Arnat inuussutissarsiornermi piginnaanngorsarniarlugit attaveqaqatigiittarfik nutaaq
Arnat inuussutissarsiortut ataatsimoorlutik suleqatigiinnissamut periarfissaat nutaaq, BPW Greenland, Arnat ulluanni marsip arfineq-pingajuanni saqqummiunneqarpoq. Peqatigiiffik nutaaq nunarsuaq tamakkerlugu attaveqaqatigiittarfimmut BPW Internationalimut ilaavoq, arnallu paasissutissanik pissarsinissamut, siunnersorneqarnissamik nunanilu tamalaani attaveqarnissamut periarfissaalluni.
Arnat attaveqaqatigiinnikkut, siunnersuinikkut nunarsuarlu tamakkerlugu pisinnaasat atorlugit aningaasaqarnikkut, suliffimminni aqutsinermilu piginnaanngorsarneqassapput.
Tamanna siunertaralugu arnat inuussutissarsiutillit attaveqatigiittarfiat pilersinneqarpoq.
- Nunarsuarmi arnat nukittunerulernissaat, inuussutissarsiornermi suliffeqarnikkullu periarfissaat siuarsaarniarlugit BPW Internationalip suliniutaata Kalaallit Nunaanni immikkoortortaqarfissaa, BPW Greenlandimik atilimmik, nunarsuaq tamakkerlugu arnat ulluanni marsip arfineq-pingajuanni pilersinneqarnera tulluusimaarutigaarput.
- Immikkoortortaqarfik nutaaq atorlugu arnat Kalaallit Nunaanni attaveqaqatigiinnissamut, suleqatigiinnissamut, paasissutissanik pissarsinissamut nunarsuarmilu tamarmi attaveqaqatigiinnermut periarfissaqalissapput, Maja Marie Lyberth aamma Joanna Hutchins tusagassiuutinut nalunaarummi allapput.
Suliniut Impact Greenlandimik piginnittumiit Maja Marie Lyberthimit aamma Royal Greenlandimi EVP-imit Joanna Hutchinsimit aallartinneqarpoq.
- BPW Greenlandimik pilersitsinikkut arnat maani najugallit sakkussanik, attaveqaatinik aamma atorfimminni qaffakkiartornissamut suliffimminnilu pitsanngorsaanissamut pisariaqartitaannik nunarsuarlu tamakkerlugu attaveqarnikkut periarfississinnaagivut, Maja Marie Lyberth oqarpoq.
Joanna Hutchins aamma ima oqarpoq:
- Suliniut una najukkami attaveqaqatigiinnermik pitsaanerusumik pilersitsinissamik aqqutissaavoq, ilaasortallu BPW-p nunarsuaq tamakkerlugu suliniutai aqqutigalugit arnat nunarsuaq tamakkerlugu attaveqarfiginissaannut periarfissillugit.
Ilaasortat hunnoruju tuusindikkaat
BPW International nunat 90-it sinnerlugit 250.000-init amerlanerusunik ilaasortaqarpoq, suliniaqatigiiffillu arnat aningaasaqarnikkut isumalluuteqannginnissamik, aqutsinermik naligiissitaanermillu siuarsarneqarniaat suliniutigalugu. Suliniaqatigiiffik Naalagaaffiit Peqatigiinni siunnersortitut inissisimaffeqarpoq, nunarsuarlu tamakkerlugu arnat pisinnaatitaaffiinik pitsanngorsaaniarluni suliniuteqarluni. BPW Greenland aqqutigalugu kalaallit arnat inuussutissarsiortut, suliffillit aamma ilinniartut maanna attaveqaqatigiittarfimmut nukittuumut tamatumunnga ilanngunnissamut periarfissaqalerput.
BPW Greenland paasissutissiillunilu oqaloqatigiinnissamut ammasumik marsip 26-ani nal. 16:30-18:00 Royal Greenlandip qullersaqarfianut qaaqqusivoq. Soqutiginnittut peqatigiiffik pillugu, ilaasortaanerup iluaqutissartai aamma BPW International aqqutigalugu periarfissat pillugit paasisaqarnerusinnaapput.
