KL

DK

Jens-Frederik Nielsen nuannaarlunilu pissangavoq

Ane-Marie Petersen
ilulissat-åbning

Naalakkersuisut siulittaasuat Jens-Frederik Nielsen (D) Københavnimiit Ilulissanut timmisartuussinermut siullermut ilaavoq, Sermitsiallu tusagassiortuata aqqutaani oqaloqatigaa:

- Nuannaarpunga pissangallungali, aammali qilanaarlunga.

- Takorloorsinnaavara inuit nuannaarlutillu nalliuttorsiortut, tikinnissartillu ullormi pingaarutilimmi pissanngatigigaat, oqarpoq nangillunilu:

APEQQUT: Piffissami kingullermi pisoqarfiungaatsiarpoq. Arlaleriarlutit mittarfinni tikilluaqqusaasarpusi, ilaatigut USA-mi isumaqatigiissutip atsiorneqarnerata kingorna Qaqortumilu, mittarfiup ammaanersiorneqarnerani. Tamanna ilinni ileqquliunneqaannarpa?

– Naamik. Pisut annertuut pipput. Tamakkua sungiussassaaneq ajorput. Tamakku tamarmik immikkut misigisassaapput. Qaqortumut tikikkatta innuttaasut isumalluartut takuagut. Isumaqarpungalu nuannaarneq immikkuullarissoq Ilulissani misigiumaarparput, Jens-Frederik Nielsen oqarpoq.

Jens-Frederik Nielsenip qallunaat aningaasaqarnermut ministeriat Peter Hummelgaard oqaloqatigaa. Ilulissani mittarfik danskit naalagaaffiata piginneqataaffigaa, taamaattumillu ullumi ammaanersiornermi Danmarkimi naalakkersuisunit aallartitat aamma peqataapput. Mittarfimmut akuersissummi ilaasut tassaapput mittarfik nutaaq 2.200 meterisut takissusilik, qatserisartut annaassiniarnissamullu sillimaniarneq, isumannaallisaanermut periutsit, mittarfimmi isumannaallisaaneq timmisartullu ingerlaarnerannik nakkutilliineq.

Imarisassat attuumassuteqartut

  • Allunaasaq aappalaartoq kipineqarpoq

    Ane-Marie Petersen

    Ilulissanut aqqummik ammaanersiorneq

    Pisortatigoortumik maanna pivoq. Allunaasap aappalaartup kipineqarnerani, Ilulissanut toqqaannartumik aqqut ammarneqarpoq.

    Air Greenlandimi timmisartoqarfinni pisortaq Sofie Kathrine Holm aamma Birgithe Mølgaard Nielsen, Naalakkersuisumit Iddimanngiiu Jensen Biancomit, Inatsisartut siulittaasuannit Kim Kielsenimit, aningaasaqarnermut ministerimit Peter Hummelgaardimit Air Greenlandimilu pisortamit Jacob Nitter Sørensenimit ikiorneqarlutik allunaasamik aappaluttumik qiorsipput.

    Matumani takuneqarsinnaapput ilaasut siulliit eqimattatut assilitittut. Ilulissani najugaqarput, nuannaarput assilineqareeraangamillu “hurraa hurraa hurraa”-mik suaartarput.

  • Ikisarfik B10 ullaakkut nalliuttorsiortoqarpoq

    Ane-Marie Petersen

    Tiimisartoqarfimmi isaariaq B10 naliginnaasumiit angalasunut nalliuttorsiorpalaarneruvoq.

    Politikerit, atorfilittat tusagassiortullu amerlasuut pisut malinnaavigilluartarpaat.

    Ilaasut tamarmik erfalasumik tunineqarput, aamma smoothie-nik, muffinsinik kaffimillu sassaallerfigineqarlutik.

    Naalakkersuisut siulittaasuat Jens-Frederik Nielsen (D) Københavnip mittarfiani aamma peqataavoq, KNR-imiillu apersorneqarluni.
    Kommunimi politikeri Lene Ravn Davidsen (D) tujuuluaqqamik ullormut atatillugu, atorpoq. Mittarfiliornissamut aningaasaliissutit Inatsisartuni oqaluuserineqarmata taanna pissarsiaraa, taamaattumillu atisaasivimmini ujarsimavaa atorumallugu. Kim Kielsenip allassimasoq "2200 meter" erseqqissarpaa, Lenellu Ilulissani qaartitsinermit siullermit mobilimini assilisaq takutippaa.

  • Mittarfik nutaaq sisamanngornermi ammassaaq – ingerlatsinermut pisortaq mittarfimmi pisoqqami ukiuni amerlasuuni sulinerminut qujavoq

    Morten Okkels

    Greenland Airports Ilulissani mittarfimmi pisoqqami timmisartuussinerit kingulliit ingerlanneqartillugit kaffillerpoq.

    Ingerlatsinermut pisortaq, Marius Møller, ullormut immikkut ittumut atatillugu naatsumik oqalugiarpoq. Taanna 1980-ikkunnili Ilulissani Mittarfimmi sulisuuvoq.

    - Maani inuit amerlasuut nuannersumik tikilluaqquneqarlutillu aliasullutik inuulluaqquneqartut takunikuuakka, Marius Møller katersuuttunut oqarpoq.

    - Maani aamma inuit amerlasuut sulisarsimapput. Ullumikkut taakku immikkut eqqarsaatigaakka. Aamma Grønlandsflymi Air Greenlandimilu sulisimasut maannakkullu sulisuusut eqqarsaatigaakka.

    - Sulisullu ilaqutaasa tapersersuinerannut qujanaq.

    Marius Møllerip Greenland Airportsimut inuulluaqqusinissaa suli piffissaanngilaq. Taanna mittarfimmut nutaamut nuussaaq, ingerlatsinermut pisortatut atorfimmi kinguaariit nikinnerannut ikiuutissalluni.

    Mittarfimmili nutaami mittarfimmi pisoqqami sulisimanermisut sivisutigisumik sulisinnaanissani neriorsuutigisinnaanngilaa. Taama oqarmat katersorsimasut illarlutillu ersaattaapput.

    Paasissutissiiviup isiginnaarutaani takuneqarsinnaavoq timmisartoq kingulleq nalunaaqutaq 15.30 missimasoq. Kangerlussuarmut Nuummullu timmisartuussinerit marluk suli aallanngillat. Taakku aallareerpata mittarfik pisoqaq matuneqarsinnaalissaaq, mittarfimmullu nutaamut nuunnissamut piffissanngussaaq.

  • Mittarfissap illutaa imermik toqqaannartumik pilersorneqassanngitsoq

    Andreas Wille

    Ilulissani mittarfissaq nutaaq 2200 meterisut takitigisoq, pilersaarutaasut malillugit sisamanngornermi atoqqaartinneqassaq. Mittarfissap illutaanut imermik ulluinnarni pilersuineq, biilit imermik assartuissutit atorlugit ingerlanneqartassasoq, Greenland Airports Sermitsiamut ilisimatitsivoq.

    - Mittarfik imermut toqqorsivinnik, tankinik, angisuunik peqarpoq. Taakkua ulluinnarni ingerlatsinermi imermik atuineq mittarfiullu upalugaarsimanerisa imermik atuinerat qulakkiissavaat.

    - Tankit imermik ingerlaavartumik immerneqartassapput. Imeq biilimik imermik assartuummik mittarfimmut assartorneqartassaaq.

    Ilulissani imermik toqqaannartumik pilersuineq killeqarpoq. Mittarfik maanna atorunnaartussaq imermik toqqaannartumik aamma pilersorneqanngilaq. Tamannalu mittarfeqarfiit ingerlataanni allani aamma taamaattartoq, ingerlatseqatigiiffik allappoq.

    Angallannermut aqutsisoqarfiup akuersinissaa mittarfiup ammarneqarnissaanut aalajangiisuussasoq, ingerlatseqatigiiffiup aamma ilisimatitsissutigaa.

  • Ilulissani maanna mittarfiusup affaa aqqusininngussasoq

    Andreas Wille

    Ilulissani imarpik qulaallugu mittarfik pilersaarutaasoq malillugu aqagu sisamanngornermi atoqqaartinneqassaaq. Tamanna isumaqarpoq maanna illoqarfiup mittarfia, 845 meterisut takitigisoq, mittarfittut atorunnaassasoq.

    Mittarfiujunnaartussalli ilaa mittarfittaassamukarnermi imaluunniit mittarfittaassamit illoqarfiliarnermi maanna aqqutigineqartalissaaq. Greenland Airports Sermitsiamut taama ilisimatitsivoq.

    - Maanna mittarfiusup affaa mittarfissamut aqqutinngussaaq.

    Mittarfiup maanna illutaa nassiussaleriffinngussasoq, ingerlatseqatigiiffik Sermitsiamut aamma ilisimatitsivoq. Illuutit allat, soorlu sannaviit toqqorsivittut aamma atorneqalissapput.

Powered by Labrador CMS