Inuussutissarsiutigalugu assamik arsarnermiit qaffasissumik politikkilerinermut

USA-p præsidentiata Kalaallit Nunaata aqunneqalernissaa pillugu oqalugiaataa tamatumalu kingorna Danmarkimit avissaarnissaq pillugu oqallinneq Jakob Larsenip januaarimi uissuummissutigai. 

Politikkikkut qanoq inissisimanera ilisimajuaannarsimavara, siornatigulli politikkimut akuliunneq ajorpunga. Trumpilli oqariartuutai nunatsinnilu politikkikkut namminiilivinniartut annertusiartornerat pissutigalugit akuliuttariaqalerpunga. Isumaqarpunga sakkortuumik isummertartut oqaaseqartinneqangaatsiartut, oqallinnernillu assigiinngiiaarnerusunik ilanngusserusuppunga, 50-inik ukiulik Jakob Larsen oqarpoq, taannalu apriilimi partiip Radikale Venstrep Fynimi qeqertanilu folketingimut qinigassanngortitaasa pingasut ilaattut qinigaavoq. 

USA-mut qujaannartoq 

Jakob Larsen naapertorlugu Kalaallit Nunaat naalagaaffeqatigiinnerup akerlianik USA-p erfalasuanik erfalasoqalissagaluarpat pilluarnarnavianngilaq.

- Kalaallit Nunaata Danmarkillu akornanni ajornartorsiuteqartoqaraluartoq Kalaallit Nunaat USA-mi nunap inoqqaavinit pitsaanerusumik pineqarpoq. Naalagaaffeqatigiinneq peqqinnartumik naligiissumillu ingerlatillugu, tamatta qanga pisimasut takusinnaallugillu siunissaq pillugu suleqatigiilluta paarisariaqaripput isumaqarpunga. Amerikamiut teknologiimik ingerlatsivissuisa Kalaallit Nunaat atornerluisussaanngilaat nunallu iluani pisuussutinik piiaasussaanatik.

- Tamatuma saniatigut kalaallit Danmarkimiittut 17.000-it sinnerlugit oqaaseqartarniarpunga. Ajoraluartumik suli amerlasuut danskit aaqqissuussaanerannit akornusersorneqartarput, taakkulu sinnerlugit oqaaseqartartunngorusuppunga.

- Naggasiutigalugu kulturit taakku marluk pigigakkit kalaallit kulturiata Folketingimi paasineqarnerulersinnaanissaa angorusuppara, Jakob Larsen, Siorapalummeersumik anaanalik, Maniitsumi inunngorsimasoq aammalu Ilulissani Nuummilu peroriartorsimasoq, oqarpoq.

Assammik arsartartoq sungiusaasorlu 

Jakob Larsen amerlanernit politikkimut tunnganngilluinnartumik ilisimaneqarpoq; tassa assammik arsarnermi. Angutit nunanut allanut unammisartuisa unamminerini 100-nit amerlanerusuni unammeqataasarsimavoq, ilaatigut VM-imi pissartanngorniunnerni pingasuni peqataasimalluni. Danmarkimi klubbini arlalinni kiisalu Spaniami Zaragozami aamma Frankrigimi Saint Rafaelimi inuussutissarsiutigalugu arsartarsimavoq. Ukiuni kingullerni 10-15-ini GOG-mi aamma Nykøbing Falsters Håndboldimi arnat assammik arsartartut unammisartuini sungiusaasimavoq. Aasareerpallu Horsens Håndbold Elitemi sungiusaasunngussaaq.

 Kamilla, aamma inuussutissarsiutigalugu assammik arsartartuusimasoq, nuliaraa. Qulinik aqqaneq-marlunnillu ukiulinnik erneqarput. 

Politikkilerinermi sungiussisimasoq 

Massakkumut inuunermini annermik assammik arsarnermik suliaqaraluarluni siunissami immaqa politikkimut attuumassuteqarnerussaaq. 

– Kalaallit Nunaanni Assammik Arsartartut Kattuffianni periusissiornermut siunnersortitut ukiuni kingullerni sulivunga, tassungalu atatillugu Kalaallit Nunaanni Danmarkimilu politikerit arlallit oqaloqatigisarpakka. Politikkimut soqutiginninnera taamaalilluni annertusiartuinnarpoq. Timersornermut politikki aamma soqutigilluarpara, tulluusimaarutigaaralu Kalaallit Nunaat nammineq erfalasuni atorlugu unammisarsinnaammat. Maligassiuilluartunik nunanut allanut unammisartoqarneq nunamut sumulluunniit kivitsisarpoq. Timersuutigut allat aamma taama akuerineqassapput. Tamannali pissappat nunat tamalaat kattuffii isumasioqatigiissutigalugit Danmarkimit akuerineqartariaqarpoq. Akuersinerit taakku Kalaallit Nunaata siunissami namminiilivinnissamik takorluugaanut pingaaruteqarput. Tamatuma iliuuseqarfiginissaanut qularnaveeqquseerusuppunga, Jakob Larsen oqarpoq, taassumalu inuiaqatigiinni isumaliutersuutaa pingaarnerpaaq tassaavoq nukittunerit oqimaannernik nammataqartariaqartut. 

– Isumaga naapertorlugu sulisinnaasut sulisariaqarput. Sulisinnaanngitsut ikiorneqartariaqarput. Inuiaqatigiinni kikkut nukittunerunersut tamatta nalunngilarput, taakkulu pisussaaffeqarnerupput, kisianni aamma suliffeqarfeqarfimmi pitsaasunik atugassaqartinneqartariaqarput. Tassani talerperliuniat isumaliutersuutaat atuutilerpoq, Jakob Larsen oqarpoq, taassumalu inuusuttuaraanermini Ilulissani qimussertarnini eqqaamavaa, qimussernermilu qimmit nukittuut qimunnerusut qimmit piaraanerusut nukilaannerillu qamutini unillatsiartariaqartarput. 

– Inuiaqatigiit taamaattut kissaatigaakka. 

Naalagaaffeqatigiinnerup nutarsarnissaa 

Naalagaaffeqatigiinnerup nutarsarnissaa siuarsarnissaalu Kalaallit Nunaata siunissaanut pingaaruteqarpoq. 

– Kalaallit Nunaat siunissami namminiilivikkumavoq, tassungalu aqqutaani aningaasaqarneq imminut nammattoq aalisarnermik, takornariaqarnermik aatsitassanillu tunngaveqartoq pilersittariaqarparput. Kalaallit Nunaannit nuuttut Kalaallit Nunaannut nuuttunit amerlanerusut maannakkut takusinnaavarput, taamaammallu Kalaallit Nunaanni inuiaassuseq, oqaatsit il.il. apeqqutaatinnagit kikkut tamarmik inissaqartinneqarsinnaanerannik isumaliortaaseq pilersinneqartariaqarpoq. Isumaga malillugu Kalaallit Nunaanni najugaqarusuttut suliumasullu tamarmik illersorneqassapput, Jakob Larsen oqarpoq, nangillunilu kalaallit Danmarkimiittut Danmarkimi aamma ataqqineqassasut oqaatigaa. 

– Qallunaarpassuit Kalaallit Nunaat kalaallillu siornatigut nikagisarsimavaat. Uangali taamaakkunnaartoq misigisimavara. Ullumikkut naligiimmik pissuseqarnerulerpugut, uangalu nammineerlunga kalaaliunera tulluusimaarutigaara, Trump taamaalilluni Kalaallit Nunaannut iluaqutaasumik iliuuseqarpoq, Jakob Larsen oqarpoq.