Inuit 500-ut tarnip nakorsaanit misissorneqarnissaminnut utaqqisut
Meeqqat, inuusuttut inersimasullu 500-t missaaniittut maanna tarnikkut innarluuteqarnerlutik misissortinnissamut utaqqipput, taakkualu ilarpassui ADHD-qarsorineqarput.
Assi: Ritalin, Prescription Medicine for ADHD and Narcolepsy
ADHD-eqarpunga - imaluunniit naamik?
Taanna apeqqut akissutissarsiniarlugu inuit 500-ut missaaniittut utaqqisariaqarput, utaqqisuni allattorsimaffimmiikkamik.
Taama Peqqissutsimut inunnullu innarluutilinnut Naalakkersuisoq, Anna Wangenheim §37 naapertorlugu apeqqummut akissuteqarluni allappoq.
Knud Kleemann (A) Inatsisartuni ilaasortaasoq apeqquteqartuuvoq.
Anna Wangenheimip ilanngullugu ilisimatitsissutigaa inuit innarluutilinnut tunngasut kisitsisit paasissutissat amigartuusut. Paasissutisiissutigaali meeqqat inuusuttullu 100-ut missaaniittut tarnikkut misissortinnissaminnut nalilerneqarnissaminnullu utaqqisut. Taassunani 30-it ADHD-eqarnerannik pasitsaanneqarput.
- Akueriuminaappoq
Knud Kleemann isumaqarpoq utaqqisut amerlassusaat akueriuminaatsuusut:
- Kipiluttunarpoq akueriuminaallunilu paasillugu inuit taama amerlatigisut ADHD-eqarnerlutik misissorneqarnissaminnut utaqqisariaqarmata, Sermitsiamut oqarpoq.
ADHD
Naalakkersuisoq paasissutissivoq ADHD tassaasoq ineriartornermut akornut.
Tassani aallussisinnaanermut akornuteqarneq, ingasattumik pissusilersortarneq aamma eqqarsaqqaarani pinasuartaneq akornutaallutik.
Akornut tarnikkut katsorsaasunit kisimi inernilerneqarsinnaavoq.
Meeqqat aalajangersimasumik amerlassusillit maannakkut ADHD-eqarnersut misissuiffigineqarput. Kisitsisilli takutinneqarsinnaanngillat, naliliineq naammassineqanngippat, Anna Wangenheim nassuiaavoq.
Taassumali paasissutissiissutigaa meeqqat inuusuttullu 250-it missaaniittut katsorsarneqarnissamut, nakkutilliiffigineqarnissamut imaluunniit misissorneqarnissamut utaqqisuniittut.
Taakkunani 90-it ADHD-mik suussusilerneqarsimapput aamma nakorsaatinik katsorsarneqarlutik ukiullu affakkaarlugit misissuiffigineqarnissamut aggersarneqartarlutik.
Inersimasut 400-ut utaqqisut
Meeqqat misissorneqarnissaminnut utaqqisut saniatigut, maannakkorpiaq inersimasut 400-ut misissorneqarnissaminnut utaqqipput.
Inersimasut 250-it missaaniittut ADHD-qarnermut nakorsaatinik katsorsarneqarput.
Knud Kleemann Avannaata Kommuniani kommunalbestyrelsimi ilaasortaavoq, taassumalu siunnersuutiginiarpaa ersinngitsumik innarluuteqartunut sanaartortoqassasoq.
Taassuma saniatigut Inatsisartunut oqallilissiamik siunnersuuteqarniarpoq, tassani Inatsisartuni ilaasortat misissortinnissamut utaqqisut amerlassusaat oqaluuserisussaassallugu.
