19-inik ukiulik Brian Adolfsen Qaqortumi suli ujaarineqartoq

Politiit, qatserisartut innuttaasullu sapaammi ullaakkut qulingiluanut ujaasillutik aallarteqqipput.

Politiit pigaartuisa pisortaat, Poul Kreutzmann Sermitsiamut oqarpoq Qaqortumi quit illullu naqqi ammaannartut ujaasiffigereerlugit - sulili nassaarineqanngilaq.

- Suli nassaarinngilarput, ujaasineq ingerlatiinnassavarput, paasissutissanik nutaanik pissarsinissatta tungaanut. Qaqortumi inuttaasut piumaffigaagut quit kælderitillu misissulaassagaat, Poul Kreutzmann oqarpoq.

Taassuma ilanngullugu paasissutissiissutigaa Qaqortumi innuttaasut nammineq kajumissusertik malillugu ujaaseqataasut, taakkulu Qaqortumi erngup tissaluttup eqqaani naapittartut.

Ilisarnaatit

Brian Adolfsen angissuseqarpoq 175-180 cm missiliorlugu, tuattoq, nujai qernertut takilaartut.

Kingullermik takuneqarami atisat uku atorpai:

• Qaatigooq tungujortoq taartoq
• Qarliit qaamasut
• Gummit kajortut

Innuttaasut, ikinngutaasut, aammalumi ilaqutaasut, ujaarineqartup sumiissinnaaneramik nalunngisaqarunik piaartumik politiinut attaveqaqquneqarput.

 Oqarasuaamut +299 70 14 48 sianertoqarsinnaasoq, Kalaallit Nunaanni Politiit ilisimatitsipput.