Aki-Matilda Høegh-Dam:  - Taava aamma danskit misissuutaat nunatsinni atorunnaarlik

Kalaallit angajoqqaat Danmarkimi najugaqartut angajoqqaattut piukkunnassusermut, kulturikkut tulluarsakkamik misissuisarnissamut ineriartortitsinissaq taamaatinneqarmat, Aki-Matilda Høegh-Dam (N) isumaqarpoq nunatsinni misissuutit danskinut tulluarsakkat aamma taava atorunnaarsinneqartariaqartut.

- Naalakkersuisoq aalajangersimassappat immikkut sanasoqannginnissaa pillugu, taava aamma neriuppunga aalajangersimasoq taamannak testerineq nunatsinni aamma unitsinneqassasoq. Suli tamakku testit atorneqartaramik nunatsinni. Ernumagisinnaavara arlaatigut aaqqiissutissamik ujaasisoqannginnera, ujaasisoqassanngippat, Aki-Matilda Høegh-Dam (N) Folketingimi ilaasortaq Sermitsiamut oqarpoq.

Naalakkersuisup kissaatigimmagu unitsikkaat

Isumaginninnermut ineqarnermullu ministerip Sophie Hæstorp Andersenip (S) ilisimatitsissutigaa, misiliummik nutaamik kalaallisut naleqqussaasumik ineriartortitsineq unitsinneqartoq. Tamanna nunatsinni Naalakkersuisut kissaataat malillugu pinerarpaa.

Folketingimi Kalaallit Nunaat pillugu ataatsimiititaliamut isumaginninnermullu ataatsimiititaliamut allakkani tamanna atuarneqarsinnaavoq. Tarnip pissusaanik misissuinerit kalaallisut nutserneqarnissaannut naleqqussaanissaannullu suliniuteqaqqittoqarnissaa kalaallit tungaannit kissaatigineqanngimmanngooq.

Taava nunatsinni misissuutit danskinut naleqqussagaasut aamma atorunnaarsinneqartariaqartut, Aki-Matilda Høegh-Dam (N) isumaqarpoq.

- Ilumut taava aalajangivittoqarpat naalakkersuisuninngaanniit taakku testit suliarineqassanngiivittut, taava aamma inatsisinngortinneqarniarli atuussinnaanngitsut qallunaanut naleqqussakka testit nunatsinni, atortaraat nalunngilagut meeqqanut allaat nunatsinni.

Aki-Matilda Høegh-Damip aamma ilisimatitsissutigaa Naalakkersuisunut apeqquteqarniarluni.