Asiap paasissutissat pissarsiarilersinaalersikkusukkai - taamaattoqassappalli aningaasaliisoqartariaqarpoq
Asiaq - Misissueqqaarneq - silap pissusianut erngullu pissusianut paasissutissaatini tamanut ammasumik saqqummiukkusuppai. Deloittep misissuinerata nutaap takutippaa taamaaliorneq Kalaallit Nunaanni inuiaqatigiit aningaasaqarneranni ukiuni tallimani 12 millionit koruunit angullugit iluanaaruteqalersitsisinnaasoq – piffissarlu ungasinnerusoq eqqarsaatigalugu ukiumut 10 millionit koruunit angullugit.
Assi: Asiaq
Silaannaap pissusaanut imernullu tunngasut tamanut akeqanngitsumik pissarsiarineqarsinnaaleraluarpata, tamanut pitsaassagaluarpoq.
Periarfissarli tamanna atorneqassappat aningaasaliisoqartariaqarpoq. Paasissutissanik suliareqqiineq pitsaassutsinillu qulakkeerinninneq, ingammik paasissutissat nutaannginnerit pillugit – aningaasaliisoqaqqittariaqarpoq.
- Asiaq-ip paasissutissaataat suliareqqinneqarpata tunniunneqarlutillu, taava nunat tamalaat akornanni pisortaqarfiit akornanni pissuserineqartoq maliinnarneqassaaq, ukiuni qulikkaani kingullerni paasissutissat tamanut saqqummiussorneqarput. Tunngavissaq ersarippoq: Paasissutissat inuit aningaasaataat atorlugit katersorneqarsimappata, taava inuiaqatigiit tamakkiisumik iluaqutigisariaqarpaat, Asiaq-mi piosrtaq Mette Skarregaard Pedersen tusagassiuutitigut nalunaarummi allappoq.
Minguitsumik ingerlatsineq
Asiaq-ip silaannaap imernullu paasissutissanut tunngasut ukiorpassuarni misissorsimavai, suliniutinik suliaqartunit soqutigineqarluarlutik.
- Nunani allani misilittakkat takutippaat paasissutissat akeqanngitsumik pissarsiariuminarsarneqarsimatillugit, inuiaqatigiinni aningaasaqarnermut tamanna iluaqutaasartoq, taamaalilluni tamanut saqqummiiniarnermi aningaasartuutit sipporlugit iluanaartoqartarluni.
- Silaannaap pisussaanut imermullu paasissutissat attuumassusillit tunniunneqarnissaannut siammarterneqarnissaannullu pingaarnersiuinermi, Kalaallit Nunaat piujuartitsinerusumik tunngaveqarluni silaannarmullu mianerinninnerullu ingerlariuseqarsinnaaneranut alloriarneq pingaarutilik tiguneqassaaq – paasissutissanillu tunniussineq aningaasaqarnikkut inuiaqatigiinnilu iluanaarutigineqarsinnaasut annertuut periarfissaalissapput.
Aningaasaliineq aqqutissaavoq
Akeqanngitsumik tamanut pissarsiarineqarsinnaalissappata aningaasaliisoqarnissaa pisariaqarpoq - paasissutissat suliareqqinnerannut, pitsaatsummik qulakkeerinninnissamut, ingammik paasissutissat nutaanngitsut eqqarsaatigalugit. Aningaasaliineq aningaasaqarnermut inatsisissami imaluunniit aningaasaateqarfiit, soorlu EU-p aningaasaliineratigut pisinnaasoq, pisortaq allappoq:
- Periarfissarli tamanna atorneqassappat aningaasaliisoqartariaqarpoq. Paasissutissanik suliareqqiineq pitsaassutsinillu qulakkeerinninneq, ingammik paasissutissat nutaannginnerit pillugit – aningaasaliisoqaqqittariaqarpoq. Aningaasaliineq aningaasanut inatsit imaluunniit aningaasaateqarfiit avataaneersut ass. EU-mit aningaasaliissutit aallaavigalugit pisinnaavoq.
- Paasissutissanik siammarterinissamut saqqummiinissamullu aningaasanik pisariaqartitsisoqarpoq, taamaalilluni atuisut paasissutissanik eqqortunik suliniummut aalajangersimasumut pisariaqartinneqartunik pissarsinissaat qulakkeerneqarsinnaalissaaq.
Asiaq suliffeqarfiuvoq Naalakkersuisut ataanni namminersortitaq, suliffeqarfimmit Kalaallit Nunaata nunap asseqarnissaa aammalu avatangiisit tigussaasut pillugit paasissutissat siammarterneqarnissaat sulissutigineqarpoq. Suliffeqarfiup siunertaa tassaavoq Kalaallit Nunaanni inuiaqatigiinni ineriartornissamut paasissutissanik siammarterineq.
