Blok 2-p silataa nutarterneqassasoq

Namminersorlutik Oqartussat inissiaataat attartortittakkat, inissiaatileqatigiiffimmit Ini A/S-imit aqunneqartut, ajorluinnartumik inissisimaffeqarput. 

Aningaasallu kisimik aaqqiissutissaanngillat.

Iluarsaassinerit annertuut suliarineqaraangata sanasut sulineranni inissiaqarfimmi najugallit iniminniit nuuttariaqartarput. Inissaaleqisoqarnerali pissutigalugu attartortut nuunnissaat ajornakusoortarlunilu suliaq arriitsumik ingerlasarpoq, inigineqarallarsinnaasummi amigaataapput. Iluarsartuussinermi taanna aporfiusartoq Nuummiinnaanngitsoq - inissaaleqisoqarnerpaaffimmi - nunami tamarmi atuuppoq.

Taamaattumik Nuummi Blok 2-mi silataata taarsersorneqarnissaa immikkut maluginiagassaavoq. Iluarsartuussinerup annertuup ingerlanneqarnerani ineqartut iniminniiginnassapput. (Inissiami 44-nik initalimmi inoqutigiit arfiniliinnaat, inissiamut isersinnaanerat piffissami sivikitsumi periarfissaassanngimmat, taamaallaat nuutsikkallarneqassapput). 

Oquk akisusoq

Iluarsartuussinernili sanasut suliaqarnerini najugaqartut ilaat iniminniiginnarsinnaanngillat. Inissiap ilua oqoqarpat ineqartut allamut nuutsillugit suliarineqartarpoq.

Ineqarnermut, Attaveqaatersuutinut, Isorliunerusunullu naalakkersuisoqarfik suliniummik »Inissiat Qungujulasut«-mik 2015-imi aallartitsivoq. Suliniummi inissiat peqqinnanngitsut kajungernarpallaanngitsut peqqinnartunngorlugit najugaqarfigiuminartunngornissaat siunertarineqarpoq. Uffarfik, igaffik naterlu peerneqassapput nutaarluinnarnillu taarserneqassallutik. Taakkua saniatigut inissiaq tamarmi qalipanneqassaaq. Init ilaanni matu silarleq, inip iluani matut iikkamullu qalissiat taarsersorneqassapput.

- Inissiat qungujulasut tassaapput ini tamakkiisumik nutartigaq. Inimut iseraanni qungujulanartut, immikkoortortaqarfimmi pisortaq Embla Kristjánsdóttir nassuiaavoq.

Suliniut aallartimmalli Nuummi inissiat 276-it oqoqartut katillugit 119,2 millionit koruuninik akeqartumik iluarsaanneqarput imaluunniit agguaqatigiissillugu inissiap ataatsip iluarsaanneqarneranut 431.884 koruuninik akeqarluni.

Suliniut suli ingerlavoq, maannamullu inissiat 17-it katillugit 10,1 millionit koruuninik akeqartut ukioq manna iluarsaanneqarsimalerput, inissiallu 14-it maannakkorpiaq iluarsaanneqarlutik.

Nuummi inissiat 37-t oqoqarnerat pissutigalugu maanna inuttaqanngitsut Inissiaatileqatigiiffik Ini A/S paasissutissiivoq. Init ilaat ukiut marluk affarlu inigineqanngillat, attartortullu piffissami tassani allamut inissikkallarneqarnikuullutik.

– Taamaattumik naalakkersuisoqarfiup 2025-p naanissaata tungaanut inissiat 20-40-t suliariumannittussarsiuunneqarnissaat pilersaarutigaa. Iluarsaassineq taanna 2025-mi aallartinnissaa naatsorsuutigineqarpoq, 2026-milu naammassineqassalluni. Suliassanik taakkuninnga suliariumannittussarsiuussineq sanaartornermik ingerlatsisut mikinerit pisariaqartitaat malillugit aaqqissuunneqassaaq, inissiallu amerlassusaat naatsorsuutigineqarsimasut suliarineqarnissaat sanaartornermik ingerlatsisut piginnaasaat apeqqutaassapput, Embla Kristjánsdóttir Sermitsiamut ilisimatitsivoq.

Kiassarnermut akiligassat annikinnerusut

Nuummi Blok 2 1968/69-imi sanaaq pisoqalisimaqaaq. Qalia, matui, igalaavi silataalu pisoqalisimaqigamik ussiittarput, taamaammallu iluarsaanneqartariaqarluni.

Ineqarnermut, attaveqaatersuutinut, isorliunerusunullu naalakkersuisoqarfiup qallunaat suliffeqarfiutaat Taasinge Elementer A/S suleqatigalugu periuseq nutaaq misilittassavaa, tassa blok 2-p qaliaanik, igalaavinik, silataatungaalu sanariikkanik taarsersorneqassallutik.

Blok 2-p Nuuk Centerillu akornanni krani iluarsartuussinissamillu atortussat Taasinge Elementerimik meqqillit iliorarneqarsimapput. Sanasullu inissiap silataatungaanittut iikkat piiariarlugit nutaanik taarsersorpaat.

- Suliniut najugaqartunut silaannarinnerusumik pitsaanerusumillu ineqalernerannik kinguneqaannarani kiassarnermut aningaasartuutinut sipaaruteqarnermik aamma kinguneqassasoq naatsorsuutigineqarpoq, Embla Kristjánsdóttir nassuiaavoq.

Inissiami isaariat nutaat ussiittarunnaarneranik kinguneqassaaq. Kiassarnerlu ullumikkornit annikinnerusumik aniasalissalluni. Suliniummut nalilersuinermut atatillugu naalakkersuisoqarfiup qanoq sipaaruteqartoqalernera misissussavaa. Tamannalu ullumikkut pingaaruteqarpoq, kiassarnermummi akiliut ilaqutariit ineqarnermut aningaasartuutaannut tamarmiusunut annertusaammat. Uuliasioqatigiiffik Polaroil maajip 13-iani ikummatissap akianik qaffaavoq, Nukissiorfiillu juulip aallaqqaataani kiassarnermut akimik aamma qaffaalluni. Kiassarnermut aningaasartuutit qaffassimanerat aggustimi akiligassami takuneqarsinnaavoq, tassa juulimi atuinermut naatsorsuinermi. 

Ineqarnermut akiliutit nikiseqqinneqassanngitsut

Kiassarnermut akiliutit qaffakkiartorput, akerlianilli nunami politikerit 2022-mi januaarip aallaqqaataaniilli Namminersorlutik Oqartussat inissiaataanni, inissiaatileqatigiiffimmit Ini A/S-imit aqunneqartuni, ineqarnermut akiliutit nikisinneqaqqissanngitsoq aalajangerpaat.

Inissianut akiliutit qaffanneqanngippata inissiaatileqatigiiffiit inatsisitigut piumasaqaatit aningaasaqarnerup oqimaaqatigiissaarneqarnissaanut tunngassuteqartut naammassinissaat ajornakusoortissavaat, nunallu karsiata inissiaatileqatigiiffiit ajornartorsiortut ikiorniarlugit iliuuseqarpoq: Ukiuni sisamani 2022-miit 2025-mut ineqarnermut akiliutit allanngortinnagit ingerlatinnissaannut katillugit 20 millionit koruunit immikkoortinneqarput.

Piffissarli taanna killeqarpoq.

Namminersorlutik Oqartussat inissiaataanni ineqarnermut akiliutit ukiuni 15-ini 2027-miit 2041-mut 3,8 procentimik qaffanneqarnissaat ineqarnermut aaqqissuusseqqinnermi siorna siulittuutigineqarpoq.