Steve nulianilu Europap kujataata
kitaani Algarvemi Portugalip kujataaniittumi najugaqarput. Algarvimi illut
immikkuullarissut isikkivigaat.
Steve Pedersen-Hinrup
25-liingajalerpoq, Ilinniarfissuarmilu 2023-mi allagartartaarpoq. Nunamit 3000
kilometerit sinnerlugit ungasitsigisumi najugaqarnera inissaaleqinermit
pissuteqarpoq. Kalaallit Nunaanni inissaqaleraluaruniluunniit meeqqat
atuarfianni ilinniartitsisutut atorfeqarusunngilaq.
Steve nulianilu Europap kujataata
kitaani Algarvemi Portugalip kujataaniittumi najugaqarput. Algarvimi illut
immikkuullarissut isikkivigaat.
Steve Pedersen-Hinrup
25-liingajalerpoq, Ilinniarfissuarmilu 2023-mi allagartartaarpoq. Nunamit 3000
kilometerit sinnerlugit ungasitsigisumi najugaqarnera inissaaleqinermit
pissuteqarpoq. Kalaallit Nunaanni inissaqaleraluaruniluunniit meeqqat
atuarfianni ilinniartitsisutut atorfeqarusunngilaq.
- Atuarfimmi ingerlariuseq meeqqat
pisariaqartitaannut naleqqussarneqanngilaq, taamaattumillu atuartut amerlasuut
piumassuseqarneq ajorput, Steve Pedersen-Hinrup AG-mut oqarpoq.
Ilinniarnertuunngorniarfimmi
naammassigami Nuummi Ilulissanilu meeqqat atuarfianni sivikitsumik
ilinniartitsisuuvoq.
- Meeqqat atuarfianni
ilinniartitsisutut piviusumut appakaakkama ilinniakkama nalaani
takorloorsimasannit allaanerulluinnarpoq, oqarpoq.
Assersuutigalugu nutaanik
misileraanissaq unammillernarsimavoq.
- Allaannginnami
ingerlariusitoqqamut pisoqalisimasumut pulalluni. Naak ingerlatsineq pillugu
nutaanerusunik allaanerusunullu takorluugaqaraluarluni, Steve Pedersen-Hinrup
oqarpoq.
Klassinik arlalinnik
ilinniartitsisarpoq, Inuk Ostermann Sørensenilu assigalugu
ilisimasaqarfiginngisani ilinniartitsissutigisussaallugit.
- Piffissartornarneruvoq
qularnermillu pilersitsilluni. Tamaviaarnarpoq, Steve Pedersen-Hinrup oqarpoq.
Meeqqat timitik aalatittussaavaat
Steve Pedersen-Hinrupip, tuluttut, pinngortitalerinermik
timersornermillu ilinniarsimasup, ilinniartitsineq atuartunillu peqateqartarneq
nuannaarutiginerpaasarpai.
Nammineq oqarnera naapertorlugu
meeqqat atuarfianni ilinniartitsisuunerata nalaani tuluttut atuartitsinerit
ikilisinneqarput qallunaatullu atuartitsineq annertusineqarluni.
- Ilinniartitsissutigineqartartut
kalaallinut kulturitsinnullu naleqqussarluarnerusariaqaraluarput,
allaannginnami qallunaat ingerlariusaat maliinnaripput, oqarpoq.
Ingerlariuseq atuartunut
tulluarsarneqaraluarpat piumassuseqarnerulersitsissasoq Steve Pedersen-Hinrup
isumaqarpoq.
- Meeqqat timitik atoraangamikkit
piumassusinittarnerat misilittagaqarfigaara. Silamiinneq nuannaraat. Ullumikkut
iPadit atorneqartarput, tamannalu atuartut, ingammik mikinerit,
piumassuseqarnerulernissaannut iluaqutaanngilaq, oqarpoq.
Steve Pedersen-Hinrupip meeqqat
atuarfianni ilinniartitsisunngoqqissaguni ilinniarsimasani kisiisa
ilinniartitsissutiginissaat takorloorpaa. Nunarput
ilinniartitsisussaaleqinngitsoq taanna isumaqarpoq.
- Qineqqusaarnermi nunatsinni
meeqqat atuarfiini ilinniartitsisut amigaatigineqartut oqaatigineqarpoq. Uanga
taama isumaqanngilanga. Ilinniartitsisut naammakkaluarput, meeqqalliuna
atuarfiini sulerusunngitsut, Steve Pedersen-Hinrup oqarpoq.
Meeqqat atuarfianni atorfininnissani
siunissami qaninnerusumi pilersaarutiginngilaa.
