Ataatsimiititaliaq suliffissanik nittarsaassiffissamut suliamut nutaamut apeqqusiisoq

Naalakkersuisut suliffissanik nittarsaassiffimmik nutaamik pilersitsinissaq pillugu Aningaasaqarnermut Akileraartarnermullu Ataatsimiititaliamit apeqquserneqarput.

Naalakkersuisut suliniummut 4,9 millionit koruunit aningaasaliissutigerusuppaat, ataatsimiititaliamiilli taanna akuersissutiginagu Naalakkersuisunut apeqquteqartoqarpoq.

Suliffissanik nittarsaassivimmik nutaamik ineriartortitsillunilu ingerlatsisussaq Kalaallit Nunaanniinnersoq, nunami allamiinnersoq sumiiffimmiillu suminngaanniit aqunneqassanersoq ataatsimiititaliap ilaatigut paaserusuppaa.

Suliffissanik nittarsaassivimmik nutaamik inerisaallunilu ingerlatsinissamik suliassaq, suliffeqarfimmik nunatsinniittumik isumagineqarsinnaanersoq Naalakkersuisunit misissorneqarsimanersoq ataatsimiititaliap aamma akissutiserusuppaa.

Pisortaaneq: - Paasiuminaappoq

Apeqqutit akineqarnissaasa tungaannut Aningaasaqarnermut Akileraartarnermullu Ataatsimiititaliap isummernissani kinguartippaa.

Tusagassiorfimmi Sermitsiami pisortaanerup Masaana Egedep Naalakkersuisut suliamut tunngatillugu iliuusaat isoraa. Naalakkersuisut suliffissanik nittarsaassivimmik nutaamik pilersitsiniarnerat imminut aaginnarnerusutut taavaa.

- Paasiuminaappoq. Aningaasarsiutigalugu taama ittunik suliaqartuusugut arlalioreerpugut, niuernermilu atugassarititaasut malillugit sulisarluta. Namminersorlutik Oqartussat imminut aaginnarlutik unammillernialersaarpatigut. Tamanna Naalakkersuisut politikkiannut akerliuvoq, Masaana Egede oqarpoq.

Nuussineq nunaqavissunit isornartorsiorneqartoq

Suliffissaq.gl-imik piginnittup Johannes Qvist-Markussenip Naalakkersuisut suliffissanik nittarsaassivitsik, Suli.gl, ukioq manna siusinnerusukkut atorunnaarseriarlugu qallunaat Jobindexiannut CV-t tamarmik nuunnerat siusinnerusukkut isornartorsiorpaa.

- (...) Kalaallit sulisussarsiortarfiat qallunaanut ingerlatseqatigiiffimmut tunniunneqarnera, naak Naalakkersuisut naapertorlugit tamanna aaqqiissutaagallartoq soorunami pakatsinartorujussuuvoq.

- Tamatuma kingunerisaanik suliffeqarfiit nunaqavissunit pigineqartut siornatigornit unammillerneqarnerulerput, tamannalu akuerineqarsinnaanngilluinnarpoq, Johannes Qvist-Markussen taamani oqarpoq.

Suli.gl-ip suliassaasa Jobindex.gl-imut nuunneqarnerat utaqqiisaasumik 2025-p naanissaanut atuuttoq, Isumaginninnermut, Suliffeqarnermut Nunamullu Namminermut Naalakkersuisoqarfiup ilisimatitsissutigaa.

Naalakkersuisut suliffissanik nittarsaassivittaava kingorna saqqummersinneqassaaq.