Amerlanerit aningaasanoorajunnermik ajornartorsiuteqarlutik katsorsartittalersut

Allorfik 2024-mut ukiumoortumik nalunaarutini saqqummerseqqammerpaa, tassani qanoq amerlatigisut kikkullu katsorsartittarnersut takutippaa.

Siorna 2024-mi katsorsartittut 26 %-ii aningaasanoornermik ajornartorsiuteqartut, 2020-mullu sanilliullugu 6 %-imik amerlanerusut, Allorfik paasissutissiivoq.

-  Taama amerleriaateqarnerat naatsorsuutigineqareersimasutut oqaatigineqarsinnaavoq, internetti atorlugu aningaasanoortarneq annertuumik atugaaleraluttuinnarmat, aamma tamakkununnga takoqqusaarusiortarneq annertooq ingerlanneqarmat.

Ikiaroornartumik ajornarsiuteqartut katsorsartittut

Allorfiup aamma paasissutissiissutigaa 2024-mi innuttaasut aanngajaarniutinik annertuumik pinngitsuuisinnaajunnaarsimasut amerlanerit katsorsarneqartut, naak katsorsartittartut 2023-mi katsorsarneqarsimasut amerlaqataasut maanna aalaakkaasumik inissisimaleraluartut.

-  Imigassamik ajornartorsiuteqarneq katsorsartinniarlutik saaffiginnittartut amerlanerpaat suli ajornartorsiutaanni initunersaavoq, kisianni amerlasuut tassunga ilutigitillugu hashimik aamma aningaasanoorajunnermik ajornartorsiuteqarput.

 Aanngajaarniutinut arlariinnut katsorsaasarneq akulikippoq.

Imigassamik ajornartorsiuteqarlutik katsorsartittut 36 %-ii aamma hashimut ajornartorsiuteqarput. Hashimik ajornartorsiuteqartut 64 %-ii aamma imigassamik ajornartorsiuteqarput. 

Aningaasanoornermik ajornartorsiuteqartut 35 %-ii aamma hashimik Pinngitsuuisinnaajunnaarnermik Paasisimasaqarfik ajornartorsiuteqarput, taamattuttaarlu aningaasanoornermik ajornartorsiuteqartut 67 %-ii aamma imigassamik ajornartorsiuteqarlutik.

Katsorsartittuni maanna siullerpaamik affai sinnerlugit – 54 %-it – siornatigut katsorsartereersimasuupput. 

- Aanngajaarniummik ajornartorsiuteqarneq anigoruminaatsuuvoq, taamaammat qujanaannarpoq amerlasuut ikiorneqaqqikkusullutik saaffiginneqqittarmata. Siornatigulli nalunngilarput katsorsartinneq innuttaasup inuunerani sorpassuartigut ajunngitsumik sunniuteqartartoq .

– Soorunami pitsaasumik sunniuteqarnera annertunerussangaluarpoq katsorsarneqarnermi pitsaasumik naammassinninneq attanneqartuuppat, Allorfiup pisortaa, Efraim Olsen, oqarpoq

Naartusut amerlanngitsut katsorsartittarput

Ukiuni kingullerni tallimani arnat 92-it – tassa ukiumut 20-it ataallugit – Allorfimmi katsorsartissimapput. 

Inuiaqatigiinni aanngajaarniutit ajornartorsiutigalugit atugaanerat eqqarsaatigalugu amerlanngillat, minnerunngitsumik naartuuneq aamma meeraaqqap inuunerani ukiut siulliit meeqqap inuunermini ineriartornissaanut isumaqarluinnarmata.

 Arnat naartunngitsut assersuutigineranni naartusut katsorsarneqartut meeraanerminni artornarnerusunik atugassaqarlutik peroriartorsimapput. Tamanna ilisimatuussutsikkut paasisat tamarmik takutippaat. 

- Allorfik 1. januar 2025-mit peqqinnissaqarfimmut ilaalermat suliassatta ilaat tassaassaaq Allorfiup suliniutaata aamma naartusunut kiisalu mikisunut angajoqqaajusunut isumassuinerup nukittorsarnissaa. Suleqatigiinnissaq qilanaaraarput.