Imarsiornermi arnat amerlanerulersut

Imarsiornermik Ilinniarfimmi, Nuummi Paamiunilu ilinniarnerit assigiinngitsorpassuit imarsiornermut, aalisarnermut piniarnermullu tunngasut neqeroorutigineqarput.

- Ukiuni kingullerni ilinniagaqarniarlutik qinnuteqartartut amerlanerulernerat maluginiarparput. Arnat amerlanerusut aamma qinnuteqartalerput, Imarsiornermik Ilinniarfimmi allaffimmi pisortaq Vivi F. Broberg oqarpoq.

Ilinniakkat soqutigineqarluartut

 Umiarsuarni assartuutini aamma Royal Arctic Line suleqatigalugu umiarsuarmi inuttatut tunngaviusumik ilinniartitsineq neqeroorutigineqartarpoq. Aalisarnermi inuussutissarsiutigalugu aalisarnermi tunngaviusumik ilinniartitsisoqartarpoq kiisalu umiarsuup qaavani qalulerisutut aamma qalorsuarnik aqutsisutut ilinniartoqarsinnaalluni. Taakku saniatigut aqumiutut ilinniartitsisoqartarpoq, aalisarnermut aamma assartuutinut sammisunik. Taakkunani pineqarlutik aalisariutini naalaganngorniarneq 3. grad, aalisariutini naalaganngorniarneq 1. grad kiisalu sinersortaammi naalaganngorniarneq aamma sætteskipperitut ilinniarneq.

Vivi F. Brobergip ilisimatitsissutigaa inuussutissarsiutigalugu aalisarnermut tunngaviusumik ilinniarneq maannakkut soqutigineqarnerpaasoq, tassanilu juulimi ilinniartut 17-it aallartipput, taakkunannga ataaseq arnaalluni. Umiarsuarmi inuttatut misilittagaqanngitsunut tunngaviusumik ilinniarnermi ilinniartut 14-it aallartipput, taakkunannga sisamat arnaallutik.

Aalisariutini 3. gradimik naalaganngorniat arfineq-pingasuupput, taakkunannga marluk arnaallutik. Aalisariutini 1. gradimik naalaganngorniatut ilinniagaqartut aqqaniliupput, taakkunannga ataaseq arnaalluni. Umiarsuarmi inuttatut misilittagalittut ilinniarnermi ilinniartut sisamat aallartipput, taakkunannga marluk arnaallutik. 

Georg Stage-mit Royal Arctic Linemut

Arnat Imarsiornermik Ilinniarfimmi ilinniakkaminnik naammassinnittut ilaat tassaavoq Aima Heilmann 24-nik ukiulik, ukioq manna juunimit sinersortaatip naalagaatut imminut taasinnaalersoq.

– GUX-ereerlunga umiarsuarmi ilinniarfiusumi Georg Stagemi umiartorpunga, tassani umiarsuarmi inuttatut misilittagaqanngitsutut ilinniarlunga. Kingorna Royal Arctic Linep umiarsuaani Nanoq Arcticami inuttanngorpunga. Paasilerpara umiartorneq nuannaralugu, taamaattumillu umiarsuarmi aquttut ilaat oqaloqatigaakka umiarsuaatilinni ilinniarnissannut tunngasunik. Kajumissaarneqarlungalu Imarsiornermik Ilinniarfimmut qinnuteqarlunga, juunimilu sinersortaatinut naalakkatut naammassivunga. Sætteskipperimut maanna ilinniarpunga, taannalu aappaagu aasakkut naammassissavara, tamatumalu kingorna umiartoqqaartussaassallunga.

- Ullut ilaanni aquttunngornissara kissaatiginartissinnaavara, Aima Heilmann oqarpoq, taassuma nunap immap tungaanit qimerloornissaa nuannarisaqaa.

– Umiarsuarmiinneq nuannareqaara. Soorlu puaasap iluaniittutut ikkami. Aammattaaq sulinerup nalaani sumiiffiit allat takunissaat nuannaraara. Nunaqarfinnut illoqarfinnullu assigiinngitsunut angalanitsinni Avannaani, Tunumi Kujataanilu angalasarnikuuvunga. Iluliarsuit alutornartut takusimavakka nunallu kusanartut angalaffigisimallugit, ingammik Tunumi.

Arnat angutit silarsuaanni

Umiartortut amerlanersaat angutaapput, Aima Heilmannilli tamanna soqutigivallaanngilaa. Arnanilli allanik inuttaqaraangat nuannarisarpaa.

– Umiartortilluni angutinut arnanullu tunngasut eqqarsaatigineqarpallaarneq ajorput. Soorunami ilaannikkut arnat amerlanerusut umiarsuarmi oqaloqatigineqarsinnaannginnerat nuanniilliuutaasarpoq. Aammali misigisimasannut ilaavoq arnanik arlalinnik inuttaaqateqarlunga. Soorlu assersuutigalugu Siuana Arcticami ataasiarlunga angalaqataaninni aquttoq anneq aamma aquttoq arnaapput taakkulu saniatigut uagut arnat pingasut aamma umiarsuup qaamiuulluta. Tamanna allaanerulaarluni nuanneqaaq, Aima Heilmann oqarpoq.