- Inatsisit naapertuutinngitsut pissutigalugit suliffeqarfiga matusariaqalissavara

Akileraartarnermut inatsit nutaaq Inatsisartunit aappaagu akuerineqarpat, suliffeqarfimmut nutaanik piginneqateqarsinnaalernissaq ajornakusoornerulissaaq. Tamatuma kingunerisaanik ukiualuit qaangiuppata suliffeqarfiutiga immaqa matusariaqalersinnaavara. Tamanna sulisutsinnut najukkamilu innuttaaqatigiinnut ajoraluartumik sakkortuumik eqquissaaq.

K’itdlak’ Knudsen, Nuummi innaallagisserinermik suliffeqarfimmi Carl Lynge ApS-imi pisortaallunilu kisimiilluni piginnittuusoq, Sermitsiamit apersorneqartilluni taama oqarpoq.

Taanna Nunatsinni suliffeqarfinnik namminersortunik mikisunik anginerusunillu piginnittut amerlasuut akileraarutitigut eqqugaasinnaasut ilagaat.

Inatsit nutaaq 2026-mi akuersissutigineqartussatut naatsorsuutigineqartoq

Suliffeqarfippassuit ukiuni aggersuni akileraarutitigut eqqugaasinnaapput.

Akileraartarnermut inatsisip nutaap kinguneranik taama pisoqarsinnaavoq, Naalakkersuisummi immikkut ittumik akileraarummik atuutilersitsiniarmata, akileraartarnermut inatsit nutaaq Naalakkersuisut suliffeqarfiit namminneq aningaasaataannut immikkut ittumik akileraarusiinissaannik kinguneqartumik, tassa nuunnermut akileraarummik.

Naalakkersuisut inatsisissatut siunnersuutaat, qaammatini kingullerni inuussutissarsiortunit sakkortuumik isornartorsiorneqarsimasoq, 2026-p aallartinnerani Inatsisartuni akuerineqarnissaa naatsorsuutigineqarpoq.

Siunnersuut piviusunngorpat Qallunaat allallu nunanit allaneersut Nunatsinni ingerlatseqatigiiffinnut aningaasaliissutaat namminneq aningaasaataat 17-19 procentimik akileraaruserneqarsinnaalissapput, ingerlatseqatigiiffimmi aqutsisut Danmarkimi nunaniluunniit allani najugaqarpata imaluunniit Nunatsinnit nuukkunik.

Piginneqateqateqalerusuttoq

52-inik ukiullip K’itdlak’ Knudsenip suliffeqarfiutimi immikkut ittumik akileraarummit eqqugaanissaa imaluunniit matusariaqalernissaa ernumassutigaa.

Qitornakka marluk qulingiluaannarnik aqqaniliinnarnillu ukioqaramik, taamaattumik suliffeqarfik kingornunnavianngilaat ingerlateqqinnaviarnagulu.

- Ukiut 22-t sinnerlugit suliffeqarfimmik kisimiillunga aqutsigama. Kaffimik equutissanillu nammineerlunga pisiniartarlunga, sullitanullu akiligassat isumagisarlugit neqeroorusiortarlungalu. Tamakku pissutigalugit akisussaaffimmik tiguseqataasinnaasumik suliassanillu isumaginnissinnaasumik piginneqateqalerusuppunga.

Imalu nangilluni:

- Qallunaat innaallagisserinermik suliaqartut suliffeqarfiutaat anginngitsoq pisiortornermut, naatsorsuusiornermut, neqeroorusiornermut, suliniutinik aqutsinermut ilinniartunillu ilinniartitsinernut, assersuutigalugu Danmarkimi suliffimmik misiliinernut assigisaannullu tunngatillugu ikiorsiisinnaavoq.

- Qanittukkut qallunaamit innaallagisserisumit soqutiginnittumit saaffigineqarpunga, taannalu ingerlatannut aningaasaliissuteqarusulluni. Kalaallinik innaallagisserisunik soqutiginnittunik tutsiuttoqanngilaq, oqarpoq.

K’itdlak’ Knudsenip aamma ilisimatitsissutigaa, aatsaat innaallagisserisutut akuersissuteqaraanni suliffeqarfimmik innaallagisserivimmik ingerlatsisoqarsinnaasoq, taamaattumillu kikkunnulluunniit tamanut tuniniarsinnaanagu.

Tulluusimaarutiginnittoq

Inuussutissarsiornermik ingerlatsisup taassuma suliffeqarfik innaallagisserivik Carl Lynge ApS 2003-mili ingerlatarilerpaa. Suliffeqarfik ukiut 50-it sinneqartut atuutereersimalerpoq. Suliffeqarfik taanna Nuummi qullersaqarfilik Paamiunilu immikkoortortaqartoq qulingiluanik sulisoqarpoq, marlunnillu ilinniartoqarluni.

- Innaallagisserisutut ilinniakkannik naammassinneqqammerlunga, ukiut 22-t sinnerlugit matuma siornagut innaallagisserivik pisiaraara. Suleqatit pikkorissut peqatigalugit, suliffeqarfik naqqaniit ineriartortippara.

- Suliffeqarfik uannut suliffiinnaanngilaq. Inooriaasiugami aamma soraarnerussutisiaqalernissannut katersiffittut isigaara.

- Ineriartortissimasara tulluusimaarutigaara Ingerlateqqinneqarsinnaannginnissaa paasillugu annernarpoq, pisortaq oqarpoq.

- Suliffeqarfik inatsisissamit nutaamit maannakkut eqqugaassanngilaq, Inatsisartunimi suli akuersissutigineqanngimmat. Innaallagisserisorli soqutiginnittoq Qallunaaq siunnersortiminit inatsisissatut siunnersuut pillugu Nunatsinnilu qanoq pisoqarumaarneranik ilisimatinneqarsimavoq.

K’itdlak’ Knudsenip oqaatigaa, Qallunaap innaallagisserisup takusinnaalluaraa, piffissap ingerlanerani K’itdlak’ Knudsen pisortatut tunuarpat, piginneqataasorlu Carl Lynge ApS-imi pisortanngussappat qanoq pisoqassanersoq.

Tamatuma kinguneranik inatsisissatut siunnersuut naapertorlugu, ingerlatseqatigiiffiup aqutsisui Danmarkimut nuussimasutut isigineqassapput, naak Qallunaaq piginneqataasoq Danmarkimi najugaqartuaannarsimagaluarpalluunniit. Taama pisoqarpat Nunatsinni akileraaruseriffik akiliisitsisussanngussaaq.

Taamatuttaaq innaallagisserinermik ingerlatsivimmi pisortat marluk, tassa K’itdlak’ Knudsen Qallunaarlu piginneqataasoq, aamma taama pineqassapput. K’itdlak’ Knudsen piffissap ingerlanerani soraarpat, Qallunaarlu piginneqataasoq Nunatsinni suliffeqarfimmi kisimi pisortaalerpat akileraartarnermut aamma sunniuteqassaaq.

Taamaattumik piginneqataasup nammineq toqqarsinnaasaminik pisortanngortitsisinnaannginnissani kissaatiginngilaa.

- Taamaattumik suliffeqarfinnut nunanit allameersumik piginneqataasoqalernavianngilaq, K’itdlak’ Knudsen nassuerpoq.

Tamatumali nassuerutiginissaa nuannarinngilaa. Immaqali kisimiilluni innaallagisserivimmik ingerlatsiinnartariaqalersinnaassalluni, piffissalli ilaani tunniutiinnartariaqalersinnaalluni innaallagisserivillu matusariaqalersinnaallugu.

Oqariartuut

K’itdlak’ Knudsenip Sermitsiaq aqqutigalugu sinerissami suliffeqarfiutilinnut tamanut, taamaalillunilu Nunatsinni tamarmi suliffeqarfiutilinnut, suliffeqarfiutimminnik tunisinissaminnik eqqarsaateqartunut erseqqissumik paasiuminartumillu oqariartuuteqarusulluni oqaatigaa.

- Inatsit akuerineqassappat tamatuma kinguneranik Nunatsinni najugaqartuinnaat suliffeqarfimmik pisisinnaalissapput.

- Pisisoq nunami allami najugaqarpat, tassa Danmarkimi nunamiluunniit allami najugaqarpat, suliffeqarfik nammineq aningaasaatimi 17 procentiinik immikkut ittumik akileraartinneqassaaq. Carl Lynge ApS-imut tamanna 1 millionit koruunit missaannik akeqassaaq. Tamatuma kinguneranik tuninissaa ajornarluinnangajappoq.

- Tamatuma akerlianik suliffeqarfik arriitsumik aningaasaataarutsinneqarpat matuneqarlunilu, immikkut ittumik akileraartoqassanngilaq. Tamanna uannut annernassaaq, naak aningaasaqarnikkut aaqqiissutissatut pilerinaraluartoq.

- Taama pisoqarpat, sulisukka suliffeerutissapput aamma Nunarput suliffeqarfimmik ataatsimik annaasaqassaaq, K’itdlak’ Knudsen oqarpoq.

Inatsisip aningaasaleerusuttut ernumalersikkai

Nunatsinni suliffeqarfiit piginneqataasunut Danmarkimiittunut nunanilu allaniittunut tunineqaraangata, immikkut ittumik akileraaruserneqartalernissaannik, Naalakkersuisut inatsisissatut siunnersuuteqarniartut taassuma tikkuarpaa.

- Inatsit suliffeqarfinnut Nunatsinni pilersinneqarsimasunut taamaallaat eqquissaaq. Inatsisissatut siunnersuut uatsinnut namminersortutut inuussutissarsiuteqartunut maani Nunatsinni najugalinnut naleqqutinngilluinnarpoq, K’itdlak’ Knudsen oqarpoq.

- Suliffeqarfimmik aallartitserusuttut Nunattalu avataanit aningaasaliiffigineqarnissaminnik pisariaqartitsisut inatsimmit aamma eqqorneqassapput. Taakkumi namminersortunngornissaminnik takorluugaat inatsimmit qaminneqassapput.

- Suliffeqarfinnut mikisunut anginerusunullu Nunatsinnit qimarratsitsiniartumik inatsisiliornissaq torrallataanngilaq, K’itdlak’ Knudsen oqarpoq.

Taassuma pisariaqartitaa tassaavoq, suliamut ilisimasaqartumik piginneqateqalernissaq, innaallagisserinermilu suliffeqarfimmut makkununnga nukittorsaataasinnaasussaq, atortussanik pisiniarnermut, qarasaasialerinermut, naatsorsuuserinermut sanaartornermullu aqutsinermut tunngatillugu innaallagisserinermik suliffeqarfimmik pitsanngorsaasinnaasumik. Inuussutissarsiornikkut ineriartornerup equngasumik ingerlalernissaa ernummatigaa.

- Nunatsinni suliffeqarfiit amerliartuinnartut matuinnartariaqalerpata, sanaartornermik suliakkerneqartartut nunanit allaneersut, soorlu Aarsleff aamma MT Højgaard, pisortanut namminersortunullu suliassarpassuarnik suliarinnittalissapput.

- Qallunaat suliffeqarfiutaat Nunatsinniikkunnaaraangamik immikkut ittumik akileraartussaatitaaneq ajorput, oqarpoq.

K’itdlak’ Knudsen isumaqarpoq suliffeqarfissuit nunanit allaneersut ilinniartoqartarnermut atatillugu kalaallinut inuiaqatigiinnut tapersersuineq ajortut.

- Soorlu suliffeqarfiit nunaqavissunit pigineqartut suliassanik tunineqaraangata, aningaasanik nunami kaaviiartitsisarnerattulli, aningaasat inuiaqatigiinniiginnarnavianngillat.

- Nunani allani suliffeqarfissuit Nunatsinni innuttaasunut errorsivinnik suliaqarnavianngillat, imaluunniit uffarfimmi qullilerinavianngillat, illoqarfiillu anginerusut avataanni aamma taamaappoq. Najukkami innuttaaqatigiit Kalaallillu inatsimmit siunnersuutiginiarneqartumit eqqugaassasut, taanna isumaqarpoq.

K’itdlak’ Knudsen inatsisiliortunut, tassa Naalakkersuisuni Inatsisartunilu ilaasortanut, pingaarutilinnik apeqquteqarpoq:

- Inatsisiliariniarneqartumi Qallunaat nunanilu allamiut suliffeqarfiutaat, Kalaallinit namminersortutut inuussutissarsiortunit atugarissaarnerunissaannik kinguneqartussamik inatsisiliornissaq siunertaava?

Suliffeqarfik matusariaqarpa?

- Kalaallit suliffeqarfiutaasa matuinnartariaqarnissaat siunertaava?

- Kalaallit namminneq suliffeqarfimmik aallartitsisinnaanissaannut pilerinarunnaarsitsisumik inatsisiliortoqarnissaa siunertaava?

Suliffeqarfiutilik taanna Nuummi namminersortunik suliffeqarfiutilinnik arlalinnik ilisarisimasaqarpoq.

- Inatsisissatut siunnersuut tulluanngitsoq uagutsinnik eqquilluinnartoq, uattulli pakatsissutigitigaat, K’itdlak’ Knudsen oqarpoq.