Jens-Frederik Nielsen: Trumpip oqariartuutaa akuersaarneqarsinnaanngilaq
Donald Trumpip Kalaallit Nunaat pillugu sisamanngornermi nutaat oqaaseqareersorlu qinersinermi ajugaasup Jens Frederik Nielsenip (D) ataatsimoornissaq kajumissaarutigaa.
- Trump oqariartuutaa akuersaarneqarsinnaanngilaq, takutiinnarpaalu pissutsit taamaatsillugit ataatsimoortariaqartugut, Jens-Frederik Nielsen taama qisuariarpoq.
Assi: Leiff Josefsen
Donald Trump Natop generalsekretæria Mark Rutte peqatigalugu tusagassiortunik sisamanngornermi katersortitsinermi USA-p Kalaallit Nunaannik oqartussaaffiginnittunngornissaa upperalugu aammaarluni oqaaseqarpoq.
Demokraatit marlunngornermi qinersinermi ajugaapput, siulittaasuallu Jens-Frederik Nielsen naalakkersuisooqatigiinnissamik isumaqatiginninnialeruttorpoq.
Partiimi siulittaasup ataatsimoornissaq Facebookikkut allalluni kajumissaarutigaa, Trumpillu oqaasii nuannaarutigivallaarnagit:
- Trump oqariartuutaa akuersaarneqarsinnaanngilaq, takutiinnarpaalu pissutsit taamaatsillugit ataatsimoortariaqartugut, Jens-Frederik Nielsen allappoq, nangipporlu:
- Ippassaq qinersinermiit inernerit takuagut, piffissallu sivikitsup iluani politiskkikkut isumaqatigiinngissutit aallartissanngillat. Isumaqatiginninniarnernullu isernissatsinnut anersaaq tamanna naatsorsuutigineqarsinnaavoq, Demokraatit siulittaasuat sisamanngornerup unnukkuani allappoq.
Partiit siuttui naapissasut uppernarsaraa
IA-p siulittaasua Múte B. Egedep naalakkersuisuni suli siulittaasuugallarami atorfilittat qinnuigisimallugit partiit siuttui aggersaqqullugit. Trumpip oqariartuutai sakkortuumik killilerneqarnissai anguniarlugit siuttut oqaloqatiginiarpai.
Jens-Frederik Nielsenip tamanna uppernarsarpaa:
- Partiit siuttui naapissasut uppernarsarsinnaavara, malinnaatitsinissarpullu neriorsuutigalugu.
Partiit siuttui tallimanngornermi ataatsimeeqatigiissasut Jens-Frederik Nielsen Sermitsiamut oqarpoq.
Sisamanngornermi tusagassiortunik katersortitsinermi Trumpip qinersineq"uagutsinnut qinersilluarnerusutut" taavaa.
- Angusarissaarnerpaaq inutsialaavoq, Trump Demokraatit siulittaasuat Jens-Frederik Nielsen qineqqusaarnermi qinerneqarnerpaaq pillugu oqarpoq.
Trump: Danmark ungasissorujussuuvoq
Donald Trumpip Kalaallit Nunaata Danmarkimut ilaanera aamma apeqquserpaa, Kalaallit Nunaannullu sakkutuut amerlanerusut aallartinneqarsinnaasut oqaatigalugu:
- Danmark ungasissumiippoq iliuuseqarpiarsinnaananilu. Susoqartoruna? Umiatsiaq ukiut 200-t matuma siorna tulakkunarpoq. Oqartussaaffigalugu oqarput tamannalu ilumoornersoq naluara. Taamaassorinngilara, Trump oqarpoq.
- Danmarkili Kalaallit Nunaallu attaveqarfigisimavavut, taamaaliortariaqarpugulu nunarsuaq tamakkerlugu isumannaatsuunissaamut pisariaqartilluinnaratsigu, taamaattumillu isumaqarpunga Nato arlaatigut akuliuttariaqartoq.
- Kalaallit Nunaanni sakkutooqarfeqareerpugut, sakkutuullu amerlaqaat. Immaqa sakkutuut amerlanerit tassungarsinnaapput. Naluara, Trump sisamanngornermi oqarpoq.
