Aningaasaataaruttoq – eqqagassalerinermik ingerlatseqatigiiffik millionilikkaanik pisariaqartitsisoq

Kommunit eqqagassalerinermik ingerlatseqatigiiffiat ESANI A/S qaammatini tulliuttuni pilersuisunut akiligassani akilersinnaassagunigit 30 millionit koruuninik amigaateqarpoq.

Kommuneqarfik Sermersuumi Aningaasaqarnermut Inuussutissarsiornermullu Ataatsimiititamut paasissutissiinermi, februaarip 19-ianni oqaluuserineqartumi, ima allassimavoq:

- Sanaartornermut atorallagaasut taarsigassarsianngortinneqassapput sivisuumik taarsersugassanngorlutik. Sanaartukkalli inaarnissaat qulakkeerniarlugit piginnittuniit katillugit 20 mio. koruuninik saniatigut aningaasaliisoqarnissaanik pisariaqartitsisoqalerpoq. Sanaartornermut massakkut atorallagaasut marts 2025-p tungaannaanut matussutaasinnaapput. Tamatuma kingorna sanaartornerit naammassinissaannut aningaasat amigaatigineqalissapput. 2025-mi marsip qaammataanni Nuummi ikuallaavimmut 18 mio. koruuninik apriilip qaammataanni Sisimiuni ikuallaavimmut pisiortorfigisanut inaartitsinermut akiliisoqarnissaa 2025-mi juulip qaammataani 15 mio. koruuninik saniatigut akiliisoqarnissaa naatsorsuutigineqarpoq, kommunaldirektøri Ole Jakobsen ataatsimiititaliami politikerit allappoq.

Aningaaseriviit oqaloqatigineqartut

Eqqagassalerisut ESANI-p aningaasalersuinermut aaqqissuussineq pillugu Grønlandsbankenimut Bankivimmullu oqaloqatiginnissimavoq, aningaaseriviilli "aningaasaleeqqitsinnatik saniatigut aningaasat pisariaqartinneqartut ilaannik pisortat matussusiinissaat piumasaraat."

Taamaattumik kommunit piginnittut akisussaassuseqartumik taarsigassarsiatut 5 mio. koruuninik ilassuteqassasut ESANI A/S-imi siulersuisunit nalilerneqarpoq.

Kommunit katillugit ESANI-mi 52 mio. koruuninik aningaasaliissuteqarput, aamma Avatangiisinut Aningaasaateqarfik "50 mio. koruuninik tapiissuteqarput ilaatigut ingerlatseqatigiiffimmi akisussaassuseqartumik taarsigassatut ilanngunneqarnissaannik", Suliassamik saqqummiussinermi allassimavoq, tassani kommunit tamarmik immikkut taamaalillutik ESANI-mi 25,5 mio. koruuninik aningaasaliissuteqartut ilanngullugu paasissutissiissutigineqarluni.

Aningaasat sinneri aningaaseriviit imaluunniit KommuneKredit aqqutigalugu aningaasalersinniarneqarnissaat kissatigineqarpoq.

- Nuummi ikuallaavissami sanaartornermut aningaasartuutit 60%-ii Nykreditimut sanaartornermut taarsigassarsinikkut aningaasalersugaareerput. KommuneKredit aqqutigalugu Sisimiuni ikuallaavissap - ikuallaaviilluunniit marluusut tamarmik - sivisuumik aningaasalersugassanngortinneqarsinnaanerat ESANI-mit misissorneqalerpoq. Taama iliornikkut "ingerlatseqatigiiffiup atorallakkanut aningaasartuutai ikilisinneqassapput taamalu eqqagassalerineq kommuninut akikinnerulissalluni.

Paasissutissat sukumiinerusut

Aningaasaqarnermut ataatsimiititalimi politikerit ilaasortat suliaq kommunalbestyrelsimut ingerlateqqinneqassasoq aalajangerpaat.

- Kommunalbestyrelsip aalajangiinnginnerani kissaatigineqarpoq, paasissutissanik sukumiinerusumik suliamut tunngasunik pissarsisoqassasoq, ataatsimiinnermit imaqarnialiami allassimavoq.