Arctic Circle Track pisortatigoortumik ammarpoq

Sisimiuni  Oqummiannguup Tasiata eqqaani seqinnarissuaq. Ippernat timmioraarput, motorerpalaarlu tusarsaalluni.

Inuit aggiapput - inuusuttut, utoqqaat, ilaqutariit, takornariat alapernaattut aamma ATV-nik piginnittut. Arctic Circle Track, Sisimiut Kangerlussuullu akornanni ATV-nut aqqut ammalerpoq.

Aqqut, 170 kilometerit missaani isorartutigisoq, qaqqat tatsillu akornatigut ingerlaartoq Sisimiut Kangerlussuarlu atalersissavai, innuttaasunut takornarianullu periarfissanik nutaanik ammaassisuussalluni.

Borgmesteri Malik Berthelsen qungujulalluni oqalugiarfissaminukarpoq. Inuimmi suli aggiapput.

 - 5 minutsit qaangiuppata oqalugiassaanga, suli inuit aggiagamik, oqarpoq. 

Nalunaaqutaq ualikkut pingasunngorpoq, suli seqinnarippoq allaaqqeqalunilu. katersuuffimmi silaannaq oqippoq.

Oqalugianngilaattaa Sermitsiap naapippaa:

- Kiisami, aamma inuit taama amerlatigisut najuuttut takullugit nuanneq, suliffiup suli naligigaluaraa, borgmesteri qungujulluni illalaarluni oqarpoq.

Minutsit tallimat qaangiummata oqalugiartussanngorpoq. Ukiorpassuit utaqqisimasani. Suliniut ukiut qulit sinnerlugit suliaavoq, aqqutaali suli sivisunerusimalluni.

- Oqartariaqarpugut: Kiisami! Tassami una suliaq annertooq kommunalbestyrelsiusimasunit, Hermannikkut suleqataasalu aallartisarsimasaat ukiuni arlalissuarni ingerlanneqareerluni ullumikkut atoqqaartissinnaanngorparput.

Qeqqata Kommuniani pisortaanerup tullia, Laust Løgstrup immikkut qujaffigaa, suliniut piviusunngortikkumalugu ulapissimaqimmat. Aqqullu inuussutissarsiornermut aamma periarfissiissaaq.

- Tassami aqqusineq nunarsuarmioqatitta aningaasanik akiliillutik misigerusutaannik assigiinngitsorpassuarnik neqeroorutinik periarfissiisussaavoq. Soorlu ATV-inik, UTV-nik cykelinik pisummik imaluunniit Tasersuartigut qajartornermik qissattariartortitsinerluunniit misigisassarsiortitsinissamut.

-  Sapiissuseqarisi

Arctic Circle Track inuussutissarsiornermut periarfissiissammat innuttaasut sapiissuseqaqquai:

- Taamaattumik Sisimiuni nunaqqatikka, kaammattorusuppassi illoqarfitta Sisimiut ineriartortinneqarnissaa anguniarlugu periarfissat ullumikkut ammartut atorluarlugit sapiissuseqaqqullusi, borgmesteri oqarpoq innuttaasullu nuannaarlutik ersaattaatilerput.

Suliaq politikkikkut assoroorfiusoq

Naalakkersuisoq Aqqaluaq B. Egede oqalugiarnermini ilaatigut eqqaavaa suliniutip politikkikkut assoroorfiusimanera: 

 - Aqqusineq qiviarlugu eqqarsarpunga Inatsisartoqarfimmi Naalakkersuisoqarfimmi aningaasanik inatsimmi suliaqarnermi isumaqatiginniarnerpassuarni ila qasseriarluni aalassatsinnikuunerpaatigut. Utereeqaasi aamma naammassineqarnissaata tungaanut sukataarsimaqaasi. Partiit aporfiginagit. Partiit ilaanni allaat iluminni avissaartuunneranni kinguneqartarnikuummat immaqa partiini tamangajanni.

Hermann Berthelsen: - Upperivara

Ullup massuma tikinnissaanut utaqqisimaqisut ilagaat, borgmesteriusimasoq, Hermann Berthelsen, taanna ammaanersiornermi peqataavoq. Hermann Berthelsen 1999-imiit 2017-ip tungaanut borgmesteriuvoq, taanna Sisimiut Kommuneugallarmat Qeqqatalu Kommuniata inissinneqarnerani borgmesteriuvoq. Taassuma Sermitsiamut oqaluttuaraa ullormut peqataaneq nuannersuusoq:

- Nuannersorujussuuvoq, aamma taamani aallartivinneqarmat upperalugu, nalunagu akerassarsiorfiginagu ilissarfiorfigalugu inuit tamarmik qinikkat allanngorartuarmata, taassuma suliarinninnera ilumoorsimasoq ullumikkut atoqqaartinneqarnerani malunnarsivoq, taamaammat nuannaartorujussuuvunga.

- Ullaaq iterama soorunami oqarpunga “seqinnerpoq!", tassa aamma pinngortitarmi atorneqartussaagami isumaqataasimagami taamatut pivoq.

Utoqqaanersaasoq qiorsisoq

Sisimiuni innuttaasuni utoqqaanersaat, Julie Beck, 96-inik ukioqartoq ammaanersiornermi qiorsisuuvoq. Taassuma sanianiippoq Laura Blytmann Berthelsen, Qeqqata Kommuniani kommunaldirektørip sulisuinut pisortaasup panigaa, taanna kalaallisoorpoq qiuutillu akisilerlugit paaralugit.

Assiliiviit ulapputigineqarput, nipaallivoq. Qilerullu qiorneqarmat motorit ikinneqarput. Arctic Circle Track pisortatigoortumik ammarpoq.

Nuannanneq

Sermitsiaq borgmesteri Malik Berthelsen inooqataalu kiisalu naalakkersuisoqarfimmi pisortaq, Ruth Lindhardt peqatigalugit UTV-nut ilaavoq.

Isikkivimmut 20 kilometerisut isorartugisumik ingerlaarpugut. Isikkivik ukiukkut tikinneqartartoq, maanna aasakkut aamma tikinneqarsinnaanngorpoq.

Aqqutaani ATV-ut UTV-llu 150-ut missaaniittut  naapippavut, aamma sikkilertut. Isikkivimmut apuukkatta nipilersorpalaaq, kaffi, sodavandit, oqalualaarpaluk illarpalaarlu tusarsaapput.

Else Olsen Sørensen ernuttani ilagalugu nikorfavoq. Taassuma Sermitsiamut oqaatigaa ilaquttanilu ukiukkut snescootererlutik Isikkiviliartarsimallutik:

- Misigisaq eqqumiik. Ukiumi maannartaratta, massakkut maannarluni misigisaq eqqumiivataarluni aasaanerani ippernat akornanni maanga ingerlaarluni alutornavippoq. Nunarsuaq aamma aasaanerani eqqumiippoq ingerlavigalugu. Alutornaq nuan’...!

- Soorunami pitsaanerusinnaaguni aamma ajunngilaq. Kisianni aqqutigalugu aamma sungiunniagassaavoq, soorlu oqareernerattuut aaqqitassaqarpoq aamma aaqqitassat aaqqissajunnarsivaat.

Bo Lings: - Ataatama 70-kkunnili oqaluuseraa

Bo Lings, Sirius Greenlandimik hotelimillu piginnittuusoq peqataasuni ilaavoq.

Ullaaq iterami piareersarnissaq eqqarsaataaniippoq:

- Eqqarsaatiga siulleq tassaavoq ullormut piareersarnissaq. Ulloq nuannisarfigisussaagatsigu. Suliffeqarfimmik maskiinanik tuniniaanermik ingerlataqarpunga. Taamaattumik pingaaruteqarluinnarpoq, Sisimiunut suliffeqarfitsinnullu ineriartortitsisussaq. Tuniniaanikkut takornariaqarnikkullu.

- Uagutsinnut periarfissarujussuuvoq. Ataatama 70-kkunnili aqqut oqaluuserisareerpaa - maannakkullu tassa piviusunngorpoq. 

Taassuma oqaluttuaraa aamma kommunaldirektøri ammaanersiornermi takkuttoqarpiannginnissaa ernumagisimallugu. Ammaanersiornermili inoqarluarpoq, ATV-ut UTV-llu sumi tamaani takussaallutik.

- Nunap timaa kikkunnut tamanut periarfissaavoq - aamma umiatsiaqanngitsunut. Illoqarfimmut torraalluinnarpoq.

Nalunaaqutaq tallimanngortoq Sisimiunut uterpugut. Tikillutalu nal. 17.59.