Kajumissaarut: Tasiilaq eqqaalu ulorianartorsiortorujussuupput

- Matusineq imaluunniit ineriartortitsineq kissaatigineqarpa?, Tasiilap Inuussutissarsiornermut Siunnersuisoqatigiivi borgmesterilu Avaaraq Olsen ataatsimoorlutik nuna tamakkerlugu politikerinut kaammattuipput.

Air Greenlandip sapaatip akunneranut ataasiarluni Nuummiit Tasiilamut timmisartuussisarnini, taamaalilluni sapaatip akunneranut pingasoriarluni timmisartuussisarnini ilaleraluaraa, Air Greenlandimi Tusassimilu aalajangiinerit Tunumi innuttaasunut annertuumik kinguneqareersutut isigineqarput.

Assartuinermut piffissaq sivisunerusoq

OBS: Oqaaseqaammi uani ataaniittumut tunngatillugu Tusass ilisimatitsivoq PostNordip aalajagingarigaat nassiussat Nuuk aqqusaarlugu timmisartuunneqartassasut. Aaqqissuisoqarfik.

- Ingammik Islandimut angallassinermut ilaasumik poortukkanik allakkanillu assartuinermut Islandikkoornani Nuuk aqqusaarlugu ingerlasalerneq annertuumik ajornartorsiortitsivoq. Tamanna assartuinermut piffissamik sivisunerulersitsivoq, aammalu Tasiilamut nunaqarfinnullu eqqaaniittunut nioqqutissanik pingaarutilinnik pilersuinerup qulakkeernissaa ajornakusoortippaa, ataatsimoorussamik kaammattuummi tamanna erseqqissarneqarpoq, nangillunilu:

- Timmisartuutileqatigiiffiup timmisartuussisarnini allanngortimmagu Icelandair oktobarip aallaqqaataanit marsip aallaqqaataanut Reykjavikip Kulusullu akornanni timmisartuussisarunnaartariaqalerpoq, aasakkut timmisartuussisarnini sapaatip akunneranut 50-inik ikilisarlugu. 

Ilungersunartut allattuganngorlugit

Inuussutissarsiornermut siunnersuisoqatigiit borgmesterillu tunumiunut qanoq ilungersunartiginera ersersinniarlugu arlalinnik eqqaasaqarput:

• Islandimit naatitanik nutaanik pissaaratta pilersuinerlunnerulerlutalu innuttaasut inuunerat ajornerulissaaq.

• Nerisassaaleqineq, nerisassanik pilersuisut sivisunerulerlutillu nalorninartorsiornerulermata.

• Maskiinat atortullu pingaarutillit kingoraartissaannik pissarsiniarnerat ajornakusoortarpoq, tamannalu niuernermut aataveqaasersuutinullu sunniuteqarpoq. 

• Islandimut sukkasuumik angalasinnaanikuulluni Nuummut aqqusaartalerneq takillunilu akisooq.

• Ukiukkut takornariartartut ikileriangaatsiarnerat, takornariat ilaatigut Islandimut tikikkaangamik Kulusummut Tasiilamullu qulimiguulimmik angalasariaqartaramik angalaniarnermi pissutsit ajornakusoornerat pissutigalugu Tasiilamut angalanissartik tunuarsimaarfigilermassuk.

• Nunaqarfinniit nunaqarfinnullu kiffartuussinissamik isumaqatigiissut malinneqanngilaq, sapaatip-akunneranut marloriarluni angalasarnermiit ataasiaannarluni angalasartoqalersimavoq, piginnittunit nakkutigineqarani.

- Unammillernartut tamakku inuussutissarsiortunut navianartorsiortitsiinnaanngillat, inuiaqatigiinnulli tamanut navianartorsiortitsipput. Ukiuni qulikkuutaani Tasiilami Islandimut nioqqutissat, ilisimasat niuernermilu attaveqaatit pisariaqartinneqarput. Maannakkut inuunermut aqqutit taakku kipineqarput, sumiiffimmilu inuuniarnermi atukkat ajorseriangaatsiarsinnaapput, nalunaarusiami allassimavoq.

Borgmesteri: Maanna iliuuseqartoqarli!

Borgmesterip Avaaraq Olsenip Tasiilami pissutsit ilungersunartutut isigai.

- Timmisartuusiffiit pilersuiviillu allanngortinneqarnerisigut innuttaasut inuussutissarsiortullu atugaat allanngorluinnarput. Inuunerup pitsaassusiata inuuniarnermilu tunngaviit ajorsiartornerat akuerineqarsinnaanngilaq akuerineqassananilu. Tasiilaq innuttaasullu pilersorneqarnerup tunngaviusup aserorneqarneranik atugaqalersinnaanngillat. Taamaammat Tasiilami Inuussutissarsiornermut Siunnersuisoqatigiit tapersersorlugit oqassaanga: Politikkikkut iliuuseqartoqarnissaa maanna piumasaraarput, borgmesteri oqarpoq.

Aaqqiissutissaq

Inuussutissarsiornermut Siunnersuisoqatigiit borgmesterilu nuna tamakkerlugu politikerinut kajumissaarillutik ima aaqqiissuteqarumapput:

• Keflavik – Kulusuk – Keflavik oktobarimiit februaarimut angallannermut atassuteqarnissaannut tapiissut.

• Timmisartuussiffiit Nuuk – Keflavik – Nuuk Kulusummi unittarfissaqarsinnaapput. Tassani Icelandair Air Greenlandilu pineqarput..

• Kitaata sineriaaniit sapaatip akunneranut pingasoriarluni angallassisarnernit ukiukkut Islandimut angalasarnerup annaaneqarneranut taarsiissutaasinnaanngillat.

• Kiffartuussinissamik isumaqatigiissut aasaanerani, aamma Tasiilaq – Kulusuk – Tasiilaq akornanni, nakkutigilluarneqartassaaq, nunanut allanut tikittut aallartullu eqqarsaatigalugit timmisartuussisoqartarniassammat.