”60 Minutes Australiami” peqataasoq: Uukapaatitsiniutaavoq

– Aallakaatitassiami peqataareerlunga asissuiniuterpassuarnit apuussiffigineqarpunga. Minnerunngitsumik kujataamiunit. Ilisimasimasuugukku apersorneqarnera qanoq annertutigisumik killorneqassasoq akuersisimassanngikkaluarpunga, Naleqqameersoq Qupanuk Olsen oqarpoq. 

Taanna Australiamiut aallakaatitamik ”60 Minutes” suliaanni sapaatit akunnerani qaangiuttumi takuteqqaarneqartumi maannamullu YouTubemi 440.000-riarluni takutinneqartumi peqataavoq.

Kalaallit Nunaannit New Yorkimut

Aallakaatitassiami qulequtaqartumi ”Why China and the US fighting over Greenland’s rare earths?” tusagassiortoq Tara Brown Kalaallit Nunaaliartoq malinnaavigineqarpoq, tassani Australiamiut aatsitassarsioqatigiiffiani Energy Transition Mineralsimi aqutsisut ataatsimeeqatigai Narsami suliniummik oqaluttuartillugit.

Kingorna Tara Brownip aqutsisut New Yorkiliaqatigai, tassani aningaasaliisinnaasunik ataatsimeeqateqartut. Aallakaatitassiap ingerlanerani IA-mi Inatsisartunut ilaasortaq Uran Naamimmilu siulittaasuusimasoq Marianeq Paviasen kiisalu Naleqqamit ilaasortaq aatsitassarsiornermi ingeniøri siusinnerusukkullu Råstofstyrelsenimi immikkoortortami teknikkimut nakkutilliinermullu pisortaasimasoq Qupanuk Olsen innuttaasut suliniummik isiginneriaasiat pillugu oqaloqatigalugit.

Aallakaatitassiaq pakatsissutigigaa

– Tara Brownimit oqaloqatigineqareerlunga nuanniitsumik misigaara taassuma aalllakaatitassiamilu sulisut kissaatigigaat aalajangersimasumik akisassasunga. Saqqummiunneqarpunga aatsitassarsiornissamik illersuisutut taamaannngitsunga. Nammineq kujataamiuvunga, Narsamilu ilaqutaqarlunga. Isumaqarpunga suliniummi ataatsimut isigaluni teknikkimut piumasaqaatit malinneqartut taamaattumillu piviusunngortinneqarsinnaalluni, avatangiisinut innuttaasunullu ajoqusiinngippat, soorunamilu taamaallaat innuttaasut kissaatigippassuk, Qupanuk Olsen oqarpoq.

– Aallakaatitassiaq isiginnaarakku pakatseqaanga. Aatsitassarsioqatigiiffimmut TV-kut sunniiniartartunngortinneqarpunga, Qupanuk Olsen oqarpoq, kingorna Tara Brown allaffigalugu akuersaarneqarsinnaanngitsoq Narsami aatsitassarsiornissamut suliniumi illersuisutut saqqummiunneqarsimanini.

– Siunissami sissuernerussaanga suut peqataaffiginerlugit, apersorneqarnikkalu nammineq immiuttalerlugit, taamaalillunga qaqugukkut qanoq akinerlunga uppernarsarsinnaallugu, Qupanuk Olsen oqarpoq.

Oqaluttuaq illuinnaasiortoq ataasiinnarmillu oqariartuuteqartoq

Aamma IA-mit Mariane Paviasen siusinnerusukkut Narsami Urani Naamimmi siulittaasuusimasoq takusaminik naammaginninngilaq.

Apersorneqarnerata nunami ingerlanneqarata saniatigut akunnerni sisamani affarmilu Tara Brown aallakaatitassiortullu umiatsiamik angalaaqatigai, kingornali maluginiarlugu annermik Energy Transition Minerals oqaaseqartinneqartut, ajornartorsiutitullu taagukkani aatsitassarsiorfimmut suliniummullu tunngasut aallakaatitassiami ilaatinneqaratik.

– ­Kingorna aallakaatitassiortunut allagaqarpunga, isumaqarlunga Kuannersuarni suliniummik saqqummiinerat ataasiinnaavallaarlunilu illuinnaasiortoq. Pakatsissutigaara suliniummut akerliuneq sammineqarnerunngimmat, suliniummullu atatillugu aarlerinartorpassuit. Inerneraa Energy Transition Mineralsimit uukapaatitsiniutitut videoliaq. Aqutsisut apersorneqanngillat aatsitassarsiornermik misilittagaat pillugit imaluunniit suliniummi Kinamiit piginneqataasut sunniuteqarnerat pillugu, tamanna apeqqutissaqqeqimmat, Marian Paviasen oqarpoq.

Aallakaatitassiortunit akissut

Mariane Paviasenimut akissummi Sermitsiamit takuneqartumi ”60 Minutes Australia”-mi aallakaatitassiortut allapput oqaluttuarisamik naammagineqannginnera uggorigitsik.

”Isiginneriaatsit arlaqartut tunngaviginiarsimavavut. Aatsitassarsiortuniit innuttaasunut, aammali naalakkersuinermut tunngasut kiisalu nunarsuarmi aatsitassanik qaqutigoortunik pisariaqartitsinermut ilungersunartunullu tunngasut”.

Aallakaatitassiortut nangillutik allapput, aatsitassarsioqatigiiffik ernummatigineqartunik apuussiffigisimallugu, soorlu tamanna Mariane Paviasenip saqqummiussaa ilaatigut apeqqut pillugu, aatsitassarsiorfiup ammasup avatangiisit sequmissanerai.