Danmarkimiit qinersiniaruit kinguarsarpallaarniaqinak
Qinersisinnaatitaaguit aamma Danmarkimiit nunanilu allaniit qinersisinnaavutit. Nallernissaali utaqqiniaqinagu.
Kalaallit Nunaanni qinersiviup allakkatigut taasinerit kingusinnerpaamik ullormi qinersiffiusumi tigusussaavai.
Assi: Emil Helms/Ritzau Scanpix
Kalaallit Nunaanni qinersisartut marsip 11-ani Inatsisartunut qinersissapput. Kommunini nunaqarfinnilu aqutsisunut ilagiinnilu siulersuisunut apriilip aallaqqaataani qinersisoqassaaq.
Taamaakkaluartoq piffissami matumani Kalaallit Nunaanniiginnartariaqarnak aamma Danmarkimit nunarsuarmilu sumiiffinnit allanit qinersisinnaavutit.
Soorunami Kalaallit Nunaanni qinersisinnaatitaanerit suli atuuttoq piumasarineqarpoq.
Immaqa assersuutigalugu ulluinnarni Kalaallit Nunaanni najugaqarlutit piumasaqaatinik eqqortitsivutit imaluunniit Danmarkimut nuussimallutit qinersisartut allattorsimaffianniiginnarnissannut akuerisaasimavutit.
Piaartumik taasigit
Danmarkimi kommunit innuttaasut nalunaarsorsimaffiat innuttaasunullu sullissivik qinersinissaq sioqqullugu kalaallinut qinersisartunut ammatippaat.
Kalaallit Nunaanniit napparsimasutut uninngaguit Rigshospitalimi napparsimmavinnilu allani qinersinissamut ikiorneqarsinnaavutit.
Sivisuallaamik utaqqineq sianiilliornerummat aamma eqqaamajuk.
Tassami qinersissutit Kalaallit Nunaannut nassiunneqassagami qinersivimmi nalunaaqutaq 20.00 kisinneqarnissamut piareeqqasariaqarpoq. Taamaalillutik taasinerit kingusinaarluni tunniunneqartut timmisartut taamaatiinnarneqarneri allakkatigulluunniit nassiussinermi ajornartorsiutit allat pissutigalugit asuliinnartinneqarsinnaapput.
Nunanut allanut angalaguit Danmarkimi aallartitaqarfinni konsulateqarfimmilu qinersisinnaavutit. Minnerpaamik sapaatip-akunnera sioqqullugu qinersinissaq Nunanut allanut ministeriaqarfiup innersuussutigaa. Tassa kingusinnerpaamik marsip 4-ani Inatsisartunut qinersisoqassaaq marsillu 25-ani kommuninut qinersisoqassalluni.
