Air Greenlandip timmisartuussinissat tamaasa taamaatippai

Ullaaq nalunaaqutaq 07.00-nngortoq anori uuttortarneqarpoq.

Nuummi agguaqatigiissillugu 32 knobinik anorlerpoq, 56 knobinik sakkortuumik anorlerluni.

Aammattaaq Kangerlussuarmi anori 38 knobitut sakkortutigissasoq ilimagineqarpoq, kitaatalu sineriaani Nuummiit Ilulissat tungaanut 3.330 meterisut qutsitsigisumi anorersuartassaaq.

Tamanna isumaqarpoq Air Greenlandip timmisartuussinissani tamaasa ullumi sapaammi juulip arferngani taamaatittariaqarai.

- Timmisartuussinissamut pilersaarutit piviusunngortinnissaanut aporfiuvoq. Aallartussarpassuugaluarmatalu angalasussat eqqorneqartut piumaffigaagut mittarfimmukarnissaminnut utaqqilaassasut, angalasut unnuiffissaat suliarigatsigit. Aallartussaagaluillu amerlaqimmata unnuiffissanik pissarsinissaq sivisusinnaavoq.

- Pingaartumik Nuummi angalasussarpassuit pillugit annertuumik suliaqarpugut. Tamanna pillugu tulliani nalunaaqutaq 11.30 nalunaaruteqassaagut, maannakkorpiarli angalasut naammagittaqqullugit qinnuigaavut, Air Greenland Sermitsiamut allappoq.