Demokraatit siulittaasuat: Trumpip naalagaasuuguni oqartussaaffigilereeraluarpaatigut

USA-p præsidentiata Donald Trumpip nunatta qanoq innera pillugu sapaatip-akunnerani matumani oqaaserisai kingulliit uissuumminarput.

Pissutsit, ingammik præsidentip nunanut allanut tunngasutigut pissusilersornera iliuuserisimasaalu eqqarsaatigalugit, Kalaallit Nunaannut ilungersunartut Demokraatit siulittaasuat Jens-Frederik Nielsen isumaqarpoq:

- Maanngaanniit mianersortariaqartugut isumaqarpunga, aamma inuit toqqissisimajunnaarnerat paasilluarsinnaavara.

- Uagut politikerit siuttuusariaqarpugut. Trumpip tikeraarnissaanik kajumissaarineq nuannaarutiginninnerlu unitsittariaqarparput, Jens-Frederik Nielsen oqarpoq nangillunilu:

Tamanna pimooruttariaqarparput. Pinnguarnerunngilaq. Ikanngilagut. 

- Eqqisseqateqatigiinnissaq saqqumilaanngitsumik isumaqatigiinniutigineqarli

Apeqqut: Trumpip piffissami kingullermi iliuuserisimasai pissutsinik ilungersunarnerulersitsisut pillugit oqaaseqartutit tusarpakkit?

- Aap, Ukrainemi præsidentimut pissusilersornera eqqarsaatigiinnaruk. Præsidenti nunamini eqqissinissaq anguniarlugu ullorpassuarni sorsussimasoq præsidentimiit, akerartorneqarlunilu pakasarneqartoq, taassumalu kinaassusivini takutillugu eqqisseqatigiinnissamik suliniuteqarneq saqqumilaanngitsumik isumaqatiginninniutinngortippaa.

- Ukrainemut, ullut tamaasa kiffaanngissuseqarniarluni sorsuttartumut, tapersersuiuassaguni nunap ataa piumavaa, Jens-Frederik Nielsen oqarpoq.

Donald Trumpip nunat killermiut allat assigalugit Ruslandip iliuusiinut akerliuniarluni demokratiimik kiffaanngissutsimillu illersuinini ersersissimasuuppagu pissutsit allaanerusimassagaluartut isumaqarpoq.

- Oqartussaaffigilissagaatigut

USA-p “arlaatigut” Kalaallit Nunaat tiguarniaraa, aammali oqaatigaa USA-p kalaallit siunissaq pillugu namminneq aalajangiisinnaanerannik kissaataat tapersersortaraa Trumpip oqalugiarnermini oqaatigaa.

Nalunaarut tamanna Jens-Frederik Nielsenip paasiuminaatsutut oqaatigaa, isumaqarporlu Trumpip Kalaallit Nunaata kisimiilernissaa siunertarigaa:

- Isumaqarpunga isertuussaqartoq. Sooq namminiilivinnissaq tapersersorpaa? Danmarki avaqqullugu toqqaannartumik saaffigisinnaaniassagamitigut, sunneriaannaassagattalu. Pisoorsuanngussasugut peqqusaarluni oqaluppoq. Taamatut

sunniiniarsaraluta aalajangiiniarsaraatigut.

„Kisimiilerutta oqartussaaffigilissavaatigut, taamaammallu unikaallattariaqarpugut, Jens-Frederik Nielsen oqarpoq nangillunilu:

Pissaanilissuit utaqqiinnalerput. Eqqortumik ataatsimoorlutalu iliuuseqartariaqarpugut. Partiit politikkerillu ataasiakkaat qanorluunniit isumaqaraluarlutik taassuminnga ilassinninnerat pissutsinut iluaqutaanngilaq.

Politikeri naapertorlugu Kalaallit Nunaata nunanut allanut tunngasutigut politikkiani aallaaviusariaqartoq tassaavoq Múte B. Egedep arlaleriarluni oqartarsimaneratut Kalaallit Nunaat kalaallit pigigaat:

Tamanna tunngavigalugu iliuuseqartariaqarpugut, naalagaaffissuarnillu oqartussaaffigineqarataqinagatta taamaaliornissamut tuaviukulussanngilagut.

- Taassuma (Trumpip, aaqq.) naalagaasuuguni oqartussaaffigilereeraluarpaatigut.