqqami tusagassiortunut oqaaseqalaarput.

Imarisassat attuumassuteqartut

  • Qoornumut tikeraarneq

    Thomas Veirum

    Politikerit Qoornumut tikimmata Erfalasorput nuisillugu tikilluaqquneqartarput.

    EU-kommissionip siulittaasua Ursula von der Leyen, ministeriuneq Mette Frederiksen aamma Naalakkersuisut siulittaasuat Jens-Frederik Nielsen Qoornumut tikimmata Erfalasulerlutik tikilluaqqusisoqarpoq.
    Qoornumut tikeraarnermi tusagassiortorpassuit malinnaapput.
    Ursula von der Leyen, Mette Frederiksen aamma Jens-Frederik Nielsen Qoornumi pisuttuarput.
    Greenland Cruisesimi angallassisup, Aili Hjort Andersenip, Mette Frederiksen, Ursula von der Leyen aamma Jens Frederik Qoornumi aamma angallappai.

  • Innuttaasoq: Tuppallernarpoq tikeraartoqarnerput

    Kassaaluk Kristensen

    Charlotte Lyberth, 62-inik ukiulik, Qoornumi inunngorpoqm maannalu ilaquttanilu Qoornumi illoqarlutik. Aasaanerani sulinngiffinnilu Qoornumiittarput, maannalu tikittoqalernerani niuffortunut ilaavoq:

    -Tuppallernarlunilu alutornarnermut taama tikeraartoqalersugut, maannga niuffiorpunga. Tuppallernarpoq taama tikeraartoqarnerput, aamma Trumpip nunatsinnut qanoq piniarnera eqqarsaatigalugu, Charlotte Lyberth oqarpoq.

    Charlotte Lyberthip nuannaarutigaa EU-kommissionip siulittaasuata tikeraarnera.

  • Kangerlummi angalaarneq

    Thomas Veirum

    EU-kommissionip siulittaasua Ursula von der Leyen ministeriunerlu Mette Frederiksen Naalakkersuisut siulittaasuat Jens-Frederik Nielsen peqatigalugu sapaammi ualikkut Qoornumut Nuup Kangerluaniittumut umiatsiamik angalaarput.

    Jens-Frederik Nielsenip tikeraartuni Nuup Kangerluani angalaaqatigai.
    EU-p kommissioniata siulittaasuata tikeraarneranut atatillugu umiatsiat arlallit attartorneqarsimapput.

  • Timmisartoq Ursula von der Leyenimik ilaasoqartoq mippoq

    Thomas Veirum

    Ulloqeqqareersimatsiartoq timmisartoq Ursula von der Leyenimik ilaasoqartoq Nuummi mittarfimmi mippoq.

    Ulloqeqqarneranit minutsit qulit qaangiuttullu EU-p kommissionimi siulittaasua timmisartumit niuvoq, ministeriuneq Mette Frederiksenimit aamma Naalakkersuisut siulittaasuannit Jens-Frederik Nielsenimit tikilluaqquneqarluni.

    Tikeraarnermini Ursula von der Leyen ilaatigut umiatsiamik angalassaaq.

    Ursula von der Leyen Nuummut tikinnermini ministeriunermit Mette Frederiksenimit aamma Naalakkersuisut Siulittaasuannit Jens-Frederik Nielsenimit tikilluaqquneqarpoq.

  • Mette Frederiksen nunatsinnut tikippoq

    Thomas Veirum

    Ministeriuneq Mette Frederiksenip timmisartua nalunaaqutaq 11.30 missaani Nuummi mittarfimmut mippoq.

    Ministeriuneq timmisartumit niuvoq, Naalakkersuisullu siulittaasuat Jens-Frederik Nielsen (D) aamma biilerluni mittarfimmut ilassinnikkiartorluni tikiussimavoq.

    EU-p kommissioniata siulittaasua Ursula von der Leyen qanittukkut tikinnissaa naatsorsuutigineqarpoq.

    Mette Frederiksen Nuummut tikippoq Jens-Frederik Nielsenilu ilassillugu.

  • Mittarfimmi tusagassiortut katersuussimasut

    Thomas Veirum

    Sapaammi ullaap tungaani tusagassiortut assiliisullu Nuummi mittarfimmi ministeriunerup EU-milu kommissionip siulittaasuata tikiffinnissaat utaqqivaat.

    Nuummi mittarfik sapaammi ullaap tungaani.

  • EU-mit tikeraartoqarnerup nalaani politiit nakkutiginninnerussasut

    Thomas Veirum

    Kalaallit Nunaanni Politiit Facebookikkut allapput EU-p kommissioniata siulittaasuata Ursula von der Leyenip ministeriunerullu Mette Frederiksenip tikeraarneranni Nuummi politiit amerlanerusut takussaanerussasut.

    – Uagut suliassaraarput aaqqissuussat eqqissisimasumik torersumillu ingerlanneqarnissaat, aammalu tamarmik – najugaqartut tikeraartullu – toqqissisimanissaat, politiit allaput innuttaasullu apeqqutissaqassagunik nangaanatik saaffiginninnissaannik kajumissaarlugit.

  • Ursula von der Leyen Mette Frederiksenilu sapaammi tikissasut

    Thomas Veirum

    Ullumi EU-kommissionip siulittaasua Ursula von der Leyen ministeriuneq Mette Frederiksen peqatigalugu Nuummut tikissapput.

    Naalakkersuisut siulittaasuat Jens-Frederik Nielsen (D) Nuup mittarfiani politikerinik nuimasunik marlunnik tikilluaqqusinissamut piareersimassaaq.

    Tikeraarnermi ilaatigut EU-p Kalaallillu Nunaata akornanni suleqatigiinnerup nukittorsarnissaa pillugu ataatsimut oqariartuut atsiorneqassasoq, tikeraarnissaq sioqqullugu Naalakkersuisut nalunaarutigaat.

    EU-p Kalaallit Nunaat nunarsuarmi pissutsit najummassimanartorsiorfiuneranni tapersersorsimagaa, Jens-Frederik Nielsenip tassunga atatillugu innersuussutigaa. Allatut oqaatigalugu Amerikamiut Kalaallit Nunaannik nakkutilliillutillu piginnittuulernissaannik USA-p præsidentiata Donald Trumpip piumasaqaataanik itigartitsinermi EU tapersersuivoq.

    – Nunarsuarmi politikikkut pissutsini EU-p tapersersorluta erseqqissumik avammut nalunaarutigaa, peqatigisaanillu suleqatigiinnerup suli annertunerulersinneqarnissaanik kissaaterput akueraat, taamaammallu ullut aggersuut ataatsimullu oqariartuutip Kalaallit Nunaannut sunniutaanik erseqqinnerusumik oqaluttuarnissaq, assut qilanaaraara, Jens-Frederik Nielsen ataatsimiinnissaq sioqqullugu oqarpoq.

    EU-p Kalaallit Nunaat ukiumut 230 mio. kr-t missaannik tapiffigisareerpaa, EU-llu piffissami missingersuusiorfiani tullermi, 2028-mit 2034-mut ingerlasussami, aningaasat taakku milliartip affanngorlugit marloriaatinngortinneqarnissaat EU-kommissionip siunnersuutigaa.

    Nutaarsiassaqartitsiviup Financial Timesip sapaatip akunnerani uani siusinnerusukkut Ursula von der Leyenip tikeraarnermini Kalaallit Nunaannut aningaasaliissutissat allat saqqummiutissagai, EU-mi tusarfiit ilisimatitsinerat nalunaarutigaa.

Powered by Labrador CMS