Kalaallit Savalimmiormiullu filmiliortartut piviusulersaarutip tunuartinneqarnera isornartorsiorpaat
DR-ip Ivittuuni orsugiassiorfik pillugu piviusulersaarut saqqummerseqqittariaqaraa, piviusulersaarummili nassuiaammik erseqqissaateqassasoq Kalaallit Nunaanni Savalimmiunilu filmiliortartut peqatigiiffii isumaqarput. Taamaaliornikkut naalagaaffeqatigiinni innuttaasut namminneq isummersinnaaniassammata.
Piviusulersaarut “Grønlands Hvide Guld” Katuami takuteqqaarneqarpoq, kingornalu DR-ikkut takutinneqarluni.
Oline Inuusuttoq Olsen
Kalaallit filmiliortartut peqatigiiffiata Film.gl-ip savalimmiormiullu filmiliortartut peqatigiiffiata Føroyask Filmsfólkip DR-ip piviusulersaarummik "Grønlands Hvide Guld"-imik tunuartitsinera isornartorsiorpaat.
Piviusulersaarut Ivittuuni orsugiassiorfiup aningaasarsiorfiorsimaneranut tunngassuteqartoq DR-imi takuteqqaarneqarneranit ullut qulingajaat qaangiuttullu piviusulersaarut takuneqaqqissinnaajunnaarlugu nittartakkamiit peerneqarpoq, tassanilu aaqqissuisuuneq DR-imit soraarsitaavoq. Paasissutissat nutaat piviusulersaarummut tunngassuteqartut paasineqarnerat tunuartitsinermut pissutaapput.
Filmiliortartut peqatigiiffiisa Film.gl-ip aamma Føroyask Filmsfólkip DR-ip aalajangernera sakkortuumik isornartorsiorpaat, peqatigiiffiit taakku ataatsimut tusagassiuutinut nalunaarummi allapput.
Nassuiaaserneqarli
- Piviusulersaarummi pineqartut piffissami kingullermi oqallisigineqangaatsiarsimapput, oqallinnerlu sakkortugaluaqisoq piviusulersaarummi eqqunngitsumik paasissutissaqarnera oqaatigineqanngilaq. Piviusulersaarummi peqataasut kisitsisit nalorninartuunerat aamma "kaaviiaartitat“ "iluanaarutillu“ assigiinngissutaat eqqaavaat, peqatigiiffiit tikkuaavoq.
DR-ip piviusulersaarut peeraluaraa Ivittuuni orsugiassiorfik pillugu oqallinneq suli ingerlavoq.
DR-ip "Grønlands Hvide Guld" saqqummerseqqittariaqaraa piviusulersaarummilu nassuiaammik ilanngussisoqassasoq Film.gl aamma Føroyask Filmsfólk isumaqarput.
- Taama aalajangerneq ingattajaarnertut isigaarput, killilersuinermut eqqaanarsinnaasutut. Taamaattumik “Grønlands Hvide Guld” saqqummersinneqaqqullugu DR-imut kaammattuutigaarput – pisariaqassappat nassuiaaserlugu – taamaalilluni naalagaaffeqatigiinni innuttaasut tamarmik piviusulersaarut pillugu namminneq isummersinnaaniassammata. Tamanut ammasumik oqallinneq naammagiinnarnagu taannami piviusulersaarummut naammaginartumik nassuiaataanngilaq, filmiliortartut peqatigiiffii allapput.
