MALUGIUK: Eqqartuussinermi allakkiami paasissutissat sakkortuut Sermitsiap saqqummiuppai, atuartunut sakkortusinnaammata mianersoqqussutigaarput.
Ulloq 16. april, 2023 nalunaaqutaq ualikkut ataatsip missaani ataataq paninilu marluk sisorarlutik aneertillutik qimminit 15-init upanneqarput. Tamanna Nalunnguarfiup imeqarfiullu akornanni Sisimiuni pivoq.
MALUGIUK: Eqqartuussinermi allakkiami paasissutissat sakkortuut Sermitsiap saqqummiuppai, atuartunut sakkortusinnaammata mianersoqqussutigaarput.
Ulloq 16. april, 2023 nalunaaqutaq ualikkut ataatsip missaani ataataq paninilu marluk sisorarlutik aneertillutik qimminit 15-init upanneqarput. Tamanna Nalunnguarfiup imeqarfiullu akornanni Sisimiuni pivoq.
Eqqartuussinermi allakkiaq Sermitsiap pissarsiaraa, tassanilu allassimavoq qimmit ilaqutariit tungaannut ingerlammata ataataasoq allamut sangusoq, qimmilli malinnipput, kingornalu ataataasoq meeraalu qimminit 15-init upanneqarput.
Ataataasoq upanneqarnermini timimigut arlalinnik ajoquserpoq, niumigut, talimigut assamigullu saamerlikkut mersorneqartariaqakkanik.
Pania itisuunik kilertiterpoq, qungatsimigut, niaqqumigut, siutimigut, talimigut, isimigut niumigullu. Arlalinnillu mersorneqartariaqarsimalluni.
Paniata aappaa aamma ajoquserpoq, taanna niaqqumigut, pukusumigut, talimigut naamigut niumigullu.
Upassineq siullermiinngitsoq
Unnerluussut Sermitsiap aamma pissarsiaraa, tassani allaqqavoq ataataasoq paniilu saassunneqarnerisa siuliani qimmit inunnik allanik aamma upannissimasut.
Sapaatip akunnerisa pingasut siulianni, tassa marsip 26-anni 2023-imi inuit marluk aamma qimminit imeqarfimmi upanneqarput.
Allassimasut naapertorlugit arnap qimussit tuniminiittut maluginiarpai. Qimussillu qanillimmata illikarput, illikareeraluartulli qimmit malinniinnarput, tassanilu arnap ernera ersilerpoq qimaalerlunilu.
Arnaq erninilu marluullutik nissumikkut suliarineqartariaqartunik ajoquserput.
Alla apriilip qulingani 2023-imi Kangerlussuarmi pivoq. Tassani arnaq Kangerlussuarmi qimmilivimmit qimaasariaqarsimavoq, qimminit qulinit ikinnerunngitsunit saassunneqarnialerami.
Eqqartuussut
Qeqqata Eqqartuussivia isumaqarpoq unnerluutigineqartup ilisimannittullu nassuiaataasa uppernarsaraat unnerluutigineqartup qimmii unnerluussutini tamani kiisortuusut.
Angut pisuutinneqarluni eqqartuunneqarpoq, 3.300 koruuninik 3.200 koruuninillu akiligassinneqarluni.
Taassuma saniatigut qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat naapertorlugu ukiuni tallimani qimminik atuisinnaatitaassanngilaq.
Pineqaatissiissut ukiuni tallimani misiligummik pineqaatissinneqarnermini assingusumik pinerluttuliorsimanngippat pineqaatissiissut atorunnaarsinneqassaaq.
Pineqaatissinneqartoq pisimasuni tamani pinngitsuunerarpoq, eqqartuussulli akueralugu. Eqqartuussut Unnerluussisussaatitaasut Nunatta Eqqartuussisuuneqarfianut suliareqqitassanngortippaat.
