Borgmesteri Avannaata Kommuniani angalalersoq

Avannaata Kommuniani inuuttaasut qinigaaffiup siuliani borgmesterimit tikinneqartannginnertik isornartorsiutigisareerpaat. 

Ukioq mannali borgmesterimik takunissaat periarfissanngorpoq. Borgmesterinngorlaammi, Lars Erik Gabrielsenip (S) Avannaata Kommuniani illoqarfiit nunaqarfiillu tamaasa umiatsiamik tikinnialikkersaarpai.

Angalaneq juunip qaammataata aallartisimalaarnerani pissaaq, siullertut Ilulissat eqqaani nunaqarfiit tikinneqassapput. Kingorna avannarparterlutik Uummannamut nunaqarfiinullu, Upernavimmut Qaanaamullu ingerlaassapput.

- Neriuppunga illoqarfiit nunaqarfiillu tamaasa tikissinnaassallugit. Uannut pingaaruteqarpoq innuttaasut siunissamut eqqarsaataat tusassallugit, suleqatigiissaagut, borgmesteri Sermitsiamut oqarpoq.

Kommunip avinnissaanut kissaat

Qinigaaffiup siuliani nunaqarfinni aqutsisut borgmesterimit tikinneqartannginnertik pillugu isornartorsiuisareerput. Tamanna Lars Erik Gabrielsenip allanngortikkusuppaa.

Kommunit 2009-imi sisamanngorlugit kattussuunneqarmata Qaasuitsup kommunia 2018-inimi marlunngorlugu avinneqarpoq. Tassani Avannaata Komunia Kommune Qeqertalllu pilersinneqarput.

Ukiullu ingerlaneranni sumiiffinni politikerit innuttaasullu Avannaata Kommunia avikkusullugu oqaatigisarpaat. Avannaata Kommuniani kommunimi pisortaanerup, Nick Nielsenip oqaatigaa kommunip avinnissamut periarfissat misissorneqarnerat piariilersoq, suliarlu Naalakkersuisunut aalajangiiffigisassatut tunniunneqarsimasoq.

Avannaata Kommuniani innuttaasut novembarip 26-anni innuttaasunik taasititsipput, tassani taasisut 92 %-ii kommunip avinneqarnissaa kissaatigaat.

Avinnissaq eqqarsaataajunnaassasoq kissaatigigaa

Borgmesterilli kommunip avinnissaanut eqqarsaat allanngortissagaat neriuutigaa. 

- Taava neriuutigaajuk avikkumajunnaassasut?

-  Uagut massakkut kommunalbestyrelsimi qinikkatut sulilernitsinni isumaqatigiissutigisarput unaavoq ajornanngippat aamma neriuppugut ima pitsaatigisumik suliaqarsimassasugut, allaat misigisimasoqassanngitsoq avinnissamut eqqarsaat naammassineqassasoq, Lars Erik Gabrielsen oqarpoq nangillunilu: 

-  Ataatsimoorsinnaanermut arlaatigut oqariartortoqalissappat uagut suliassatsinniippoq. Avissartoqarusussappalli, uagut isummerfigisussaanngilarput. Nuna tamakkerlugu inatsisiliortut suliassarigamikku. Tassa imaappoq uagut suliatsigut uuttorneqarusuppugut iliuuserisagut ataannarnissamut pitsaasuusut.

Taassuma ilanngullugu oqaatigaa imaanngitsoq innuttaasut isumaannik allanngortitsiniarsariniartut. Takutikkusunnerarpaali kommunerujussuugaluarluni aamma pitsaasumik angusaqartoqarsinnaasoq.

-  Imaanngitsoq taamaalititsiniarsaraluta, kisianni aamma innuttaasut misigisimasariaqarmata pitsaasumik angusaqartoqarsinnaasoq kommuni taama isortutigigaluarluni. 

- Neriuppugut uagut imatut suliarput inerneqassasoq eqqarsalersitsisimallunilu pitsaasuunersoq avissaarnissarput. Pissutigalugu ukua aningaasatigut sunniutigisinnaasai avissaarnissamut nunaqarfiit illoqarfillu ilaannut annertoorujussuarmik pitsaanngitsumik kinguneqartussaanerat eqqarsaatigalugu, taava uuttorneqarusuppugut aamma kommunerujussuulluni ajunngitsoq, Lars Erik Gabrielsen oqarpoq.