Qeqqata Eqqartuussiveqarfia ulluni maajip 13-ani, 14-ani, 15-anilu annertuumik suliaqassaaq.
Angut maanna 37-inik ukioqartoq Sisimiuneersoq pisimasunut katillugit 66-inut eqqartuussivimmi sassartinneqassaaq.
Qeqqata Eqqartuussiveqarfia ulluni maajip 13-ani, 14-ani, 15-anilu annertuumik suliaqassaaq.
Angut maanna 37-inik ukioqartoq Sisimiuneersoq pisimasunut katillugit 66-inut eqqartuussivimmi sassartinneqassaaq.
Unnerluussut Sermitsiap pissarsiaraa, tassanilu nukappiaqqat aqqanillit, 13-iniit 17-inut ukiullit pineqarput, piffissami 2021-mit 2024-mut.
Unnerluussisussaatitaasut naapertorlugit nukappiaqqat arlalitsigut kannguttaatsuliorfigineqarsimapput. Ilaatigut angut unnerluutigineqarluni kannguttaatsuliorsimasutut, eqqissisimanermik akornusiisimasutut, inuusuttup assinganik kinguaassiuutitigut tunngasunik siammarterisimasutut, atoqatiginninnissamut saasaarisimasutut, pinngitsaaliilluni atoqatiginnissimasutut, kiisalu inuusuttumik akiliilluni atoqateqarsimasutut.
Videot katillugit ulluni 41-uni sivissusillit
Unnerluussummi allassimasut naapertorlugit unnerluutigineqartoq toqqorluni videonik immiussisarsimavoq, ilaatigut kannguttaatsuliornini immiuttarsimallugit. Nalunaaqutaq itersaat qernertumik qalipaatilik videomik immiussissutilik atorsimallugu. Unnerluutigineqartup qarasaasiaa, oqarasuaataa angallattagaq, harddisk kiisalu USB-lu arsaarinnissutigineqarput.
Videot arsaarinnissutigineqartut katillugit ulluni 41-ni, akunnerni 12-ini, minutsini 22-ini sekundinilu 36-inik sivisussuseqarput. Unnerluussisussaatitaasullu naapertorlugit videot 18-it inorlugit ukiulinnut tunngasunik imaqarput.
Taarsiiffigitinnissaq nakorsaanerullu oqaaseqaataa
Suliaq aamma Københavnimi Statsadvokatimut ingerlateqqinneqarsimavoq, unnerluussisussaatitaasullu nakorsaanerup oqaaseqaataa suli utaqqivaat. Kingorna unnerluutigineqartoq qanoq pineqaatissinneqassanersoq paasinarsissaaq.
Unnerluussisussaatitaasulli unnerluutigineqartoq katillugit 229.000 koruuninik pineqartunut arfineq-marlunut taasiissasoq piumasaraat.
Unnerluutigineqartoq assingusunut inatsisinik unioqqutitsisimasutut ilisimaneqartoq, Kalaallit Nunaanni Politiit uppernarsarpaat.
Unnerluutigineqartup kinaanera saqqummiunneqaqqunagu aalajangiisoqarsimammat Sermitsiap unnerluutigineqartup kinaanera saqqummiutinngilaa.
