Ilimanami uuliakoorneq piiarneqanngitsoq: - Timmissat toqorarput
Ilimanami uuliakoortoqarsimavoq. Fabruaarilli aallaqqaataanili uuliakoorneq suli salinneqanngitsoq, Ilimanami aalisartoq isumaqarpoq. Timmissallu toqungasut siumugassaallattaalermata iliuuseqartoqartariaqarsoraa.
Foto: Samuel Villadsen
Ilimanami Nukissiorfik februaarip aallartilaartoq uuliakoorpoq.
Uuliakoornerlu suli salinneqanngitsoq, Ilimanami aalisartoq, Samuel Villadsen Sermitsiamut oqarpoq.
Taassuma oqaasii naapertorlugit uuliakoortoqarmalli suli saliisoqanngilaq, tamannalu pinngortitamut kingunerluttalersoq oqaatigaa.
- Timmissat toqungasut siumugassaalerput. Politiinut saaffiginninnikuuvunga, paasitinneqarpungalu Avannaata Kommuniata Namminersorlutillu Oqartussat akisussaaffigigaat. Kisianni suli ulloq manna suli iliuuseqartoqanngilaq, Samuel Villadsen Sermitsiamut oqarpoq.
- Nakkutigaarput
Sermitsiap Avannaata Kommunia attaveqarfigaa. Kommunillu ilisimatitsissutigaa orsussaq 4000 literisut annertutigisoq Ilimanami maanngaannaq kuutsittoorneqarsimasoq, tamannalu ilisimaneqartoq.
- Piffissami tassani qatserisartut iliuuseqarsimasinnaasimanngillat, sikuunera peqqutigalugu. Pisup kingorna kuuffigineqarsimasoq nakkutigineqarnikuuvoq. Nalilersorneqartuarluni iliuuseqarfingineqarsinnaanngornersoq.
- Kuuffiusimasoq saqqummeriarpat iliuuserisassamik nalilersuisoqaqqittussaavoq. Ilimanami nunarfimmi aqutsisut pisimasumut ilisimatinneqarnikuuvoq. Ilisimatitsissummilu tipi sivisusinnaasoq ilimasaarutingineqarluni, Avannaata Kommunia allappoq.
